NA SAME 140 - AI VOLA TABU

A masu sa ta e na gauna ni veivakacacani.

Vua na Domo-ni-meke. A Meke i Tevita.

¹ MO vakabulai au, Jiova, mai na tamata ca: mo maroroi au mai na tamata lomaqa;

² era sa nanuma ca tiko e lomadra: era dausoqoni vata me ia nai valu.

³ Era sa vagatara na yamedra me vaka na gata; na weli gaga ni gata daukata sa tiko eruku ni tebenigusudra. Sela.

⁴ Mo maroroi au, Jiova, mai na liga ni valavala ca; vakabulai au mai vua na tamata lomaqa; o koya sa via vukica na noqui lakolako.

⁵ O ira na viavialevu era sa vunia na tudai vei au, kei na dali; era sa tevuka na lawa e na bati ni sala; era sa kitaka na tudai me rawai au. Sela.

⁶ Au a kaya vei Jiova, O iko na noqu Kalou: mo vakatu daligamu mai ki na domo ni noqu masu, Jiova.

⁷ I Jiova na Turaga, na kaukauwa kaʼu sa bula kina, ko a vakaruruga na uluqu e na siga ni valu.

⁸ Kakua ni solia, Jiova, na ka era domona nai valavala ca: kakua ni vakayacora na nona vere ca; de ra vakalevulevui ira kina. Sela.

⁹ Ia na uludra era sa vakalali au, ena ubi ira na ca e vosataka na tebenigusudra.

¹⁰ Ena tauci ira na qilaiso ni buka waqa; era na biu ki na buka; ki nai keli titobu, me ra kakua ni tu tale.

¹¹ Ena tawa tiko dei e vuravura na tamata dauvosalevu: a tamata lomaqa, ena vakasavi koya ga na ka ca me mani rusa sara.

¹² Au sa kila ni na ia na lewa dodonu ko Jiova ena vukuna sa vakararawataki, kei na ka dodonu e na vukuna na dravudravua.

¹³ E dina ena vakavinavinaka ki na yacamu ko ira na yalododonu: ena tiko ga e matamu ko ira nai valavala dodonu.