NA SAME 139 - AI VOLA TABU

Sa lewa deivaki na Kalou, o koya e kila na ka kecega, 1-16; a ka levu sara na nona loloma, 17-18. Sa vakararavi kina vua, a sa masu me yalodina, 19-24.

Vua na Domo-ni-meke. A Meke i Tevita.

¹ I JIOVA, ko sa vakadikevi au, ka kilai au.

² O sa kila na noqu tiko sobu kei na noqu tu cake, o sa kila na nanuma ni lomaqu ni sa yawa tiko.

³ O sa vakatovolea na noqui lakolako kei na noqui kotokoto, a sa daukila na noqui valavala kecega.

⁴ Ni sa sega e dua na vosa e na gusuqu, ia ko sa kila kece sara ga, Jiova.

⁵ O sa vakalali au kimuri, kiliu talega, a sa tabaki au e na qeteqete-ni-ligamu.

⁶ A vuku vakakoya sa dredre sara vei au ni sa veivakidacalataki; sa cecere, au sa sega ni rawata.

⁷ Meʼu lako tani kivei mai na yalomu? seʼu dro tani kivei mai na matamu?

⁸ Kevaka kaʼu cabe ki lomalagi, ko sa tiko maikina: kevaka kaʼu tevuka na noqui mocemoce mai bulu, raica, ko sa tiko maikina.

⁹ Kevaka kaʼu sa taura na taba ni mataka, ka laʼki tiko mai na sauka ni wasawasa;

¹⁰ ena tuberi au ga maikea na ligamu, ka tauri au na ligamu i matau.

¹¹ Kevaka kaʼu sa kaya, Io, me tabogi au mada ga na butobuto; sa na qai rarama sara vei au na bogi.

¹² Io, na butobuto sa sega ni tabogo kina e dua na ka vei iko; sa cila na bogi me vaka na siga: sa tautauvata vei iko na butobuto kei na rarama.

¹³ Ni ko a taukena na noqui ivi: ko a ubi au e na kete i tinaqu.

¹⁴ Au na vakavinavinaka vei iko; ni sa ka rerevaki ka vakurabui na noqui bulibuli: a ka veivakidacalataki na nomu cakacaka; a ka o qo sa kila vakavinaka na yaloqu.

¹⁵ Sa sega ni tabogo vei iko na suiqu, niʼu a cakavi vuni, niʼu a cakavi vakaiukuuku eruku ni vuravura.

¹⁶ Ni u sa vaka na vulovulo wale sa kunei au na matamu, ia sa volai kece sara na tikiqu e na nomui vola, me cakavi tiko e na veisiga, ni sa sega ni caka oti e dua.

¹⁷ Ai yau levu vei au na nanuma ni lomamu, na Kalou! a ka levu na kenai wiliwili!

¹⁸ Keʼu sa via wilika, ke sa ka levu ka lailai na mata ni nuku: niʼu sa yadra, edaru sa tiko vata ga.

¹⁹ E dina, na Kalou, ko na vakamatei ira nai valavala ca! o koya dou lako tani kina vei au, na tamata ligaca.

²⁰ Ni ra sa vosavakacacataki iko, a ra sa cavuta walega na yacamu na nomu meca.

²¹ Au sa sega beka ni cati ira era sa cati iko, Jiova? au sa sega li ni vakasisilataki ira era sa tu cake vakaivalu vei iko?

²² Au sa cati ira vakaidina: era sa noqu meca.

²³ Mo vakadikevi au, na Kalou, mo kila na lomaqu: mo vakatovolei au, ka kila na nanuma ni lomaqu:

²⁴ ka raica se dua na sala ca vei au, ka tuberi au e na sala ni bula tawa mudu.