NA SAME 136 - AI VOLA TABU

Me ia na vakavinavinaka vua na Turaga e na ka tani e vuqa.

¹ DOU ia na vakamolimoli vei Jiova; ni sa yalovinaka: ni sa tawa mudu na nona loloma.

² Dou ia na vakamolimoli vua na nodra Kalou na kalou: ni sa tawa mudu na nona loloma.

³ Dou ia na vakavinavinaka vua na nodra Turaga na turaga; ni sa tawa mudu na nona loloma.

⁴ Vua sa kitaka na cakacaka mana levu duaduaga: ni sa tawa mudu na nona loloma.

⁵ Vua sa cakavi lomalagi e nona vuku: ni sa tawa mudu na nona loloma.

⁶ Vua ka tevuka na vanua e na dela ni wai: ni sa tawa mudu na nona loloma.

⁷ Vua sa cakava na rarama lelevu: ni sa tawa mudu na nona loloma:

⁸ na mata-ni-siga me lewa e na siga: ni sa tawa mudu na nona loloma:

⁹ na vula kei na kalokalo me lewa e na bogi: ni sa tawa mudu na nona loloma.

¹⁰ Vua ka mokuti Ijipita ia na nodra ulumatua: ni sa tawa mudu na nona loloma;

¹¹ a sa kauti ira tani na Isireli maivei ira: ni sa tawa mudu na nona loloma:

¹² e na liga kaukauwa, kei na liga sa dodo yani: ni sa tawa mudu na nona loloma.

¹³ Vua ka wasea na Wasa Damudamu: ni sa tawa mudu na nona loloma:

¹⁴ a sa cakavi ira na Isireli me lako e lomana: ni sa tawa mudu na nona loloma.

¹⁵ A sa vukici Fero kei na nonai valu e na Wasa Damudamu: ni sa tawa mudu na nona loloma.

¹⁶ Vua ka kauti ira voli na nona tamata mai na lekutu: ni sa tawa mudu na nona loloma.

¹⁷ Vua ka mokuti ira na tui levu: ni sa tawa mudu na nona loloma:

¹⁸ ka vakamatei ira na tui rogo: ni sa tawa mudu na nona loloma:

¹⁹ o Sioni na nodra tui na luve i Amori: ni sa tawa mudu na nona loloma:

²⁰ kei Oki na tui Pasani: ni sa tawa mudu na nona loloma:

²¹ a sa solia na nodra vanua mei votavota: ni sa tawa mudu na nona loloma:

²² me nodrai votavota na nona tamata na Isireli: ni sa tawa mudu na nona loloma.

²³ O koya ka nanumi keda ni da a malumalumu: ni sa tawa mudu na nona loloma:

²⁴ a sa vakabulai keda maivei ira na noda meca: ni sa tawa mudu na nona loloma.

²⁵ O koya sa solia na kedra na ka kecega sa bula: ni sa tawa mudu na nona loloma.

²⁶ Dou ia na vakavinavinaka vua na Kalou ni lomalagi: ni sa tawa mudu na nona loloma.