NA SAME 135 - AI VOLA TABU

Sa vakarota vei ira na tamata i Jiova me vakavinavinaka vua ni sa nodra Kalou o koya sa dauvakabulai ira, ka sa daucudruvi ira na nodra meca. 1 DOU ia vei Jiova na vakavinavinaka.

¹ DOU ia vei Jiova na vakavinavinaka. Dou ia ki na yaca i Jiova na vakavinavinaka; dou ia na vakavinavinaka, oi kemudou na tamata i Jiova.

² Oi kemudou sa tiko e na vale i Jiova, e na veilomanibai ni vale ni noda Kalou.

³ Dou ia na vakavinavinaka vei Jiova: ni sa yalovinaka ko Jiova; dou meketaka na yacana; ni sa ka kamikamica.

⁴ Ni sa digitaki ira na Jekope ko Jiova me nona, ia na Isireli me nonai yau talei.

⁵ Niʼu sa kila sa levu ko Jiova, ia na noda Turaga sa sivia na kalou kecega.

⁶ A ka kecega sa vinakata ko Jiova, sa cakava ga mai lomalagi, kei vuravura, e na wasawasa, kei na wai titobu kecega.

⁷ Sa cakava na kabukabu me lako cake mai nai yalayala kei vuravura; sa cakava na livaliva me tau kina na uca; sa kauta mai na cagi mai na nona lololo.

⁸ O koya ka yavita na ulumatua mai Ijipita, na tamata kei na manumanu talega.

⁹ Sa tala nai vakatakilakila kei na ka vakurabui e na loma ni nomu vanua, Ijipita, vei Fero, kei ira na nona tamata.

¹⁰ O koya ka mokuta na veimatanitu lelevu, ka vakamatei ira na tui kaukauwa;

¹¹ ko Sioni na nodra tui na luve i Amori, kei Oki na tui Pasani, kei na veimatanitu kecega mai Kenani:

¹² a sa solia na nodra vanua mei votavota, me nodrai votavota na nona tamata na Isireli.

¹³ A yacamu, Jiova, sa na tawa oti; ia na kemui vakananumi, Jiova, ki nai tabatamata kecega.

¹⁴ Ni na lewai ira na nona tamata ko Jiova, ena veivutuni talega e na vukudra na nona tamata.

¹⁵ A nodra matakau na veimatanitu na siliva kei na koula, a cakacaka ni liga ni tamata.

¹⁶ Era sa vakagusuna, a ra sa sega ni vosa rawa; era sa vakamatana, a ra sa sega ni rai rawa;

¹⁷ era sa vakadaligana, a ra sa sega ni rogo rawa; a sa sega na cegucegu e na gusudra.

¹⁸ O ira era sa cakava era na tautauvata kei ira; o ira kece talega era sa vakararavi vei ira.

¹⁹ Dou vakavinavinaka vei Jiova, na mataqali i Isireli: dou vakavinavinaka vei Jiova, na mataqali i Eroni:

²⁰ dou vakavinavinaka vei Jiova, na mataqali i Livai: oi kemudou sa rerevaki Jiova, dou vakavinavinaka vei Jiova.

²¹ Me vakavinavinakataki ko Jiova mai Saioni, o koya sa tiko mai Jerusalemi. Dou ia vei Jiova na vakavinavinaka.