NA SAME 132 - AI VOLA TABU

Sa tukuna ko Tevita na nona nanuma na kato ni veiyalayalati, 1-7; sa masu ni sa kau, 8-10. A vosa ni yalayala ni Turaga, 11-18.

A Meke ni cabecabe.

¹ I JIOVA, mo nanuma e na vuku i Tevita na nona rarawa kecega:

² ni sa vosavavakini ko koya vei Jiova, ka ia na veiyalayalati kei Koya na Kaukauwa nei Jekope, ka kaya,

³ Au na sega mada ni curu ki na vale malo kaʼu sa tiko kina, se cabe ki nai mocemoce kaʼu sa koto kina:

⁴ au na sega ni solia na mataqu me moce, se na dakudaku-ni-mataqu me sosovu,

⁵ ia kaʼu na kunea mada eliu e dua na yasana me nei Jiova, nai tikotiko me nei Koya na Kaukauwa i Jekope.

⁶ Raica, eda a rogoca ni sa tiko mai Efiraca: eda a kunea mai Kiriaci-yiarimi.

⁷ Eda na curuma na nonai tikotiko; eda na cuva ki nai tutu-ni-yavana.

⁸ Mo cabe cake, Jiova, ki na nomui vakavakacegu, o iko, kei na kato ni nomu kaukauwa:

⁹ me ra vakaisulu e na yalododonu ko ira na nomu bete; ka qoqolou e na reki ko ira na nomu tamata yalosavasava.

¹⁰ E na vuku i koya na nomu tamata ko Tevita me kakua ni gole tani na matamu vua ko a lumuta.

¹¹ Sa vosavavakini vakaidina ko Jiova vei Tevita; ena sega ni lesu tani maikina; Maivei ira na vua ni yagomu kaʼu na vakatikora na kemui sosomi e na nomui tikotiko vakaturaga:

¹² kevaka ena vakabauta na noqu veiyalayalati ko ira na luvemu, kei na noqu vunau a ya kaʼu na vakatavulica vei ira, ena tiko talega ko ira na luvedra ka tawa mudu e na nomui tikotiko vakaturaga.

¹³ Ni sa digitaki Saioni ko Jiova; sa vinakata ko koya me nonai tikotiko.

¹⁴ O qo na noqui vakavakacegu ka tawa mudu: au na tiko ga eke; niʼu sa vinakata.

¹⁵ Au na vakalougatataka vakalevu na kena kakana: au na vakamamautaki ira kina era sa dravudravua, e na madrai.

¹⁶ Au na vakaisulutaki ira talega na nona bete e na bula: era na qoqolou talega e na reki na nona tamata yalosavasava.

¹⁷ Au na cakava me kubu maikina na kaukamea i Tevita: au sa vakarautaka na cina me nei koya kaʼu sa lumuta.

¹⁸ Au na vakaisulutaki ira na nona meca e na madua: ia e na uluna ga ena seraki tu na nonai sala.