NA SAME 127 - AI VOLA TABU

A veivuke ni Turaga sa yaga, 1, 2. A nonai solisoli na gone, 3-5.

A Meke ni cabecabe; a nei Solomoni.

¹ KEVAKA sa sega ni tara na vale ko Jiova, era sa oca walega era sa tara: kevaka e sega ni vakatawa na koro ko Jiova, sa yadra walega ko koya nai vakatawa.

² Sa tawa yaga ni dou sa sou e na sabogibogi, ka berabera ni vakacegu tiko, ka kania na madrai ni rarawa: ni sa vaka-mocei ira ga sa lomana ko koya.

³ Raica, na gone era sa nonai solisoli na Kalou kei na vua ni kete nai sau ni ka vinaka.

⁴ Me vaka na gasau e na ligana na tamata kaukauwa; sa vakakina na luvedra era sa cauravou tiko.

⁵ Sa kalougata na tamata sa sinai kina na nona taga ni gasau: era na sega ni madua rawa, ni ra na vosa vei ira na nodra meca mai na matamata-ni-koro.