NA SAME 12 - AI VOLA TABU

A masu sa tukuni kina ko ira sa viavialevu.

Vua na Domo-ni-meke e na Seminica. A Meke i Tevita.

¹ MO ia na veivakabulai, Jiova, ni sa oti na tamata lotu dina: sa yali ko ira sa lomadina maivei ira na luve ni tamata.

² Era sa cavuta tiko yadua na ka wale vua na nonai tokani: era sa vosa vakavei-cavilaki tiko e na lomalomarua.

³ Ena seledrutia ko Jiova na tebenigusu dauveicavilaki, kei na yame sa dauvosalevu.

⁴ O ira era sa kaya, Keitou na gumatua e na yame i keitou: sa neitou ga na tebenigusu i keitou: o cei sa turaga vei keitou?

⁵ E na vuku ni ra sa vakararawataki na tamata malumalumu, e na vuku ni ra sa vutugu tiko na tamata dravudravua, sa kaya ko Jiova. Au na qai tu cake; au na vakabulai ira yadua maivei koya sa dauvakalialiai ira.

⁶ A vosa savasava na vosa i Jiova: me vaka na siliva sa vakatovolei e na kuro qele, sa vakasavasavataki vakavitu.

⁷ O na maroroi ira, Jiova, o na maroroi ira e nai tabayatamata o qo ka tawa mudu.

⁸ Era sa daulako voli e na veiyasana kecega na tamata ca, ni ra sa vakalevulevui na tamata velavela sara.