NA SAME 119 - AI VOLA TABU

ALEFA.

Sa tu e na meke o qo e vuqa na masu, kei na vakavinavinaka, kei nai vakatakilaga ni talairawarawa, 1-176.
ALEFA.

¹ SA kalougata ko ira e dodonu sara na nodra sala, era muria na vunau i Jiova.

² Sa kalougata ko ira era vakabau ta na nona vosa, era qarai koya e na lomadra taucoko.

³ Era sa sega talega ni caka cala: era lako ga e nona sala.

⁴ O sa vakaroti keimami me vakabauta sara na nomui vakaro.

⁵ Me vakadodonutaki mada na noqu sala me vakabauta na ka ko a lesia me caka!

⁶ Au na qai sega ni madua, niʼu sa qarava na nomu vunau kecega.

⁷ Au na vakavinavinaka vei iko e na yalododonu, niʼu sa vulica oti na nomu lewa dodonu.

⁸ Au na vakabauta na nomui lesilesi: mo kakua mada ni biuti au laivi yani.

PECA.

PECA.

⁹ Ena vakasavasavataka vakaevei na nona sala na cauravou? ni sa qarauna ga me vaka na nomu vosa.

¹⁰ E na yaloqu taucoko kaʼu sa qarai iko: meʼu kakua mada ni lako sese tani mai na nomu vunau.

¹¹ Au sa vunia oti na nomu vosa e lomaqu, meʼu kakua kina ni valavala ca vei iko.

¹² O sa kalougata, Jiova: mo vakavulica vei au na nomui lesilesi.

¹³ Au sa tukuna oti e na tebenigusuqu na ka kecega sa lewa na gusumu.

¹⁴ Au sa reki e nai valavala ni nomu vosa, me vaka e nai yau kecega.

¹⁵ Au na vakanananu ki na nomui vakaro, ka goleva tiko na nomu sala.

¹⁶ Au na rekitaki au e na vuku ni nomu vunau: au na sega ni guilecava na nomu vosa.

KIMELA.

KIMELA.

¹⁷ Mo caka vinaka vua na nomu tamata, meʼu bula, ka vakabauta na nomu vosa.

¹⁸ Mo vakamataraitaki au, meʼu kunea na ka veivakidacalataki e na nomu vunau.

¹⁹ Au sa vulagi e vuravura: mo kakua ni vunia vei au na nomu vunau.

²⁰ Sa kacabote na yaloqu e na vuku ni sa domona e na veisiga kecega na nomu lewa.

²¹ O sa vunauci ira na viavialevu era sa cudruvi, ko ira era sa lako sese tani mai na nomu vunau.

²² Mo vaqiqica tani vei au na veivakalialiai kei na veibeci; niʼu sa qarava oti na nomu vunau.

²³ Ka ra tiko talega na turaga, ka vosacataki au: ia na nomu tamata, sa vakanananu tiko ki na nomui lesilesi.

²⁴ A nomu vosa talega na ka kaʼu marautaka, ka bose vata kaya.

TELECA.

TELECA.

²⁵ Sa kabita na soso na yaloqu: mo vakabulai au me vaka na nomu vosa.

²⁶ Au a tukuna na noqu sala, ia ko a vakarorogo vei au: mo vakavulica vei au na nomui lesilesi.

²⁷ Mo vakavukui au meʼu kila nai valavala ni nomui vakaro: au na tukuna kina na nomu cakacaka vakurabui.

²⁸ Sa waicala na yaloqu ni sa bitaki: mo vakaukauwataki au me vaka na nomu vosa.

²⁹ Mo kauta tani vei au nai valavala lasu: ka solia walega vei au na nomu vunau.

³⁰ Au sa digitaka oti nai valavala dina: au sa tauca e mataqu na nomu lewa.

³¹ Au sa kabita na nomu vosa: mo kakua ni laivi au, Jiova, me vakamaduataki.

³² Au na cici e na sala ni nomu vunau, ni ko na vakalevutaka na yaloqu.

HI.

HI.

³³ Mo vakavulica vei au, Jiova, nai valavala ni nomui lesilesi; kaʼu na qai vakabauta ka yacova nai vakataotioti.

³⁴ Mo vakavukui au kina, kaʼu na qai cakava na nomu vunau; io, kaʼu na vakabauta e na lomaqu kece.

³⁵ Mo kauti au e na sala ni nomu vunau; niʼu sa rekitaka.

³⁶ Mo vaqara na lomaqu ki na nomu vosa, ia me kakua ki nai yau.

³⁷ Mo tarova na mataqu me kakua ni raica na ka lasu; mo vakaukauwataki au e na nomu sala.

³⁸ Mo vakayacora na nomu vosa vua na nomu tamata, o koya sa rerevaki iko tikoga.

³⁹ Mo kauta tani na qaui rogo ca, a ya kaʼu sa rerevaka: ni sa vinaka na ka ko sa lewa.

⁴⁰ Raica, kaʼu sa daudomona na nomui vakaro: mo vakaukauwataki au e na nomu yalododonu.

VAU.

VAU.

⁴¹ Ia me yacovi au, Jiova, na nomu yalololoma; na bula ko sa solia, me vaka na nomu vosa.

⁴² Ena qai dua na vosa meʼu tauca vua sa vosacataki au: niʼu sa vakararavi e na nomu vosa.

⁴³ Ia mo kakua ni kauta laivi na vosa dina mai na gusuqu; niʼu a namaka tiko na nomu lewa.

⁴⁴ Ia kaʼu na vakabauta tikoga kina na nomu vunau ka tawa mudu.

⁴⁵ Au na lako lalaga voli: niʼu sa qarava na nomui vakaro.

⁴⁶ Ia kaʼu na vosataka talega ua nomu vunau e na matadra na tui, ia kaʼu na tawa madua kina.

⁴⁷ Ia kaʼu na marautaki au e na nomu vunau, a ya kaʼu sa daulomana.

⁴⁸ Ia kaʼu na laveta talega na ligaqu ki na nomu vunau, a ya kaʼu sa daulomana; ia kaʼu na vakanananu ki na nomui lesilesi.

SAYINI.

SAYINI.

⁴⁹ Mo nanuma na nomu vosa vua na nomu tamata, a ya ko sa cakavi au meʼu namaka kina.

⁵⁰ O qo na ka kaʼu vakacegu kina e na noqu rarawa: ni sa vakaukauwataki au na nomu vosa.

⁵¹ Era sa vakalialiai au vakalevu na viavialevu: ia kaʼu sa sega ni lako tani e na nomu vunau.

⁵² Au sa nanuma na nomu lewa eliu, Jiova; a sa vakalecataki au.

⁵³ Sa tauvi au na rise ni kete, e na vukudra nai valavala ca era sa biuta na nomu vunau.

⁵⁴ A nomui lesilesi na ka kaʼu sa meketaka tiko, e na noqu vale kaʼu vulagi kina.

⁵⁵ Au sa daunanuma na yacamu, Jiova, e na bogi, ia kaʼu sa vakabauta na nomu vunau.

⁵⁶ O qo na noqu ka ni marau, niʼu a cakava na nomui vakaro.

KECA.

KECA.

⁵⁷ O iko na noqui votavota, Jiova: au sa kaya oti niʼu na vakabauta na nomu vosa.

⁵⁸ Au a masuta na nomu loloma e na yaloqu kecega: mo lomani au me vaka na nomu vosa.

⁵⁹ Au a vakanananu ki na noqui valavala, ka vakalesuya na yavaqu ki na nomu vosa.

⁶⁰ Au a vakusakusa, ka sega ni vakaberabera ni vakabauta na nomu vunau.

⁶¹ A nodrai vau nai valavala ca sa voliti au: ia kaʼu sa sega ni guilecava na nomu vunau.

⁶² E na veimama ni bogi kaʼu na tu cake ka ia na vakavinavinaka vei iko e na vuku ni nomu lewa dodonu.

⁶³ Au sa nodrai tokani kecega era sa rerevaki iko, kei na nodra era sa vakabauta na nomui vakaro.

⁶⁴ Sa roboti vuravura, Jiova, na nomu yalololoma: mo vakavulica vei au na nomui lesilesi.

TECA.

TECA.

⁶⁵ O sa caka vinaka, Jiova, vua na nomu tamata, me vaka na nomu vosa.

⁶⁶ Mo vakavulici au e na lewa vinaka kei na vuku: niʼu sa vakabauta na nomu vunau.

⁶⁷ Eliu, niʼu a sega ni tauvi mate, kaʼu a lako sese: ia o qo, kaʼu sa qai vakabauta na nomu vosa.

⁶⁸ Ko sa yalovinaka, ka caka vinaka; mo vakavulica vei au na nomui lesilesi.

⁶⁹ O ira na viavialevu, era sa tulia na lasu vei au: ia kaʼu na cakava ga na nomui vakaro e na lomaqu kece.

⁷⁰ Sa vaka dina na uro na yalodra; ia koi au kaʼu sa marautaka na nomu vunau.

⁷¹ Sa yaga vei au niʼu a tauvi mate; meʼu vulica kina na nomui lesilesi.

⁷² Sa vinaka vei au na vunau ni gusumu ka ca na tiki ni siliva kei na koula e vakaudolu.

YOTA.

YOTA.

⁷³ Sa cakavi au na ligamu, ka buli au: mo vakavukui au meʼu vulica na nomu vunau.

⁷⁴ O ira sa rerevaki iko era na reki ni ra raici au; e na vuku niʼu sa namaka me yaco na nomu vosa.

⁷⁵ Au sa kila, Jiova, ni sa dodonu na nomu lewa, ni ko a caka dina talega ni ko a vakararawataki au.

⁷⁶ Me vakalecataki au na nomu yalololoma, me vaka na nomu vosa vua na nomu tamata.

⁷⁷ Me yacovi au na nomu loloma levu, meʼu bula: ni sa noqu vu ni reki na nomu vunau.

⁷⁸ Me ra vakamaduataki na viavialevu; ni ra sa cakacaka vakailasu walega: ia koi au kaʼu na vakanananu tiko ki na nomui vakaro.

⁷⁹ Me ra lesu mai vei au ko ira era rerevaki iko, kei ira era sa kila na nomu vosa.

⁸⁰ Me dodonu sara na lomaqu e na nomui lesilesi, meʼu kakua ni madua kina.

RAFA.

RAFA.

⁸¹ Sa ceguoca na yaloqu mo vakabulai au: ia kaʼu na namaka ga na nomu vosa me yaco.

⁸² Sa oca na mataqu ni sa waraka na nomu vosa, ka kaya, Evei na siga ko na vakalecataki au kina?

⁸³ Niʼu sa vaka na tavaya kuli-ni-manumanu e na kubou; ia kaʼu sa sega ga ni guilecava na nomui lesilesi.

⁸⁴ E vica na nona siga na nomu tamata? o na cudruvi ira ninaica era sa vakacacani au?

⁸⁵ Era kelia nai keli meʼu lutu kina ko ira na viavialevu, a ya sa sega ni vaka na nomu vunau.

⁸⁶ Sa ka dina na nomui vakaro kecega: era sa vakacacani au tawa dodonu; mo vukei au.

⁸⁷ Era kolai vakaotia na noqu bula e vuravura; ia koi au kaʼu a sega ni biuta na nomui vakaro.

⁸⁸ Mo vakaukauwataki au me vaka na nomu yalololoma; au na vakabauta tiko kina na vosa ni gusumu.

LAMETA.

LAMETA.

⁸⁹ I Jiova, na nomu vosa sa vakataudeitaki mai lomalagi me tawa oti rawa.

⁹⁰ A nomu lomadina sa yacova nai tabatamata kecega: o a vakataudeitaki vuravura, a sa tu ga:

⁹¹ sa tu ga edaidai me vaka na nomu lewa; ni sa nomui talatala na ka kecega.

⁹² Kevaka kaʼu a sega ni marautaka na nomu vunau, kaʼu a rusa sara e na noqu rarawa.

⁹³ Au na tawa mudu ni nanuma na nomui vakaro: ni ko sa vakaukauwataki au kina.

⁹⁴ Kaʼu sa nomu, mo vakabulai au; niʼu sa qara na nomui vakaro.

⁹⁵ Era waraki au nai valavala ca me vakarusai au; ia kaʼu na vakanananu ki na nomu vosa.

⁹⁶ Au sa kunea nai otioti ni ka talei kecega: ia na nomu vunau ga sa rabailevu sara.

MEMI.

MEMI.

⁹⁷ A ka vakaidina na noqu loloma ki na nomu vunau! au sa vakanananu kina e na siga kecega.

⁹⁸ E na nomu vunau ko sa cakavi au me vuku vei ira na noqu meca: ni sa tikotiko ga kei au.

⁹⁹ Au sa vuku a ra sa lialia kecega era vakavulici au: niʼu sa vakanananu ki na nomu vosa.

¹⁰⁰ Au sa vuku ka ra lialia na qase, e na vuku niʼu sa cakava na nomui vakaro.

¹⁰¹ Au sa dauvakadaroya na yavaqu mai na sala ca kecega, meʼu vakabauta kina na nomu vosa.

¹⁰² Au sa sega ni lako tani e na ka ko a lewa: ni ko sa vakavulici au.

¹⁰³ A kena kamikamica na nomu vosa ki na gusuqu! io, na oni sa tawa kamikamica e na gusuqu!

¹⁰⁴ E na vuku ni nomui vakaro kaʼu sa vuku mai: o koya kaʼu sa cata kina na sala lasu kecega.

NUNI.

NUNI.

¹⁰⁵ A nomu vosa na cina ki na yavaqu, kei na rarama ki na noqu sala.

¹⁰⁶ Au sa vavakini oti, au na vakayacora talega, ka meʼu vakabauta na nomu lewa dodonu.

¹⁰⁷ Au sa rarawa vakalevu sara: mo vakaukauwataki au, Jiova, me vaka na nomu vosa.

¹⁰⁸ Mo donuya mada, Jiova, nai madrali ni gusuqu kaʼu sa cabora, ka vakavulica vei au na nomu lewa.

¹⁰⁹ Sa tutu ga e ligaqu na noqu bula: ia kaʼu sa sega ni guilecava na nomu vunau.

¹¹⁰ Era sa kitaka vei au na tudai ko ira nai valavala ca: ia kaʼu a sega ni lako sese mai na nomui vakaro.

¹¹¹ Au sa taura na nomu vosa me noqui votavota e tawa mudu: ni sa ka e rekitaka na lomaqu.

¹¹² Au sa vaqara na lomaqu me cakava tiko na nomui lesilesi, ka yacova nai vakataotioti.

SAMEKI.

SAMEKI.

¹¹³ Au sa cata na vakanananu wale: ia na nomu vunau kaʼu sa lomana.

¹¹⁴ O iko na noqui vunivuni kei na noqui vakaruru: au sa vakararavi ki na nomu vosa.

¹¹⁵ Bou lako tani vei au, nai valavala ca: niʼu na vakabauta na vunau ni noqu Kalou.

¹¹⁶ Mo tokoni au me vaka na nomu vosa, meʼu bula: ia meʼu kakua ni vakamaduataki e na ka kaʼu sa vakararavi kina.

¹¹⁷ Mo tauri au tiko, kaʼu na qai vinaka: ia kaʼu na vakaraica tikoga na nomui lesilesi.

¹¹⁸ O sa buturaki ira kecega era sa lako tani e na nomui lesilesi: ni sa ka lasu na nodra dauveivakaisini.

¹¹⁹ O sa biuti ira tani nai valavala ca kecega e vuravura me vaka na de ni kaukamea: o koya kaʼu sa lomana kina na nomu vosa.

¹²⁰ Sa sautaninini na lewequ e na rere vei iko; ia kaʼu sa rerevaka na nomu lewa.

AYINI.

AYINI.

¹²¹ Au sa kitaka na lewa dodonu kei na cakacaka dodonu: mo kakua ni laivi au vei ira era vakasaurarataki au.

¹²² Mo totaki koya na nomu tamata meʼu vinaka: me kakua ni vakasaurarataki au ko ira na viavialevu.

¹²³ Sa oca na mataqu ni sa waraka na bula sa maivei iko: kei na vosa ni nomu caka dodonu.

¹²⁴ Mo cakacaka vua na nomu tamata me vaka na nomu yalololoma, ka vakavulica vei au na nomui lesilesi.

¹²⁵ Kaʼu sa nomu tamata; mo vakavukui au meʼu kila na nomu vosa.

¹²⁶ A gauna o qo, Jiova, e dodonu mo cakacaka kina: ni ra sa vakacataka na nomu vunau.

¹²⁷ O koya kaʼu sa lomana kina na nomu vunau ka cata na koula; io, na koula dina sara.

¹²⁸ Niʼu sa vakadonuya na nomui vakaro kecega e na vuku ni ka kecega; ia kaʼu sa cata nai valavala lasu kecega.

PE.

PE.

¹²⁹ A ka vakurabui na nomu vosa, o koya sa vakabauta kina na yaloqu.

¹³⁰ Ni sa vakamacalataki na nomu vosa sa qai rarama mai; sa vakavukui kina ko ira era tawa vuku.

¹³¹ Au a dalaga na gusuqu, ka ceguoca: niʼu a domona na nomu vunau.

¹³² Mo golevi au mai, ka lomani au, me vaka na nomui valavala vei ira era daulomana na yacamu.

¹³³ Mo vakarautaka na noqui lakolako e na nomu vosa: ia me kakua ni gumatua vei au e dua na ka ca.

¹³⁴ Mo vakabulai au mai nai valavala kaukauwa ni tamata: au na vakabauta kina na nomui vakaro.

¹³⁵ Me cilavi koya na nomu tamata na matamu; ka vakavulica vei au na nomui lesilesi.

¹³⁶ Na uciwai sa dave mai na mataqu, e na vuku ni ra sa sega ni vakabauta na nomu vunau.

SATI.

SATI.

¹³⁷ O sa yalododonu, Jiova, a sa dodonu na nomu lewa.

¹³⁸ A vunau ko sa rotaka sa dodonu ka dina sara.

¹³⁹ Sai kani au na noqu lomakatakata, ni ra sa guilecava na nomu vosa ko ira na noqu meca.

¹⁴⁰ Sa savasava sara na nomu vosa: o koya sa lomana kina na nomu tamata.

¹⁴¹ Au sa ka lailai ka beci: ia kaʼu sa sega ni guilecava na nomui vakaro.

¹⁴² A nomu yalododonu na ka dodonu sa tawa mudu, ia na nomu vunau na ka dina.

¹⁴³ Sa tauri au na rarawa kei na yaluma: ia kaʼu sa rekitaka ga na nomu vunau.

¹⁴⁴ A kena dodonu na nomu vosa sa tawa mudu rawa: mo, vakavukui au, kaʼu na bula kina.

KOFA.

KOFA.

¹⁴⁵ Au a tagi e na yaloqu kece; mo rogoci au, Jiova: au na vakabauta na nomui lesilesi.

¹⁴⁶ Au a tagi vei iko; mo vakabulai au, meʼu vakabauta kina na nomu vosa.

¹⁴⁷ Au a souta na tagi vei iko ni sa bera ni kida na mataka: au a namaka na nomu vosa.

¹⁴⁸ Sa liu na mataqu a sa bera na veitiki ni bogi, meʼu vakanananu ki na nomu vosa.

¹⁴⁹ Mo rogoca na domoqu, me vaka na nomu yalololoma: i Jiova, mo vakaukauwataki au me vaka na nomu vosa.

¹⁵⁰ Era voleka mai ko ira era muria nai lawaki ca: era sa yawa ki na nomu vunau.

¹⁵¹ Ko sa voleka, Jiova; a sa dina na nomu vunau kecega.

¹⁵² E navuku ni nomu vunau, au sa kila makawa ni ko a vakataudeitaka me tawa oti rawa.

RESI.

RESI.

¹⁵³ Mo raica na noqu rarawa, ka vakabulai au: niʼu sa sega ni guilecava na nomu vunau.

¹⁵⁴ Mo vosa e na vukuqu, ka vakabulai au: mo vakaukauwataki au mo vaka na nomu vosa.

¹⁵⁵ Sa yawa vei ira nai valavala ca na bula: ni ra sa sega ni qara na nomui lesilesi.

¹⁵⁶ Sa vuqa na nomui valavala loloma, Jiova: mo vakaukauwataki au me vaka na nomu lewa.

¹⁵⁷ Era lewe vuqa era sa vakacacani au, a sa noqu meca; ia kaʼu sa sega ni lako vakatani ki na nomu vosa.

¹⁵⁸ Au a raici ira na daube, a sa rarawa; e na vuku ni ra sa sega ni vakabauta na nomu vosa.

¹⁵⁹ Mo raica na noqu loloma ki na nomui vakaro: mo vakaukauwataki au, Jiova, me vaka na nomu yalololoma.

¹⁶⁰ Sa dina mailiu sara na nomu vosa: a sa tawa mudu rawa e dua na nomu lewa dodonu.

SINI.

SINI.

¹⁶¹ Era sa vakacacani au walega na turaga: ia ka sa rerevaka na nomu vosa na lomaqu.

¹⁶² Kaʼu sa rekitaka na nomu vosa, me vaka e dua sa kunea nai yau levu.

¹⁶³ Au sa cata ka vakasisilataka na lasu: ia na nomu vunau kaʼu sa lomana.

¹⁶⁴ E vakavitu e na veisiga na noqu vakavinavinaka vei iko e na vuku ni nomu lewa dodonu.

¹⁶⁵ A ka levu na nodra vakacegu era lomana na nomu vunau: a sa sega na ka me ra bale kina.

¹⁶⁶ I Jiova, kaʼu sa namaka na bula maivei iko, a sa daucakava na nomu vunau.

¹⁶⁷ A sa vakabauta na nomu vosa na yaloqu; ia kaʼu sa lomana vakalevu.

¹⁶⁸ Au sa dauvakabauta na nomui vakaro kei na nomu vosa: ni sa tu e mataqu na nomu sala kecega.

TAU.

TAU.

¹⁶⁹ Me yaco ki na matamu na noqu tagi, Jiova: mo vakavukui au me vaka na nomu vosa.

¹⁷⁰ Me curu ki na matamu na noqu vakamamasu: mo vakabulai au me vaka na nomu vosa.

¹⁷¹ Ena cavuta na vakavinavinaka na tebenigusuqu, ni ko sa vakavulici au oti e na nomui lesilesi.

¹⁷² Ena vosataka na nomu vosa na yamequ: ni sa dodonu na nomu vunau kecega.

¹⁷³ Me vukei au na ligamu; niʼu sa digitaka oti na nomui vakaro.

¹⁷⁴ Au sa daudomona na bula maivei iko, Jiova; au sa rekitaka talega na nomu vunau.

¹⁷⁵ Me bula na yaloqu, me vakavinavinaka vei iko; ia me vukei au na nomu lewa.

¹⁷⁶ Au sa daulako sese me vaka na sipi sa yali; mo qara na nomu tamata; niʼu sa sega ni guilecava na nomu vunau.