NA SAME 109 - AI VOLA TABU

Sa tukuna ko Tevita na nona meca, 1-20; ka masu vua na Turaga, 21-31.

Vua na Domo-ni-meke. A Meke i Tevita.

¹ MO kakua ni galu, na Kalou kaʼu dauvakavinavinaka kina;

² ni sa dalaga vei au na gusudra nai valavala ca kei na gusudra na dauveivakaisini: era sa vosataki au e na yame lasu;

³ Era sa voliti au e na vosa veicati; ka veivala walega kei au.

⁴ Era sa noqu meca mei sau ni noqu loloma: ia koi au, kaʼu masu ga.

⁵ Era sa vakasuka mai na ka ca mei sau ni ka vinaka, kei na yaloca mei sau ni noqu loloma.

⁶ Mo lesia na tamata ca me lewai koya: ia me tu mai na ligana i matau ko Setani.

⁷ Ni sa lewai ko koya, me vakacalai ga: ia mei valavala ca ga na nona masu.

⁸ Me kakua ni vuqa na nona siga; ia me dua tani me taura na nona cakacaka.

⁹ Me kakua ni vakatamani na luvena, me alewa dawai talega na watina.

¹⁰ Me luveniyali voli na luvena ka vosai kedra: me ra qara kedra mai na nodra vanua dausiga.

¹¹ Me kauta tani na nona ka kecega na daukove; ia me ra betiraka na nona cakacaka na kai tani.

¹² Me kakua e dua me yalololoma vua: ia me kakua e dua me lomana na luvena sa luveniyali.

¹³ Me kawaboko na nona kawa; ia e nai tabatamata emuri me bokoci laivi na yacadra.

¹⁴ Me nanuma ko Jiova na nodra tawa dodonu na tamana; ia me kakua ni bokoci nai valavala ca i tinana.

¹⁵ Me tu ga e na mata i Jiova e na veisiga, me muduka tani mai vuravura na ka era nanumi kina.

¹⁶ E na vuku ni sa tawa nanuma ko koya me ia na cakacaka loloma, a sa vakacacana ga na tamata sa rarawa ka dravudravua, me mokuta sara na tamata sa kavoro na yalona.

¹⁷ Ni sa vinakata na ruru, sa yaco ga vua: ni sa sega ni vinakata na vosa vinaka, sa yawa sara vakakina vua.

¹⁸ Ni sa vakasulumi koya e na ruru me vaka e nai sulu, sa curuma na ketena me vaka na wai, kei na suina me vaka na waiwai.

¹⁹ Me vaka vua nai sulu sa ubi kina, kei nai vau ni sulu sa vauci tiko kina ko koya.

²⁰ Me cakacaka vakaoqo ko Jiova vei ira na noqu meca, kei ira era vosacataka na yaloqu.

²¹ Ia ko iko, Jiova na Kalou, mo cakacaka e na vukuqu, e na vuku ni yacamu: ni sa yaga na nomu yalololoma, mo vakabulai au.

²² Niʼu sa malumalumu ka dravudravua, a sa vuetaki e lomaqu na yaloqu.

²³ Au sa lako yani me vaka na yaloyalo ni sa kala na siga: au sa veikauyaki me vaka na vodre.

²⁴ Sa malumalumu na duruqu e na daulolo; a sa uru na yagoqu.

²⁵ Au a vosacataki talega vei ira: ni ra raici au era kurea na uludra.

²⁶ Mo vukei au, Jiova na noqu Kalou; mo vakabulai au me vaka na nomu yalololoma:

²⁷ me ra kila ni sa ligamu ga o qo; ni sai iko, Jiova, sa cakava.

²⁸ Me ra ruru ko ira, ia mo vosa vinaka: ni ra tu cake, me ra vakamaduataki; ia me reki ga na nomu tamata.

²⁹ Me ra vakaisulutaki e na madua na noqu meca, ia me ra solei tutuvi e na ka era madua kina, me vaka e nai sulu.

³⁰ Au na vakavinavinaka vakalevu vei Jiova e na gusuqu; io, kaʼu na meke vua e na kedra maliwa na lewe vuqa.

³¹ Ni na tu ko koya mai na liga i matau ni dravudravua, me vakabulai koya maivei ira era sa cudruvi koya.