NA SAME 106 - AI VOLA TABU

Me ia na vakavinavinaka vua na Turaga, 1-3. Sa masu, 4-5. A nodra ca na qase i eliu, kei na loloma ni Kalou, 6-46. Sa masu ka vakavinavinaka, 47, 48.

¹ DOU ia vei Jiova na vakavinavinaka. Dou vakamolimoli vei Jiova; ni sa yalovinaka; ni sa tawa mudu na nona loloma.

² O cei sa cavuta rawa na cakacaka kaukauwa i Jiova? o cei sa rogotaka rawa na nona vinaka kecega?

³ Sa kalougata ko ira era vakabauta na lewa dodonu, kei koya sai valavala dodonu e na gauna kecega.

⁴ Mo nanumi au, Jiova, e na loloma ko sa daulomani ira kina na nomu tamata: mo lako mai vei au ka vakabulai au;

⁵ meʼu kunea na kedra vinaka na tamata ko sa digitaka, meʼu marau e na nodra marau na nomu matanitu, meʼu lagilagi vata kei ira na nomui votavota.

⁶ Keimami sa caka cala vata kei ira na neimami qase, keimami sa caka ka tawa dodonu, keimami sai valavala ca.

⁷ Era a sega ni kila na nomu cakacaka mana na neimami qase mai Ijipita; era sega ni nanuma na kena levu ni nomu loloma; a ra sa vakacudrui koya mai na wasawasa, ia mai na Wasa Damudamu.

⁸ Ia ka sa vakabulai ira ga ko koya e na vuku ni yacana, me vakatakila kina ko koya na nona kaukauwa.

⁹ A sa vunauca na Wasa Damudamu ko koya, a sa maca mai: a sa tuberi ira ko koya e loma ni wai titobu, me vaka mai lekutu.

¹⁰ A sa vakabulai ira mai na liga i koya sa cati ira, ia ka vakabulai ira mai na liga ni meca.

¹¹ A sa luvuca na nodra meca na wai: sa sega e dua vei ira sa vo.

¹² Era sa qai vakabauta na nona vosa; era meketaka vua na vakavinavinaka.

¹³ Era sa guilecava vakasauri na nona cakacaka; era sega ni waraka na nona vosa:

¹⁴ ka ra garogaro vakalevu ga mai na lekutu, ka vakatovolea vakaca na Kalou mai na veikau,

¹⁵ A sa solia vei ira ko koya na ka era kerea; a sa tala na tutue ki na yalodra.

¹⁶ A ra sa vuvutaki Mosese e nodrai tikotiko, kei Eroni na tamata yalododonu i Jiova.

¹⁷ Sa kasei na vanua ka tilomi Tacani, ka ubia na mataqali i Epirami.

¹⁸ A sa waqa mai e dua na buka e na nodrai soqosoqo; sa vakamai ira nai valavala ca na yameyame ni buka.

¹⁹ Era sa cakava e dua na luve ni karavau mai Orepi, ka soro ki na matakau sa waicalataki me buli.

²⁰ A ra sa vukica na nodrai ukuuku, me tautauvata kei na karavau sa daukana co.

²¹ A ra guilecava na Kalou na nodrai vakabula, o koya ka kitaka na ka levu mai Ijipita;

²² na ka mana e na vanua i Ami, kei na ka rerevaki mai na Wasa Damudamu.

²³ A sa kaya kina me vakarusai ira, kevaka e sega ni tu e matana e na kedra maliwa ko Mosese na nona digitaki, me saumaka tani na nona cudru, me kakua ni vakarusai ira.

²⁴ Io, era a vakasisilataka na vanua domoni, era sega ni vakabauta na nona vosa:

²⁵ a ra sa didi e nodra veivale, ka sega ni vakarorogo ki na domo i Jiova.

²⁶ O koya sa dodoka kina na ligana vei ira, me vakabalei ira mai lekutu:

²⁷ me vakabalea talega na nodra kawa e na veimatanitu, ka dui vakasevi ira e na veivanua.

²⁸ Era sa vakabauti Peali-Piori talega, ka kania nai madrali vei ira na mate.

²⁹ A ra sa vakararawataki koya e na nodrai valavala: a sa tauvi ira na mate dauveiveitauvi.

³⁰ Sa qai tu cake ko Finiasi, ka cudruvi ira: a sa mudu kina na mate vei-veitauvi.

³¹ A sa nanumi me nonai valavala dodonu ki nai tabatamata kecega e tawa mudu.

³² Era sa vakacudrui koya talega mai na wai ni dauvere, a sa ca kina ko Mosese e na vukudra:

³³ ka ni ra sa vagagataka na yalona, a sa vosa cala kina na tebenigusuna.

³⁴ Era sa sega ni vakarusa na veimatanitu, ka vosa kina vei ira ko Jiova:

³⁵ a ra sa laʼki tiko vata kei ira na lewe ni vanua, ka vulica na nodrai valavala.

³⁶ A ra sa qarava na nodra matakau: a ra sa tacori kina.

³⁷ Io, era a cabora na luvedra tagane kei na luvedra alewa ki na tevoro,

³⁸ ka liviraka na dra tawa cala, io na kedra dra na luvedra tagane kei na luvedra alewa, o ya era cabora ki na matakau ni Kenani: a sa vakasisilataki na vanua e na vuku ni dra.

³⁹ Era sa dukadukali vakaoqo e na nodra cakacaka, ka laʼki dauyalewa e na nodrai valavala ca.

⁴⁰ A sa waqa kina na cudru i Jiova vei ira na nona tamata, a sa cata kina na nonai votavota.

⁴¹ A sa soli ira ki na ligadra na veimatanitu; a sa lewai ira ko ira sa cati ira.

⁴² A sa vakasaurarataki ira ko ira na nodra meca, a ra sa vakamalumalumutaki ki na ligadra.

⁴³ Sa vakabulai ira vakavuqa ko koya; ia ko ira, era sa dauvakacudrui koya e na ka era bosea, a ra sa vakamalumalumutaki e na vuku ni nodrai valavala ca.

⁴⁴ Ia ka sa raica ga ko koya na nodra rarawa, ni sa rogoca na nodra tagi:

⁴⁵ a sa nanuma e na vukudra na nona veiyalayalati, ka veivutuni me vaka na kena levu ni nona yalololoma:

⁴⁶ a sa cakava me ra lomani vei ira kecega era sa vakabobulataki ira.

⁴⁷ Mo vakabulai keimami, Jiova na neimami Kalou, ka soqoni keimami vata maivei ira na veimatanitu, me keimami ia kina na vakavinavinaka ki na yacamu tabu, me daureki talega e na vakavinavinaka vei iko.

⁴⁸ Me vakarokorokotaki ko Jiova; na nodra Kalou na Isireli mailiu sara ka yacova na gauna ena tawa mudu: ia me ra vakaemeni na tamata kecega. Dou ia vei Jiova na vakavinavinaka.