NA SAME 103 - AI VOLA TABU

Me da vakavinavinaka sara vua na Kalou ni sa vakabulai keda, 1-13, ka sa tawa mudu na nona loloma, 14-22.

A Meke i Tevita.

¹ MO vakavinavinaka vei Jiova, na yaloqu; ia na ka kecega sa tu e lomaqu me vakavinavinaka ki na yacana tabu.

² Mo vakavinavinaka vei Jiova, na yaloqu, ia mo kakua ni guilecava na nona ka ni loloma kecega:

³ O koya sa bokoca na nomui valavala ca kecega, o koya sa vakabulai iko mai na nomu mate kecega;

⁴ o koya sa vakabulai iko mai na rusa; o koya sa vakaisalataki iko e na loloma kei nai valavala loloma sara;

⁵ o koya sa vakamamautaka na gusumu e na ka vinaka; sa vakavoutaki na nomu cauravou me vaka na nona na ikeli.

⁶ Sa kitaka ko Jiova na ka dodonu kei na lewa vinaka e na vukudra kecega era sa vakasaurarataki.

⁷ Sa vakatakila ko koya na nonai valavala vei Mosese, kei na nona cakacaka vei ira na luve i Isireli.

⁸ Sa yalololoma ko Jiova ka daulomasoli, sa daubera ni cudru, ka daulevu na nona yalololoma.

⁹ Ena sega ni ia tikoga na veivunauci: ena sega ni vakabauta tikoga na nona cudru.

¹⁰ Sa sega ni cakacaka vei keda me vaka na nodai valavala ca; sa sega talega ni cudruvi keda me vaka na nodai valavala tawa dodonu.

¹¹ Ni sa vaka na kena cecere ki vuravura ko lomalagi, sa vakakina na kena levu ni nona yalololoma vei ira era sa rerevaki koya.

¹² Me vaka na kena yawa na vanua e cadra kina na siga ki na vanua e dromu kina na siga, sa vakayawataka ko koya vakakina vei keda na nodai valavala ca.

¹³ Me vaka sa lomana na luvena na tamata, sa lomani ira, vakakina ko Jiova era sa rerevaki koya.

¹⁴ Ni sa kila ko koya na nodai bulibuli; sa nanuma ga ni da sa kuvu-ni-soso.

¹⁵ Ia na tamata, sa vaka na co na nona siga: me vaka na se ni kau ni vanua, sa se ka beta ka vakakina.

¹⁶ Ni sa liwara na cagi, a sa yali; a sa sega ni kunei koya tale na nona yasana.

¹⁷ Ia na yalololoma i Jiova sa mailiu sara ena tawa mudu talega vei ira era sa rerevaki koya, kei na nonai valavala dodonu, ki na luvedra na luvedra;

¹⁸ vei ira era sa vakabauta na nona veiyalayalati, kei ira era sa nanuma tiko na nona vunau me cakava.

¹⁹ Sa vakataudeitaka ko Jiova na nonai tikotiko vakaturaga mai lomalagi; a sa lewa na ka kecega na nona matanitu.

²⁰ Dou vakavinavinaka vei Jiova, na nona agilose, sa uasivi e na kaukauwa, a sa cakava na nona vunau, ni dou sa vakarorogo tiko ki na domo ni nona vosa.

²¹ Dou vakavinavinaka vei Jiova, na nona ka lewe vuqa; oi kemudou na nonai talatala, sa kitaka tiko na nona veitalia.

²² Dou vakavinavinaka vei Jiova, na nona cakacaka kecega, e na veiyasana kecega sa lewa kina ko koya: mo vakavinavinaka vei Jiova, na yaloqu.