NA SAME 102 - AI VOLA TABU

A masu ni tamata ni sa rarawa, ni sa luvu na lomana, a sa sovara yani na ka e rarawa kina e na mata i Jiova.

¹ MO rogoca, Jiova, na noqu masu, io me yacovi iko na noqu tagi.

² Kakua ni vunia vei au na matamu e na siga kaʼu sa rarawa kina; mo vakatu daligamu mai vei au: e na siga kaʼu kaci kina mo rogoci au vakasauri kina.

³ Ni sa oti wale na noqu siga me vaka na kubou, a sa waqa na suiqu me vaka na qilaiso.

⁴ Sa yaviti na lomaqu, ka malai me vaka na co; niʼu sa guileca ni kania na kequ kakana.

⁵ E na vuku ni domo ni noqu vutugu sa veikabi na suiqu kei na kuliqu.

⁶ Au sa vaka na belo ni veikau: au sa vaka na lulu ni lekutu.

⁷ Au sa vakatawa, ka sa vaka na sivaro ni sa tiko duaduaga mai na dela ni vale.

⁸ Era sa vosavakacacani au na noqu meca e na siga ka bogi; a ra sa vosavavakini vakaca vei au ko ira era sa vakalialiai au.

⁹ Kaʼu a kania kina na dravu me vaka na madrai, ka veiwakitaka na mequ wai kei na wai ni mataqu,

¹⁰ e na vuku ni ko sa levaci au ka cudruvi au: ni ko a laveti au cake, ka biuti au sobu.

¹¹ A noqu veisiga sa vaka na yaloyalo ni sa lumaluma na siga; ia kaʼu sa malai me vaka na co.

¹² Ia ko iko, Jiova, ena tawa mudu na nomu bula; kei na ka mo nanumi kina ena yacova nai tabatamata kecega.

¹³ O na tu cake, o na yalololoma ki Saioni: ni sa matata na gauna me lomani koya, io, na gauna ka loku sa matata.

¹⁴ Ni sa vinakata na kena vatu na nomu tamata, ka lomana na kena kuvu-ni-soso.

¹⁵ Era na rerevaka kina na yaca i Jiova na veimatanitu, kei na nonai ukuuku ko ira kecega na tui kei vuravura.

¹⁶ Ni na sa qai tarai Saioni ko Jiova, ena qai rairai mai e nonai ukuuku.

¹⁷ Ena goleva na nodra masu na luveniyali, ka sega ni beca na nodra masu.

¹⁸ Ena volai o qo me nodra nai tabatamata maimuri; a ra na vakavinavinaka vei Jiova ko ira na mataqali ena buli mai.

¹⁹ Ni sa rai sobu mai na nona yasana tabu e cecere; sa raici vuravura ko Jiova mai lomalagi;

²⁰ me vakarorogo ki na vutugu i koya sa vesuki, me sereki ira era lewai me mate;

²¹ me tukuni mai Saioni na yaca i Jiova, kei na nona vinaka mai Jerusalemi;

²² ni ra sa qai soqoni vata na veimataqali kei na veimatanitu, me qaravi Jiova.

²³ Sa vakamalumalumutaka e na sala na noqu kaukauwa; sa vakalekalekataka na noqu siga ni bula.

²⁴ Kaʼu a kaya, Noqu Kalou, mo kakua ni kauti au tani e na veimama ni noqu bula; a nomu veiyabaki sa yacova nai tabatamata kecega.

²⁵ Mailiu sara ko a tauyavutaki vuravura: ia na cakacaka ni ligamu ko lomalagi:

²⁶ ena rusa o qori, ia ko iko, ko na tiko ga; ena madra kece talega mai o qori me vaka nai sulu; o na vakaisosomitaka me vaka nai tutuvi, ia ena vakaisosomitaki:

²⁷ ia ko iko ko sai iko tikoga, ena sega ni bau mudu na nomu veiyabaki.

²⁸ Era na tiko na luvedra na nomu tamata, ena vakataudeitaki talega e matamu na nodra kawa.