NA SAME 101 - AI VOLA TABU

Tevita cakacaka vakavuku ka dodonu vua na Kalou.

A Meke i Tevita.

¹ AU na meketaka na loloma kei na lewa dodonu; vei iko, Jiova, kaʼu na ia na meke.

² Au na cakacaka vakavuku e na sala savasava. O na lako mai vei au ninaica? au na lako voli e na noqu vale e na yalododonu.

³ Au na sega ni viritu e mataqu e dua na ka ca: au sa cata na nodrai valavala era sa vuki; ena sega ni kabiti au.

⁴ Ena lako tani vei au na yalotakelo: au na sega ni kila e dua na ka ca.

⁵ O koya sa kaseta vakavuni na kai nona, kaʼu na muduka laivi: o koya sa mata viavialevu, ka yaloviavialevu, kaʼu na sega ni vosota.

⁶ Ena raici ira na mataqu era yalodina e na vanua, me ra tiko kei au: o koya sa lako e na sala dodonu, ena qaravi au.

⁷ O koya sa daulasu na nonai valavala, ena sega ni tiko e loma ni noqu vale: o koya sa vosa lasu, ena sega ni tiko dei e mataqu.

⁸ Au na muduki ira kece tani vakasauri nai valavala ca ni vanua: meʼu vakaoti ira laivi kecega na daucaka cala mai na koro i Jiova.