Marika 4 - AI VOLA TABU

A vosa vakatautauvata ni daukabukaburaki, 1-20. Sa vakavulici ira na nona tamata ko Jisu me ra yaga, 21-25. A vosa vakatautauvata ni sila sa tubu vuni, kei na sore ni musita, 26-34. Sa kaya ko Jisu me ruru na cava, me maravu talega na wai, 35-41.

¹ A SA vakatekivu tale ko koya me vakatavuvuli e matasawa: a sa lewe vuqa sara era sa soqoni vata vua, a sa vodoka kina na waqa ko koya, ka tiko sobu kina e wai; a ra sa tu kecega na lewe vuqa e na matasawa.

² A sa vuqa na ka sa vakavulici ira kina ko koya e na vosa vakatautauvata, ka kaya vei ira e na nonai vakavuvuli:

³ Dou rogoca; Raica, sa dua na daukabukaburaki sa laʼki kaburaki:

⁴ a sa yaco, ni sa kabukaburaki lako, sa lutu e so e na tutu ni sala, a sa lako mai na manumanu ni lomalagi ka kania.

⁵ A sa lutu e so ki na vanua veivatu, sa sega ni levu kina na qele; a sa tubu cake vakasauri sara, ni sa sega ni vavaku na kena qele;

⁶ ia ni sa cabe na siga, sa malai; ia ni sa sega na wakana, sa raqosa sara.

⁷ A sa lutu e so ki na veiwa-vakavotona, a sa tubu cake na veiwa-vakavotona, ka vakaruguta, a sa sega kina ni vua.

⁸ A sa lutu e so ki na vanua vinaka, a sa vua vinaka ka tubu cake me levu; a sa vuai tolusagavulu e so, ka onosagavulu e so, ka drau e so.

⁹ A sa kaya vei ira ko koya, O koya sa vakadaligana me rogoca, me mani rogoca sara.

¹⁰ Ia ni sa tiko duaduaga ko koya, era sa tarogi koya e na vosa vakatautauvata ko iratou na tinikarua, kei ira era sa dautiko vata kaya.

¹¹ A sa kaya vei ira ko koya, Sa soli vei kemudou me kila na ka vuni ni matanitu ni Kalou: ia vei ira ga etautuba, sa caka na ka kecega e na vosa vakatautauvata;

¹² me ra raica tiko, ka sega ni kila; ia me ra rogoca tiko, ka lecava tu; de dua na siga era saumaki mai kina, ka bokoci na nodrai valavala ca.

¹³ Sa kaya talega vei ira, Dou sa sega ni kila na vosa vakatautauvata o qo, ne? ia dou na kila rawa vakaevei na vosa vakatautauvata kecega?

¹⁴ Sa kaburaka na vosa na daukabukaburaki.

¹⁵ Ia ko ira o qo era vaka na tutu ni sala, sa kaburaki kina na vosa; ia ni ra sa rogoca oti, sa qai lako vakasauri mai ko Satani, a sa kauta tani na vosa sa kaburaki e lomadra.

¹⁶ O ira talega o qo sa kaburaki ki na vanua veivatu: era rogoca na vosa, ka vakabauta vakasauri e na reki;

¹⁷ ia ka sega ga na wakana e lomadra, a ra sa tu dede vakalailai ga: ni sa tubu emuri na rarawa se na veivakacacani e na vuku ni vosa, era sa tarabe sara.

¹⁸ Ia ko ira o qo sa kaburaki ki na veiwa-vakavotona: o ira o qo era sa rogoca na vosa;

¹⁹ ia na lomaocaoca e na vuku ni vuravura o qo, kei nai yau e dauveivakaisini, kei na daugadreva na ka tani e so sa curu kina ka vakaruguta na vosa, a sa sega kina ni vua.

²⁰ Ia ko ira o qo sa kaburaki ki na vanua vinaka: era sa rogoca na vosa, ka vakabauta, ka vua, sa vuai tolusagavulu e so, ka onosagavulu e so, ka drau e so.

²¹ Sa kaya talega vei ira ko koya, Sa dua beka na cina sa kau mai, me virikoto e ruku ni vakarau ni sila, se ruku ni mocemoce, ne? e sega beka me virikoto e na kenai tutu?

²² Ni sa sega na ka e tabogo, me sega ni vakarairaitaki mai; se na ka sa vuni, me sega ni vakavotui.

²³ Kevaka e dua e vakadaligana me rogoca, me mani rogoca sara.

²⁴ Sa kaya talega vei ira, Dou qarauni kemudou e na ka dou rogoca; ai vakarau dou na vakarautaka, ena vakarautaki vei kemudou: ena soli vakalevu talega vei kemudou sa rogoca.

²⁵ Ni sa dua na ka ke sa tu vua na tamata, ena qai soli vua; ia ke sa sega ni tu vua na tamata e dua na ka, ena qai kau tani mai vua na ka sa tu vua.

²⁶ Sa kaya talega ko koya, Sa tautauvata na matanitu ni Kalou, kei na tamata sa laʼki kaburaka na sila ki na qele;

²⁷ a sa moce ka tu cake, e na bogi kei na siga, a sa rovu na sila ka tubu cake, a sa sega ni kila ko koya na kenai valavala.

²⁸ Ni sa vua vakai koya ga na qele; sa liu mada na buroro, sa tarava na sola, a sa qai muri na vuana e matua e na sola.

²⁹ Ia ni sa matua mai na vuana, sa qai vakacuruma ko koya nai sele takelo, ni sa cava na yabaki.

³⁰ A sa kaya ko koya, Tou na vakatautauvatataka na matanitu ni Kalou kei na cava? se cava na ka vakaibalebale me da vakatautauvatataka kina?

³¹ Sa vaka e dua na sore ni musita, a ya, ni sa tei e na qele, sa lailai sobu vei ira kecega na sore ni kau e na qele:

³² ia ni sa tei, sa tubu cake, a sa yaco me levu cake vei ira kecega na kau lalai, a sa vakatabana vakaidina, a sa ro rawa na manumanu ni lagi e na kena rurugu.

³³ A sa vuqa na vosa vakatautauvata vakaoqo sa tukuna kina ko koya na vosa vei ira, me vaka era sa rogoca rawa.

³⁴ A sa sega ni vosa walega vei ira, sa vosavakatautauvata tikoga; a sa vakatakila nai balebale ni ka kecega vei iratou na nona tisaipeli, ni ratou sa tiko vakai iratou.

³⁵ Ia e na siga ko ya, ni sa yakavi mai, sa kaya vei iratou ko koya, Tou lako yani ki tai kadua.

³⁶ Ia ni ratou sa vakatalai ira mada eliu na lewe vuqa, eratou sa kauti koya sara e na waqa ka sega ni bera. Ka so tale na waqa lalai era sa soko vata kaya.

³⁷ A sa tubu na cagi me cava levu, a sa seva na waqa na biau, a sa qai luvu kina.

³⁸ A sa tiko ko koya e na mua emuri, a sa moce e nai lokoloko; a ratou sa vakayadrata, ka kaya vua, Vakavuvuli, o sa wele beka ga ni datou sa mate?

³⁹ A sa tu cake ko koya, ka vunauca na cagi, a sa kaya ki na wai, Mo cegu, mo maravu mai. A sa ruru na cagi, a sa maravu levu mai.

⁴⁰ A sa kaya vei iratou ko koya, Dou sa rere vakaoqo e na vuku ni cava? e vakaevei ni sa sega na nomudou vakabauta?

⁴¹ A ratou sa rere vakalevu, a ratou sa veikainaka vakai iratou, O cei beka o qo, ni sa talairawarawa vua na cagi kei na wai?