Marika 14 - AI VOLA TABU

Sa bukiveretaki ko Jisu, 1, 2. Sa lumuti koya e dua na yalewa, 3-9. Sa volitaki koya ko Juta, 10, 11. Sa kania ko Jisu na solevu ni lako-sivia, 12-25. Sa tukuna ni ratou na dro na nona tisaipeli, ka cakitaki koya ko Petero, 26-31. Sa masu mai Kecisemani, 32-42. Sa soli koya ko Juta, a sa tauri koya ko ira na kai Jutia, 43-52. Era sa qai vakacacani koya, 53-65. Sa cakitaki koya ko Petero, 66-72.

¹ IA sa vo na bogi e rua me qai yaco na solevu ni lako-sivia kei na ka tawa-vakaleveni: a ra sa vakasaqara ko ira na bete levu kei ira na vu-ni-vola me ra lawakitaki koya me ra taura, ka vakamatea.

² A ra sa kaya, Me kakua ga ni sa ia na solevu, de ra ue kina na tamata.

³ Ia ni sa tiko ko koya mai Pecania e na vale i Saimoni na vukavuka, ni sa tiko me kana, sa lako mai e dua na yalewa sa taura e dua na tavaya alapasiteri ni waiwai, na narita dina, sa talei sara; a sa vorota na tavaya, ka livia ki na uluna.

⁴ A sa cudru sara e so vakai ira, ka kaya, Sa biu walega na waiwai o qo e na vuku ni cava?

⁵ ni sa rawarawa me volitaki o qo e na tola e vasagavulu ka vakacaca, ka soli vei ira na dravudravua. A ra sa vosavakacataka na yalewa.

⁶ A sa kaya ko Jisu, Laivi koya ga; dou sa saga e na vuku ni cava? sa cakava vei au e dua na cakacaka vinaka:

⁷ ni sa tiko vakadua kei kemudou ko ira na dravudravua; ia ni dou sa via cakava na ka sa yaga vei ira, sa rawarawa ga: ia koi au, kaʼu na sega ni tiko vakadua kei kemudou.

⁸ Sa kitaka ko koya na ka sa rawata: sa lako mai eliu ko koya me lumuta na yagoqu me bulu.

⁹ Au sa kaya vakaidina vei kemudou, E na veiyasana kecega e vuravura taucoko ena vunautaki kina nai tukutuku-vinaka o qo, ena bau tukuni talega kina na ka sa kitaka na yalewa o qo, me kenai divi.

¹⁰ Ia ko Juta Isikarioti, e dua vei iratou na lewe tinikarua, sa lako vei ira na bete levu, me soli koya vei ira.

¹¹ Ia ni ra sa rogoca, era sa reki, a ra sa yalayala me solia vua nai lavo. Sa qai vakasaqara ko koya na gauna e rawarawa me soli koya kina.

¹² Ia e nai matai ni siga ni ka tawu-vaka-leveni, ni ra sa vakamatea na ka sa ia kina na solevu ni lako-sivia, sa kaya vua ko iratou na nona tisaipeli, Evei na tikina ko sa vinakata me keitou lako kina me vakarautaka mo kania na solevu ni lako-sivia?

¹³ A sa lewe rua vei iratou na nona tisaipeli sa tala ko koya, ka kaya vei rau, Drau lako ki na koro, drau na qai sota kaya e dua na tamata sa colata e dua na saqa wai: muri koya;

¹⁴ ia na vale ena curu kina ko koya, drau kaya vua na kenai taukei, Sa taroga nai Vakavuvuli, Evei na tiki-ni-vale meʼu kania kina na solevu ni lako-sivia kei iratou na noqu tisaipeli?

¹⁵ Ena qai vakatakila vei kemudrau e dua na tikina levu ecake e na vale sa vakarautaki tu e nai yaya: drau vakarautaka kina na kedatou.

¹⁶ A rau sa lako yani na nona tisaipeli, ka yaco ki na koro; a rau sa kunea me vaka ka kaya vei rau ko koya: a rau sa vakarautaka na solevu ni lako-sivia.

¹⁷ Ia ni sa yakavi mai, sa lako mai ko koya kei iratou na tinikarua.

¹⁸ Ia ni ratou sa tiko ka kana tiko, sa kaya ko Jisu, Au sa kaya vakaidina vei kemudou, ni na soli au yani e dua vei kemudou sa kana vata kei au.

¹⁹ A sa vakatekivu me rarawa na lomadratou, ka kaya ko iratou yadua vei koya, Oi au beka? ka dua tale, Oi au beka?

²⁰ A sa vosa ko koya, ka kaya vei iratou, E dua vei kemudou na lewe tinikarua, o koya sa tonidromuca vata kei au na kena e na bilo.

²¹ Sa lako na Luve ni tamata, me vaka sa volai e na vukuna: ia ka ca vua na tamata koya sa solia yani na Luve ni tamata! ke sa sega ni sucu mai na tamata ko ya, ke sa vinaka vua.

²² Ia ni ratou sa kana tiko, sa taura na madrai ko Jisu, ka vatonaka, ka dovia, ka solia vei iratou, ka kaya, Taura, kania: o qo na yagoqu.

²³ Sa qai taura na bilo ko koya, ia ni sa vakavinavinaka oti, sa solia vei iratou; a ratou sa gunu kece kina.

²⁴ A sa kaya vei iratou, Sa noqu dra o qo ni veiyalayalati vou, a ya sa sova e na vukudra e lewe vuqa.

²⁵ Au sa kaya vakaidina vei kemudou, Au na sega ni gunuva tale na vua ni vaini, ka malua me yaco mada na siga kaʼu na gunuva vou kina e na matanitu ni Kalou.

²⁶ Ia ni ratou sa sere oti, eratou sa lako yani ki na ulu-ni-vanua ni veiolive.

²⁷ A sa kaya vei iratou ko Jisu, Dou na tarabe kecega e na vukuqu e na bogi edaidai; ni sa volai, Au na yavita nai vakatawa ni sipi, ka ra na dui vakasesei na qele ni sipi.

²⁸ Ia ni kaʼu sa tu cake tale oti mai, au na qai liutaki kemudou ki Kalili.

²⁹ Sa qai kaya vua ko Petero, Kevaka ena tarabe ko ira kecega, oi au, kaʼu na segai.

³⁰ A sa kaya vua ko Jisu, Au sa kaya vakaidina vei iko, E na siga o qo, e na bogi ga edaidai, ni sa sega ni tagi mada vakarua na toa, o na cakitaki au vakatolu.

³¹ Sa qai kaya vakaukauwa cake mai ko koya, Kevaka edaru na mate vata, au na sega sara ni cakitaki iko. Sa kaya vaka talega kina ko iratou kecega.

³² A ratou sa lako ki na dua na yasana na yacana ko Kecisemani: a sa kaya ko koya vei iratou na nona tisaipeli, Dou tiko ga eke, meʼu masu mada.

³³ A sa kauti Petero vata kaya ko koya, kei Jemesi kei Joni, a sa vakatekivu me kidacala sara, ka yaluma sara.

³⁴ A sa kaya vei iratou ko koya, Sa rarawa vakalevu na yaloqu, me vaka na mate; dou tiko ga eke, ka vakatawa.

³⁵ A sa lako vakalailai vaka kiliu ko koya, a sa bale ki na soso, a sa masu, kevaka e rawarawa, me lako tani na gauna ko ya vei koya.

³⁶ A sa kaya, Apa, Tamaqu, sa rawarawa vei iko na ka kecega; kauta tani vei au na bilo o qo; ia me kakua ga ni vaka na noqu veitalia, me vaka ga na nomu.

³⁷ A sa lako tale mai, ka kunei iratou ni ratou sa moce tu, a sa kaya vei Petero, Saimoni, o sa moce, ne? o sa sega ni rawata me vakatawa ka dua bauga na tiki-ni-bogi, ne?

³⁸ Dou vakatawa ka masu, me kakua ni rawai kemudou na vere: e dina ya ni sa gu na yalo, ia na yago sa malumalumu.

³⁹ A sa lako tani tale ko koya, ka masu, a sa cavuta tale na vosa ko ya.

⁴⁰ Ia ni sa lesu tale mai, sa kunei iratou ni ratou sa moce tale, (ni sa bibi na matadratou,) a ratou sa sega ni kila e dua na ka me ratou kaya vua.

⁴¹ A sa lako tale vakatolu mai, a sa kaya vei iratou, Dou qai moce ga, ka dou cegu; sa levu ga, sa yaco na gauna: raica, sa soli yani na Luve ni tamata ki na ligadra na tamata ca:

⁴² tu cake, me datou lako; raica, sa voleka mai ko koya sa soli au yani.

⁴³ Ia ni sa vosa tiko ko koya, sa lako sara mai ko Juta, e dua vei iratou na tinikarua, kei ira vata kaya e lewe vuqa sara era sa taura e so nai seleiwau kei nai wau, maivei ira na bete levu kei ira na vu-ni-vola kei ira na qase.

⁴⁴ Ia ko koya sa soli koya yani sa cavuta oti vei ira e dua nai vakatakilakila, ka kaya, O koya kaʼu na reguca, sai koya; taura, ka kauta vinaka yani.

⁴⁵ Ia ni sa tadu ko koya, sa lako sara vua, a sa kaya, Vakavuvuli, vakavuvuli: a sa reguca.

⁴⁶ A ra sa qai kauti koya, ka taura matua.

⁴⁷ A sa dua vei iratou sa tu voleka sa ucuna na nonai seleiwau, a sa yavita na nona tamata na bete levu, a sa seledrutia na daligana.

⁴⁸ A sa tarogi ira ko Jisu, ka kaya, Dou sa lakova beka mai e dua na daubutako, ni dou sa taura e so nai seleiwau kei nai wau, mo dou tauri au, ne?

⁴⁹ Au a tiko voli vata kei kemudou e na veisiga e na vale ni soro ka vakatavuvuli, ia dou a sega ni tauri au: ia nai Vola ena vakayacori ga.

⁵⁰ Sa qai biuti koya ko iratou kecega, ka dro.

⁵¹ A sa muri koya e dua na cauravou, a sa ovici na yagona e nai tutuvi matailalai; a ra sa taura ko ira na cauravou:

⁵² a sa biuta nai tutuvi ko koya, ka dro tani ni sa luvawale.

⁵³ A ra sa kauti Jisu vua na bete levu: a ra sa soqoni vata kaya ko ira kecega na bete levu kei ira na qase kei ira na vu-ni-vola.

⁵⁴ A sa muri koya vakayawa ko Petero, ka yaco sara ki na vale ni bete levu; a sa tiko sobu vata kei ira nai talatala kei ira na vada, ka tatalai e na buka.

⁵⁵ Ia ko ira na bete levu, kei ira kecega na mataveilewai, era vakasaqara e so me ra beitaki Jisu, me mate kina ko koya; a ra sa tawa kunea:

⁵⁶ ni ra sa lewe vuqa sa beitaka vakailasu, a sa sega ni lako vata na veibeitaki.

⁵⁷ Sa qai tu cake e so, a ratou sa beitaka vakailasu, ka kaya,

⁵⁸ Keitou sa rogoci koya ni sa kaya, Au na basuka na vale ni soro o qo sa caka e na liga, ia kaʼu na tara e dua tale sa sega ni caka e na liga, e na bogi e tolu.

⁵⁹ A sa sega ni lako vata talega ua nodratou veibeitaki.

⁶⁰ Sa qai tu cake na bete levu e na kedra maliwa, ka tarogi Jisu, ka kaya, Sa sega na ka ko kaya mai, ne? a cava o qo eratou sa beitaki iko kina ko iratou o qo?

⁶¹ A sa galu tu ga ko koya, ka sa sega na ka sa kaya. Sa tarogi koya tale na bete levu, ka kaya vua, O iko beka na Karisito, na Luve i Koya sa nona na vakarokoroko, se segai?

⁶² A sa kaya ko Jisu, Oi au: ia dou na raica na Luve ni tamata ni sa tiko e na liga i matau i Koya sa kaukauwa, ni sa lako talega mai e na veio ni lomalagi.

⁶³ Sa qai dresulaka na nonai sulu na bete levu, ka kaya, Sa yaga tale vakacava me so na dauveibeitaki?

⁶⁴ dou sa rogoca ga na vosavakacacataka na Kalou; a cava dou lewa? A ra sa lewai koya kecega, ni sa dodonu me vakamatei.

⁶⁵ A ra sa vakatekivu e so me kasivita, ka tabonaka na matana, ka vaculaka, ka kaya vua, Tukuna mai se ko cei; a ra sa sabica ko ira nai talatala.

⁶⁶ Ia ka sa tiko era ko Petero e na rara ni vale, a sa lako mai e dua na nona vada na bete levu;

⁶⁷ ia ni sa kunei Petero ni sa tatalai, sa vakaraici koya, ka kaya, O iko talega sa tiko vata kei Jisu na kai Nasareci.

⁶⁸ A sa cakitaka ko koya, ka kaya, Au sa sega ni kila, au sa lecava tu na ka ko sa kaya. A sa qai lako yani kivaka ki na katuba; a sa tagi na toa.

⁶⁹ A sa raici koya tale na vada, a sa vakatekivu me vosa vei ira sa tu voleka, E dua vei ira ko koya o qo.

⁷⁰ A sa cakitaka tale ko koya. A sa dede vakalailai ga, a ra sa kaya vei Petero ko ira sa tu voleka, Sa dina ga ni sa dua vei ira ko iko; ni ko sa kai Kalili, a sa vakakina na nomu vosa.

⁷¹ Sa qai vakatekivu ko koya me ruru ka bubului, ka vaka, Au sa sega ni kila na tamata ko ya dou sa vosataka.

⁷² Sa qai tagi vakarua na toa. Sa qai nanuma ko Petero na vosa ka kaya vua ko Jisu, Ni sa sega ni tagi mada vakarua na toa, o na cakitaki au vakatolu. Ia ni sa vakasama, sa tagi.