Marika 13 - AI VOLA TABU

Sa vakatakila ko Jisu na ca ena yaco ki Jerusalemi, kei na veika era na vosota ko ira sa dautukuna na lotu, 1-13; kei na ca ena yaco vei ira na kai Jutia, 14-23. Sa qai tukuna na nona lako mai me ia na veilewai, 34-37.

¹ IA ni sa lako tani ko koya e na vale ni soro, sa dua vei iratou na nona tisaipeli sa kaya vua, Vakavuvuli, raica, na veivatu, kei na veivale, sa rai vakaevei!

² A sa vosa ko Jisu, ka kaya vua,

⁰ sa raica na veivale lelevu o qori, ne? ena sega ni vo na vatu me veitaqataqai, me kakua ni talaraki sobu.

³ Ia ni sa tiko ko koya mai na ulu-ni-vanua ni veiolive sa donuya na vale ni soro, eratou sa vakatarogi koya lo ko Petero kei Jemesi kei Joni kei Adriu,

⁴ Tukuna mai vei keitou, se na yaco ninaica na veika o qo; ia ka cava na kenai vakatakilakila ni sa kolai yaco na ka kecega o qo.

⁵ Sa qai vosa vei iratou ko Jisu, ka vakatekivu me kaya, Raica vinaka de vakacalai kemudou e dua:

⁶ ni ra na lewe vuqa era na lako mai e na yacaqu, ka kaya, Sai au; ia ka lewe vuqa era na vakacala.

⁷ Ia ni dou na rogoca nai valu, kei nai rogorogo ni valu, dou kakua ni kidroa; ni sa kilikili me yaco; ia ka sa bera ga nai vakataotioti.

⁸ Ni na veibolebolei na vanua e so, kei na matanitu e so; ia ena yaco na tavuki ni vanua e na yasana e vuqa, ena yaco talega na dausiga kei na ca: o qo nai vakatekivu ga ni ka rarawa.

⁹ Ia dou raici kemudou vinaka: ni dou na soli yani ki na mataveilewai, kei na veivale ni lotu: dou na vakanakuitataki, dou na kau talega ki na matadra na turaga, kei ira na tui, e na vukuqu, mei vakadinadina vei ira.

¹⁰ Ia ena vunautaki dina mada eliu nai tukutuku-vinaka e na veivanua kecega.

¹¹ Ia ni dou sa kau yani, ka soli me lewai, dou kakua ni lomaocaoca kiliu se cava mo dou kaya, dou kakua talega ni vakanananu; ia na ka kecega ena soli vei kemudou e na tiki-ni-siga ko ya, a ya ga mo dou vosataka: ni dou sa sega ni vosa koi kemudou, a ya ga na Yalo Tabu.

¹² Ia era na dui soli ira yani na veitacini me vakamatei, kei na tamana na luvena; ia era na tu cake na gone vei ira na nodra qase, ka vakavuna na nodra mate.

¹³ Ia dou na cati vei ira na tamata kecega e na vuku ni yacaqu; ia ko koya ena vosota me yacova nai vakataotioti, ena vakabulai ko koya.

¹⁴ Ia ni dou sa raica ni sa tu e na yasana sa tabu ni tu kina na ka vakasisila sa dauveivakarusai, a ya sa vosa kina ko Tanieli na parofita, (me vakananuma ko koya sa wilika,) me qai dro ki na veiulu-ni-vanua ko ira era sa tiko e Jutia;

¹⁵ ia me kakua ni lako sobu ki vale ko koya sa tiko e delana, se curu kina, me kauta tani e dua na ka e na nona vale;

¹⁶ ia me kakua ni lesu tale ko koya sa tiko e na were, me kauta na nonai sulu.

¹⁷ Ka na ca vei ira sa bukete, kei ira era sa vakasucuma na gone, e na gauna ko ya!

¹⁸ Ia dou masu me kakua ni yaco na nomudou dro e na vula i liliwa.

¹⁹ Ni na yaco na ka rarawa e na gauna ko ya; sa sega ni vakakina mai nai vakatekivu ka ia kina na veibuli ko na Kalou ka yacova na siga o qo, ka na sega talega emuri.

²⁰ Ia kevaka sa sega ni vakalekalekataka na gauna ko ya na Turaga, sa sega na tamata me bula rawa: ia e na vukudra na digitaki, ko ira sa digitaka ko koya, sa vakalekalekataka ko koya na gauna ko ya.

²¹ Kevaka ena qai kaya vei kemudou e dua, Raica, eke na Karisito; se, Raica, maikea; kakua ni dinata:

²² ni na tubu mai na Karisito vakailasu e so, kei na parofita vakailasu e so, a ra na vakatakila mai na veivakatakilakila kei na veika e veivakidacalataki, me vakacalai ira kina na digitaki, kevaka e rawa.

²³ Ia dou raici kemudou vinaka: raica, au sa tukuna eliu vei kemudou na ka kecega.

²⁴ Ia e na gauna ko ya, ni sa oti mada na ka rarawa ko ya, ena qai vakabutobutotaki na mata-ni-siga; ena sega talega ni cila na rarama ni vula;

²⁵ ka na lutu mai na veikalokalo ni lomalagi, ka na veitosoyaki na veika kaukauwa ni lomalagi:

²⁶ ia era na qai raica na Luve ni tamata ni sa lako mai e na veio, e na kaukauwa levu kei nai ukuuku.

²⁷ Ena qai talai ira na nona agilose ko koya, ka vakasoqoni ira vata na nona digitaki mai na mata ni cagi e va, mai nai yalayala kei vuravura kei nai yalayala kei lomalagi.

²⁸ Mo dou kila mada na vosa vakatautauvata ni lolo: Ni sa qai lavovou na tabana, a sa tubu na drauna, dou sa kila kina ni sa voleka na vula i katakata:

²⁹ me vaka talega kina koi kemudou, ni dou sa raica ni sa yaco na veika o qo, dou kila ni sa voleka, io e katuba.

³⁰ Au sa kaya vakaidina vei kemudou, Ena sega ni takali mada nai tabatamata o qo, ena yaco eliu na ka kecega o qo.

³¹ Ena takali ko lomalagi kei vuravura; ia na noqu vosa ena sega ni takali.

³² Ia na siga ko ya kei na tiki-ni-siga ko ya sa sega e dua e kila, o ira na agilose mai lomalagi e segai, se na Luvena, a Tamaqu duaduaga.

³³ Dou raici kemudou vinaka; dou vakatawa, ka masu: ni dou sa sega ni kila na kena siga.

³⁴ Sa vaka e dua na tamata e lako ki na vanua tani, o koya sa biuta na nona vale, a sa lesia vei ira na nonai talatala me ra lewa, ka vei ira yadua na nodra cakacaka, a sa kaya vua nai vakatawa me vakatawa.

³⁵ O koya mo dou qai vakatawa: ni dou sa sega ni kila na tiki-ni-siga ena lako mai kina nai taukei ni vale; se e na yakavi, se na lomaloma-ni-bogi, se ni sa tagi na toa, se e na mataka;

³⁶ de lako vakasauri mai, ka kunei kemudou ni dou sa moce ga:

³⁷ ia na ka kaʼu sa kaya vei kemudou, kaʼu sa kaya vei ira kecega, Dou vakatawa.