Marika 1 - AI VOLA TABU

A WASE I. —Ai tukutuku kei Joni na dauveipapitaiso, 1-8. Sa papitaisotaki ko Jisu, 9-11. Sa dauveretaki, 12, 13. A sa qai vakatekivu me vunau, 14, 15. A sa kacivi Petero, kei Adriu, kei Jemesi, kei Joni, me ratou nona tisaipeli, a sa vakatavuvuli, 16-22. Sa vakabula e dua na tamata ka curumi koya e dua na tevoro, kei na tina ni wati i Petero, kei ira sa tauvi-mate era le vuqa, kei na vukavuka e dua, 23-45.

¹ AI vakatekivu ni tukutuku-vinaka kei Jisu Karisito, na Luve ni Kalou;

² me vaka na nodrai vola na parofita: Raica, au sa tala na noqui talatala me liu e matamu, o koya ena caramaka na nomu sala e matamu:

³ A domona e dua sa kacikaci e loma ni veikau, Dou caramaka na sala i Jiova, cakava me dodonu na nona veisalatu.

⁴ Sa dauveipapitaisotaki ko Joni e loma ni veikau, ka vakarota na nodra papitaiso era veivutuni me bokoci nai valavala ca.

⁵ A sa lako mai vua na vanua taucoko ko Jutia, kei ira na kai Jerusalemi, a sa papitaisotaki ira kecega ko koya e na uciwai ko Joritani, ni ra sa vakatusa na nodrai valavala ca.

⁶ A sa vakaisulu ko Joni e nai sulu vuti ni kameli, ka vauci na tolona e na wa kuli-ni-manumanu; a sa kania tiko na vodre kei na oni ni veikau.

⁷ A sa dauvunau, ka kaya, E dua sa muri au mai sa levu cake vei keirau, ia na wa ni nonai vava kaʼu sa sega ni yaga meʼu cuva sobu me sereka.

⁸ E dina kaʼu sa papitaisotaki kemudou e na wai: ia ena papitaisotaki kemudou ko koya e na Yalo Tabu.

⁹ A sa yaco e na gauna ko ya, sa lako mai Nasareci e Kalili ko Jisu, a sa papitai-sotaka ko Joni e na Joritani.

¹⁰ Ia ni sa cabe sara ko koya mai na wai, sa qai raici lomalagi ni sa wase rua, kei na Yalo ni sa lako sobu vua me vaka na ruve:

¹¹ a sa lako mai lomalagi e dua na domo: O iko na noqu Gone ni toko, au sa dauvinakati iko vakalevu.

¹² A sa vakauti koya vakasauri na Yalo ki na veikau.

¹³ A sa tiko maikea e loma ni veikau e na bogi e vasagavulu, a sa dauveretaki koya ko Satani; a sa tiko vata kei na manumanu tawa lasa; a sa qaravi koya ko ira na agilose.

¹⁴ IA ni sa biu oti ki na vale ni veivesu ko Joni, sa lako mai ki Kalili ko Jisu, a sa dauvunautaka nai tukutuku-vinaka ni matanitu ni Kalou,

¹⁵ ka kaya, Sa yaco na gauna, a sa voleka na matanitu ni Kalou; dou veivutuni, ka vakabauta nai tukutuku-vinaka.

¹⁶ A sa lako voli ko koya e na bati ni wai mai Kalili, a sa raici Saimoni kei Adriu na tacina, erau sa viritaka na lawa ki na wai: ni rau sa gonedau.

¹⁷ A sa kaya vei rau ko Jisu, Drau muri au mai, kaʼu na qisi kemudrau mo drau yaco me gonedau ni tamata.

¹⁸ A rau sa biuta saraʼni na nodrau lawa, ka muri koya.

¹⁹ Ia ni sa lako vakalailai ko koya vaka kiliu, sa raici Jemesi na luve i Sepeteo, kei Joni na tacina, erau sa tiko e na waqa ka oneva na lawa.

²⁰ A sa kacivi rau sara ko koya: a rau sa biuta na tamadrau ko Sepeteo e na waqa, kei iratou na tamata, ka muri koya.

²¹ A ratou sa lako ki Kaperinaumi; ia e na siga ni vakacecegu sa curu sara ko koya ki na vale ni lotu, ka vakatavuvuli.

²² A ra sa kidacala e na nonai vakavuvuli; ni sa vakatavulici ira me vaka e dua e kaukauwa vakai koya, ka sega ni vakataki ira na vu-ni-vola.

²³ A sa tiko e na nodra vale ni lotu e dua na tamata ka curumi koya e dua na yalo tawa-savasava; a sa qoqolou cake,

²⁴ ka kaya, Ule! a cava vei kedatou, i Jisu na kai Nasareci? o sa lako beka mai me rawai keitou? au sa kila se ko cei ko iko, na Yalosavasava ni Kalou.

²⁵ A sa vunauci koya ko Jisu, ka kaya, Mo galu ga, ka lako tani mai vua.

²⁶ Ia ni sa dresulaki koya na yalo tawa-savasava, ka qoqolou e na domo levu, sa qai lako tani vua.

²⁷ A ra sa kidacala kecega, ka vei tarogi kina vakai ira, ka kaya, A ka cava beka o qo? a cava beka nai vakavuvuli vou o qo? ni sa vosa vakaukauwa vakai koya ga ko koya vei ira na yalo tawa-savasava, a ra sa talairawarawa vua.

²⁸ A sa kuruvaki vakasauri na kenai rogorogo mai Kalili, e na yasana kecega sa voleka.

²⁹ Ia ni ratou sa lako tani e na vale ni lotu, eratou sa curu sara ki na vale i Saimoni kei Adriu, o iratou vata kei Jemesi kei Joni.

³⁰ A sa davo na tina ni wati i Saimoni ni sa tauvi-katakata, a ra sa tukuni koya sara vei koya.

³¹ A sa lako ko koya ka taura na ligana, ka vakaduria cake: a sa takali vakasauri na nona katakata, a sa qaravi iratou ko koya.

³² Ia ni sa yakavi mai, ni sa dromu na siga, sa kau mai vei koya ko ira kecega sa tauvi-mate, kei ira ka curumi ira na tevoro e so.

³³ A ra sa soqoni vata kecega na lewe ni koro e na mata ni katuba.

³⁴ A sa Vakabula ko koya na lewe levu sa vuqa na mate sa tauvi ira, ka vakasavi ira na tevoro e lewe levu; a sa sega ni laivi ira na tevoro me ra vosa, ni ra sa kilai koya.

³⁵ Ia ni sa mataka mai, sa tu cake ko koya ni sa bogi tu ga na vanua, a sa lako ki tautuba, a sa lako ki na dua na yasana lala, ka masu kina.

³⁶ A ratou sa muri koya ko Saimoni, kei iratou eratou sa tiko vata kaya.

³⁷ Ni ratou sa qai kunea, eratou sa kaya vua, Sa vakasaqarai iko na tamata kecega.

³⁸ A sa kaya vei iratou, Tou lako ki na Veikoro lalai sa voleka, meʼu vunau talega kina: ni sa ka ga o qo kaʼu sa lako mai kina.

³⁹ A sa dauvunau ko koya e na nodra veivale ni lotu mai Kalili taucoko, ka vakasavi ira tani na tevoro.

⁴⁰ A sa lako mai vei koya e dua na vukavuka, ka masuta, ka tekiduru vua, ka kaya vua, Kevaka ko sa vinakata, ko sa vakasavasavataki au rawa.

⁴¹ A sa yalololoma ko Jisu, ka dodoka na ligana, ka tarai koya, ka kaya vua, Au sa vinakata; mo savasava mai.

⁴² Ia ni sa vosa oti, sa takali vakasauri vua na vukavuka, a sa savasava mai.

⁴³ A sa vakarota matua vua ko koya, ka vakatala sara yani;

⁴⁴ a sa kaya vua, Raica, mo kakua ni tukuna vua e dua: ia mo laʼki vakatakilai iko vua na bete, ka vakacabora na ka sa vosa kina ko Mosese me nomui vakasavasavataki, mei vakatakilakila vei ira.

⁴⁵ A sa lako tani yani ko koya, ka vakatekivu me tukuna vakalevu, ka cacava-ka na ka, a sa dredre kina vei Jisu me curu votu ki na koro, a sa tiko ga e nai bili e na veiyasana lala: a ra sa lako mai na yasana kecega vei koya.