Malakai 4 - AI VOLA TABU

O koya na Kalou, ena cudruvi ira na tamata ca, 1, ka vakalougatataki ira era rerevaki koya, 2, 3. Sa vakaroti ira me vakabauta na vunau, 4, a sa tukuna na lako mai i Ilaija, kei na nona cakacaka, 5, 6.

¹ IA, raica, sa lako mai na siga ko ya, ena waqa me vaka na lovo; ia ko ira kece era viavialevu, kei ira yadua sa caka ca, era na vaka na vu-ni-sila: ia ena vakacaudrevi ira na siga ko ya sa lako mai, sa kaya ko Jiova ni lewe vuqa, me kakua kina ni vakalaivi vei ira na wakana se na tabana.

² Ia ena cadra mai vei kemudou sa rerevaka na yacaqu na Siga ni yalododonu, ia na veivakabulai ena kauta lako e na tabana; a dou na lako yani ka tubu cake me vaka na luve ni karavau e na loma ni bai.

³ Ia dou na butuqaqi ira na tamata ca; ni ra na dravusa e ruku ni qeteqete ni yavamudou e na siga kaʼu na cakava kina na ka o qo, sa kaya ko Jiova ni lewe vuqa.

⁴ Dou nanuma na vunau i Mosese na noqu tamata, a ya kaʼu a vakarota vua mai Orepi me nodra kecega na Isireli, io, nai lesilesi kei na lewa.

⁵ Raica, au na talai Ilaija na parofita vei kemudou eliu, ena qai lako mai emuri na siga i Jiova e levu ka rerevaki:

⁶ ia ena saumaka ko koya na lomadra na qase vei ira na gone, kei na lomadra na gone vei ira na nodra qase, deʼu lako mai ka yavita na vanua e na veivakarusai. Ai tinitini ni vola ni veiyalayalati makawa.