Malakai 3 - AI VOLA TABU

Sa parofisaitaki Joni na dauveipapitaiso nai talatala ni Mesaia, kei na nona cakacaka vakalou na Mesaia ni sa lako mai ko koya, 1-6. Sa tukuna na nodra daucaka cala vakalevu na kai Jutia, 7-15. Sa kalougata ko ira era rerevaka na Kalou, 16-18.

¹ RAICA, au na tala na noqui talatala, ena caramaka ko koya na sala e mataqu; ia ena vakidacala na nona lako mai ki na nona vale tabu na Turaga, o koya dou sa vakasaqara, io, nai talatala ni veiyalayalati, o koya dou sa rekitaka: raica, ena lako mai ko koya, sa kaya ko Jiova ni lewe vuqa.

² Ia ko cei me na rawata na siga ni nona lako mai? ia ko cei me na tu rawa ni sa raici mai ko koya? ni sai koya e vaka na nona buka na dausava koula, ka vaka na nodra vuso na dausavai sulu:

³ ia ena tiko ko koya me vakawaicalataka ka vakasavasavataka na siliva: ia ena vakasavasavataki ira na luve i Levi, ka savai ira me vaka na koula kei na siliva, me ra cabora vei Jiova nai madrali e dodonu.

⁴ Ena qai kamikamica vei Jiova na nodrai madrali na Juta kei na kai Jerusalemi, me vaka e na gauna eliu, ka vaka na veiyabaki makawa.

⁵ Ia kaʼu na toro voleka vei kemudou me ia na veilewai, ia kaʼu na kusarawa mai me tukuna na nodra ca na daucaka-mana lasu, kei na dauveibutakoci, kei na dau-vosavavakini vakailasu, kei ira era vakacacana na tamata voli ni sa voli, kei na alewa dawai, kei na luveniyali, kei ira era biliga tani na vulagi e na ka sa dodonu vua, a ra tawa rerevaki au, sa kaya ko Jiova ni lewe vuqa.

⁶ Ni sai au ko Jiova, kaʼu sa sega ni veivukiyaki; o koya o qo, oi kemudou na luve i Jekope, dou sa sega kina ni rusa.

⁷ IA mai na gauna ni nomudou qase dou sa lako tani ga mai na ka kaʼu sa lesia, ka sa sega ni vakabauta: dou lesu mai vei au, au na qai lesu yani vei kemudou, sa kaya ko Jiova ni lewe vuqa. Ia dou sa kaya, Me keitou lesu vakaevei?

⁸ E dua li na tamata me butakoci koya na Kalou? Ia dou a butakoci au. Ia dou sa kaya, Keitou a butakoci iko vakaevei? E nai sigana kei nai madrali.

⁹ E na veicudruvi ko ya dou sa cudruvi kina: ni sai au dou sa butakoca, io, na matanitu taucoko o qo.

¹⁰ Dou kauta kece mai nai sigana ki na lololo, me so kina na kakana e na noqu vale, ka vakatovolei au mada kina, sa kaya ko Jiova ni lewe vuqa, seʼu na dolava, se segai, na katuba ni lomalagi, ka sovaraka vei kemudou na ka ni veivakalougatataki, me na sautu wale sara.

¹¹ Ia e na vukumudou kaʼu na vunauca na dauvakacaca, me kakua ni vakacacana na vua ni nomudou qele; ena sega talega ni sewaruta na vua ni nomudou vaini e na were, sa kaya ko Jiova ni lewe vuqa.

¹² A ra na vosavakalougatataki kemudou na lewe ni veivanua kecega: ni dou na vanua rekitaki, sa kaya ko Jiova ni lewe vuqa.

¹³ DOU a vosavakaukauwataki au, sa kaya ko Jiova. Ia dou sa kaya, A vosa cava li keitou sa vosavakacacataki iko kina?

¹⁴ Dou a kaya, A ka tawa yaga na qarava na Kalou; ia nai yau cava sa noda kina ni da vakabauta na ka sa lesia ko koya, ni da sa lako vakaloloku voli talega e na mata i Jiova ni lewe vuqa?

¹⁵ Ia eda sa; qai cavuti ira me kalougata era viavialevu; me ra tamata yaco talega era daucaka ca; io, sa ra vakatovolea vakaca na Kalou, ka bula ga.

¹⁶ Sa ra qai veivosaki vakai ira na dau-rerevaki Jiova: a sa vakarorogo ko Jiova, ka rogoca, a sa volai e dua nai vola veiva-kananumi e matana me nodra era rerevaki Jiova, ka vakananuma na yacana.

¹⁷ A ra na noqu ga, sa kaya ko Jiova ni lewe vuqa, e na siga kaʼu na qai cakava kina na noqui yau talei; ia kaʼu na lomani ira, me vaka na tamata sa lomani koya na luvena sa qaravi koya.

¹⁸ Ia dou na qai kunea tale ni sa dua tani na yalododonu ka dua tani na tamata ca, ni sa dua tani ko koya sa qarava na Kalou ka dua tani ko koya sa tawa qaravi koya.