Malakai 2 - AI VOLA TABU

Sa vunauci ira vakaukauwa na bete e na vuku ni ra sa tawa muria na veiyalayalati ni Kalou kei ira, 1-10. Sei vunauci ira na lewe ni vanua e na vuku ni ra dauqaravi ira na kalou lasu, 11-13, ka ia na veibutakoci, 14-16, ka dau vosavakacacataki koya na Kalou, 17.

¹ IA sa kemudou mada, na bete, nai vakaro o qo.

² Kevaka dou sa bese ni vakarogoca, ia kevaka dou sa bese ni vakasara ki na lomamudou, mo dou vakarokorokotaka na yacaqu, sa kaya ko Jiova ni lewe vuqa, kaʼu na vakayacora sara na cudruvi ko ya vei kemudou, ka vakacacataka na ka dou sa vakalougatataki kina: io, kaʼu na dui vakacacataka na ka o qori, e na vuku ni dou sa tawa vakasara vi na lomamudou.

³ Kaica, au na vunauca na sese vei kemudou, me kakua ni tokara, au na kureitaka talega na de-ni-manumanu ki na matamudou, io, na de-ni-manumanu ni nomudou solevu tabu; dou na kauti tani vata kaya talega.

⁴ Dou na qai kila niʼu a tala nai vakaro o qo vei kemudou, me dei na noqu veiyalayalati kei Levi, sa kaya ko Jiova ni lewe vuqa.

⁵ Sa ia kei koya na noqu veiyalayalatitaka na bula kei na veivinakati; ia kaʼu a solia vua e na vuku ni rere sa rerevaki au kina, ni sa taqaya sara talega e na mata ni yacaqu.

⁶ Sa vunau daudina ka tiko e gusuna, ka dua na ka e cala sa sega ga ni kune e na tebenigusuna: e na veivinakati kei na yalododonu sa lako vata kei au ko koya, a ra lewe vuqa sa saumaka tani mai na nodra caka cala.

⁷ Ia na gusudra na bete me sa maroroya ga na vuku, ia na vunau, me tarogi ga mai na gusuna: ni sai talatala i Jiova ni lewe vuqa ko koya.

⁸ Ia koi kemudou, dou a lesu tani mai na sala; dou a vakatarabetaki ira na lewe vuqa e na vunau; dou a vakacacataka na veiyalayalati kei Levi, sa kaya ko Jiova ni lewe vuqa.

⁹ Ia koi au talega, kaʼu a cakavi kemudou mo dou ka e beci ka kaisi vei ira na tamata kecega, me vaka ni dou a tawa vakabauta na noqu sala, ka sa kauta vakatani na vunau e na vuku ni mata ni tamata.

¹⁰ SA dua bau vata na tamada kecega, se segai? sa dua bau ga na Kalou sa buli keda, se segai? eda sa dui cakacaka vakailasu vua na kai noda, ni da vakacacataka na veiyalayalati sa ia kei ira na noda qase, e na vuku ni cava?

¹¹ Sa ra cakacaka vakailasu na Juta, ia e dua na ka vakasisila sa caka e Isireli kei Jerusalemi; ni ra sa vakacacataka na Juta na ka e tabu me nei Jiova, na nona ka sa lomana ko koya, ka sa kauta na luvena na kalou tani me watina.

¹² Ena dui muduki ira tani ko Jiova na tamata ko ya era sa cakava na ka o qo, se ko koya na dauyadra se na daurogo, mai na veivale malo i Jekope, se ko koya sa cabora nai madrali vei Jiova ni lewe vuqa.

¹³ Ia na ka o qo dou sa baki cakava vakarua, ka sa ubia nai cabocabo-ni-soro i Jiova e na wai ni mata, e na tagi, kei na tagi qoqolou, a sa sega kina ni goleva tiko nai madrali ko koya, se tara vakalomadonu mai na ligamudou.

¹⁴ Ia dou sa kaya, E na vuku ni cava? E na vuku i Jiova ni sa vakadinadina vei kemudrau kei na watimu ni ko a cauravou, o koya ko sa cakacaka vakailasu kina, ia ka sa nomui tokani ko koya, kei na watimu ko a veiyalayalati kaya.

¹⁵ Ia na lewe dua bauga sa cakava ko koya, se segai? ia ka tiko ga vua na vo ni yalo. Ia a cava e lewe dua bau kina? ni sa qara na kawa tabu. O koya o qo dou qarauna kina na yalomudou, ia vua ka watina na tamata ni sa cauravou, me kakua ni cakacaka vakailasu kina ko koya.

¹⁶ Niʼu sa cata na tawase, sa kaya ko Jiova, na Kalou nei Isireli, kei na nona ubia na nonai sulu na tamata e nai valavala kaukauwa, sa kaya ko Jiova ni lewe vuqa: o koya o qo dou qarauna kina na yalomudou, mo dou kakua ni cakacaka vakailasu.

¹⁷ DOU a vakaocataki Jiova e na nomudou vosa. Ia dou sa kaya, Keitou a vakaocataki koya li e na cava? Ni dou sa kaya, O ira kece era caka ca era sa vinaka e na mata i Jiova, sai ira talega e rekitaka ko koya; ke segai, Sa evei li na Kalou e lewa vakadodonu?