Malakai 1 - AI VOLA TABU

A WASE I. —Sa vunauca ko Malakai na nodra tawa loloma na Isireli, 1-5, Itei na nodra beci koya na Kalou Itei na nona cakacaka, 6-14.

¹ AI colacola ni vosa i Jiova vei ira na Isireli sa tukuna ko Malakai.

² Au a lomani kemudou, sa kaya ko Jiova. Ia dou sa kaya, Ko a lomani keitou vakaevei? O Iso, na tuaka i Jekope, se segai? sa kaya ko Jiova: ia kaʼu a lomani Jekope,

³ ia ko Iso, kaʼu a cati koya, ka cakava na nona ulu-ni-vanua me lala sara, kei na nonai votavota me nodra na gata ni veikau.

⁴ E na vuku ni ra kaya na Itomi, Eda sa vakadravudravuataki, ia eda na laʼki tara tale na veikoro lala; sa vosa vakaoqo ko Jiova ni lewe vuqa, Era na tara, ia koi au, kaʼu na talaraka sobu; a ra na vakatokai, Na vanua dauca, kei, Na mataqali sa na cudruva tikoga ko Jiova ka tawa mudu.

⁵ Ia na matamudou ena raica, a dou na kaya, Me vakacaucautaki ko Jiova mai nai yalayala ni Isireli.

⁶ A GONE, sa vakarokorokotaki tamana; kei na tamata, na nona turaga: ia ke sa tamamudou koi au, ke sa evei na qau vakarokorokotaki? ia ke sa turaga koi au, ke sa evei na qau rerevaki? sa kaya ko Jiova ni lewe vuqa vei kemudou, na bete, dou sa beca na yacaqu. Ia dou sa kaya, E keitou sa beca na yacamu vakaevei?

⁷ Ni dou sa vakacabora e na noqui cabocabo-ni-soro na kakana tawa savasava; ia dou sa kaya, E keitou sa vosavakacacataki iko vakaevei? Ni dou sa kava, Nai kanakana i Jiova sa ka wale sara.

⁸ Ia ke dou sa vakacabora; na ka mataboko mei soro, ke sa na tawa ca li? ia ke dou sa vakacabora na lokiloki kei na tauvi mate, ke sa na tawa ca li? mo cabora mada o qori vua na nomu turaga; ena vinakati iko beka, se vakadonuya na matamu? sa kaya ko Jiova ni lewe vuqa.

⁹ Ia o qo, dou masuta mada na mata ni Kalou, me lomani keda mai: sai kemudou ga e vuna na ka o qori; me na vakadonuya li ko kova na matamudou? sa kava ko Jiova ni lewe vuqa.

¹⁰ O cei tale vei kemudou ena via sogota wale na katuba? io, dou sa bese ni vakawaqa wale na buka e na noqui cabocabo-ni-soro. Au sa sega sara ni vinakati kemudou, sa kaya ko Jiova ni lewe vuqa, ia e dua nai madrali kaʼu na sega ni tara mai na ligamudou.

¹¹ Io, mai nai cadracadra ni siga ka yaco ki na kenai dromudromu ena vakalevulevui na yacaqu vei ira na lewe ni veivanua; ia e na veiyasana kecega sai madrali boi vinaka ena cabori ki na yacaqu, io, nai i madrali savasava: ni na vakalevulevui na yacaqu vei ira na lewe ni veivanua, sa kaya ko Jiova ni lewe vuqa.

¹² Ia dou a vosavakacacataka na ka ko ya, ni dou a kaya, Nai kanakana i Jiova, sa tawa ka tabu o qori; ia na vuana, na kena kakana, sa ka wale sara ga.

¹³ Dou a kaya tale, Kaica, sa dua na ka veivakaocataki! dou a beca vakakina, sa kaya ko Jiova ni lewe vuqa; ia dou a kauta mai na ka e dresulaki, kei na lokiloki, kei na tauvi mate; io, dou a kauta mai mei madrali: meʼu tara li o qori mai na ligamudou? sa kaya ko Jiova.

¹⁴ Ia me cudruvi ga na dauveivakaisini ko ya sa dua vua; na tagane e nona qele ni manumanu, ka sa vosavavakini, ka vakacabora e dua na ka ca vua na Turaga: niʼu sa Tui levu, sa kaya ko Jiova ni lewe vuqa, ia na yacaqu sa ka rerevaki e na veimatanitu.