Maika 7 - AI VOLA TABU

O Maika, ni sa tagicaka na vanua, sa vakararavi vua na Kalou, 1-10. Sa vakacegui e na vosa ni yalayala e so, 11-17. Sa vakacaucautaka na loloma levu ni Kalou, 18-20.

¹ ULE koi au! niʼu sa vaka na tamata ni sa kumuni oti na vuata e na vula i katakata, ka vaka na tamata ni sa tomi-tomiki oti na vua-ni-vaini: sa sega nai yawa vaini meʼu kania: se na lolo taumada, a ya sa gadreva tiko na yaloqu.

² Sa yali sara na tamata yalololoma mai na vanua: ia na tamata yalododonu sa sega ga vei ira na tamata: o ira kece era lawavaka ga na dra; era dui vakasava na wekana ki na lawa.

³ Me ra ligamatuataka rawa kina na nodra caka ca me caka vakavinaka sara, sa taroga ko koya sa turaga, kei koya talega na dauveilewai, na nodraui voli; ia ko koya sa turaga levu cake sa cavuta sara na nona gadreva ca: a ra sa bukia vata vakakina.

⁴ O koya sa uasivi cake vei ira e na vinaka sa vaka ga na soni: o koya sa yalododonu sara vei ira sa bai wa vakavotona: a kedra siga na nomui vakatawa, io, na nomu cudruvi, sa toro mai; ena yaco ga o qo na nodra vakidroataki.

⁵ Kakua ni dou vakadinata e dua nai tokani, kakua ni vakararavi vua na wekamu dina: mai vua sa koto e na lomaseremu mo qarauna ga nai sogo ni gusumu.

⁶ Ni sa qai beci tamana mai na goneatagane, sa veimecaki mai koi rau na veitinani alewa, kei rau na veivugoni alewa; era sa nona meca na tamata na nona lewe ni vale.

⁷ Ia koi au, kaʼu na namaki Jiova; kaʼu na waraki koya na Kalou, na noqui Vakabula: ena rogoci au na noqu Kalou.

⁸ Kakua ni ko reki, noqu meca, niʼu sa Cei: niʼu sa bale, kaʼu na tu cake tale; niʼu sa tiko e na butobuto, sai Jiova ena noqu rarama.

⁹ Na cudru i Jiova kaʼu na vosota ga, e na vuku niʼu sai valavala ca vua, me na ia mada ko koya na veilewai e na vukuqu, ka cudruvaki au: ena kauti au yani ki na rarama, au na raica na nona cakacaka dodonu.

¹⁰ Ena qai kunea ko koya sa noqu meca, a madua talega ena ubi koya ka kaya vei au, Sa evei ko Jiova na nomu Kalou? a mataqu ena raici koya: ena qai yaco ko koya me ka e buturaki sobu me vaka na lolobo e nai saqata.

¹¹ A siga ena viri tale kina na nomu bai, a siga ko ya sa yawa sara na kenai loku.

¹² E na siga ko ya ena lako mai vei iko ko ira mai Asiria ka yacovi Ijipita, mai Ijipita talega ka yacova na uciwai, mai na wasawasa e dua talega ki na wasawasa e dua, mai na ulu-ni-vanua e dua talega ki na ulu-ni-vanua e dua.

¹³ Ia na vanua, ena lala sara ga e na vukudra era tiko kina, e na vuku ni vua ni nodrai valavala.

¹⁴ Mo vakatawai ira na nomu tamata e na nomui titoko, io, na qele ni sipi e sa nomui votavota, a sa tiko duaduaga mai na veikau, e na loma i Karimeli: me ra kana voli tale mai Pasaki kei Kiliati, me vaka e na gauna eliu.

¹⁵ Me vaka e na gauna dou a lako mai kina mai na vanua ko Ijipita, kaʼu na vakatakila vei ira na ka e veivakidacalataki.

¹⁶ Ena raica ko ira na veimatanitu, ka maduataka kece na nodra kaukauwa: era na tabonaka na gusudra e na ligadra, a daligadra ena didivara mai.

¹⁷ Era na dramica na kuvu-ni-soso me vaka na gata, me vaka na ka sa qasi e na vanua era na yavala mai na nodra qara vuni: sai Jiova na noda Kalou era na rerevaka, io, era na rere e na vukumudou.

¹⁸ O cei na Kalou me tautauvata kei iko, sa bokoca na nodra caka cala, ka yalobalavutaka na nodra talaidredre na kena vo ni nonai votavota? sa sega ni taura tiko me tawa mudu na nona cudru, e na vuku ni sa vinakata ko koya me yalololoma.

¹⁹ Ena mai lomani keda tale ko koya; ena butuka sobu na noda caka cala; io, ko na biuta ki na wasa titobu na nodrai valavala ca kecega.

²⁰ O na vakayacora na ka dina vei Jekope, kei na yalololoma vei Eparaama, na ka ko a vosavavakini kina vei ira na neimami qase mai na gauna eliu.