Maika 5 - AI VOLA TABU

A nona sucu na Mesaia, Itei na nona matanitu, 1-15.

¹ DOU soqoni vakamataivalu mada, o iko na gonealewa vakamataivalu! sa buku mai na druadrua ni nodra koro! e nai titoko era sa yavita kina na baluna na dauveilewai nei Isireli.

² Ia ko iko, Peci-leema Efiraca, ko sa lailai me dua vei ira na mataqali lewe udolu e Juta, ia maivei iko ena lako mai vei au ko koya ena lewai ira na Isireli; o koya sa mailiu na nona lako mai, mai na gauna eliu sara.

³ Ia ena soli ira yani ko koya, me yaco mada na gauna me vakasucu ko koya ena vakasucu: ia na kena vo ni tacina ena qai lesu mai vei irana luve i Isireli.

⁴ Ia ena tu ko koya, ka vakani ira e na kaukauwa i Jiova, o na yaca vakaturaga i Jiova na nona Kalou; a ra na tikotiko ga; ni na qai levu ko koya ka yaco ki nai yalayala kei vuravura.

⁵ O koya talega o qo ena vu ni sautu; ia na kai Asiria ena mai kabata na noda vanua, ka butuka na noda veivale vakaturaga, eda na qai vakatura cake me veivala kaya e lewe vitu nai vakatawa, io, e lewe walu na tamata turaga.

⁶ A ra na vakacacana na vanua ko Asiria e nai seleiwau, io, na vanua i Nimiroti e na kenai yalayala: ena qai vakabulai keda ko koya mai vua na kai Asiria, ni sa mai kabata na noda vanua, ni sa mai butuka talega na nodai yalayala.

⁷ Ia na kedra vo na Jekope era na tiko e na maliwa ni veimataqali e vuqa me vaka na tegu maivei Jiova, me vaka na uca e na co, a ya sa tawa vakarorogo vua na tamata, se waraki ira na luve ni tamata.

⁸ Ia na kedra vo na Jekope era na tiko e na maliwa ni veimatanitu, e na kedra maliwa na veimataqali e vuqa, me vaka na laioni e na kedra maliwa na manumanu ni veikau, me vaka na luve ni laioni e na loma ni qele ni sipi: a ya ke sa lako yani kina, ke sa na butuka sobu, ka dresulaka, ka sega e dua me na vakabula.

⁹ Ena cecere na ligamu vei ira na nomu meca, ia ko ira kece era cati iko era na muduki laivi.

¹⁰ Ta ena yaco e na siga ko ya, sa kaya ko Jiova, au na muduka tani na nomu ose mai tikimu; ka vakarusa na nomu vale-vodoki:

¹¹ au na muduka laivi na veikoro ni nomu vanua, ka talaraka sobu kecega na nomu Veikoro kaukauwa:

¹² au na muduka tani talega na veinocati mai na ligamu: ia na daucaka-mana vakailasu ena sega ga vei iko:

¹³ au na muduka tani talega vei iko na nomu matakau wale, kei na nomu matakau e vakaduri tu; ia ko na sega ni sorova tale na cakacaka ni ligamu:

¹⁴ au na cavuta tani talega na nomu matakau i Aseteroci mai tikimu: ka vakarusa na nomu Veikoro.

¹⁵ Ia kaʼu na ia e na cudru kei na lesa na veisaumi ki na veimatanitu, sa sega ni vakarorogo.