Maika 2 - AI VOLA TABU

Sa vunauca na nodrai valavala kaukauwa, 1, 2. Sa tukuna tale na cudru ni Kalou vei ira, 3-5. Sa vunauca na nodra cata na vunau ni Kalou, 6-11. Sa tukuna na vosa ni yalayala ni Kalou vei ira na luve i Jekope e vo, 12, 13.

¹ E CA vei ira sa nanuma me caka cala, ka bukia na ca e na nodrai mocemoce! ni sa kida na mataka era sa qai cakava, ni sa rawata na ligadra.

² A ra kocova na veiwere, ka kovea; kei na veivale, ka kauta: a ra sa vakacacana na tamata kei na nona mataqali, io, na tamata kei na ka e taukena.

³ O koya o qo sa vosa vakaoqo kina ko Jiova; Raica, au sa bukia na kedra ca na mataqali o qo, a ya dou na tawa vakaseavutaka rawa maikina na domomudou; dou na tawa viavialevu lako talega: ni na gauna ca ko ya.

⁴ E na siga ko ya ena taurivaki na kemudoui bole, ka lelevaki na kemudou lele vakatagi, lavaka, Eda sa vakacacani vakaidina: a nodrai votavota na kai noqu sa volitaka ko koya: sa vakaseavutaka tani vei au! vua na dauvuki sa vota kina ko koya na noda veiwere.

⁵ O koya o qo ena sega kina ni vo vei iko e dua me viri dali e na veidigiyaka e nai vavakoso i Jiova.

⁶ Dou kakua ni ia na parofisai; me ra ia ga na parofisai era tawa parofisaitaka na ka vakaoqo: sa tawa mudu na veivakamaduataki.

⁷ A vosa cava o qo, na mataqali i Jekope! sa vakalekalekataki beka na Yalo i Jiova? sa vakaoqo beka na nona cakacaka? a noqu vosa sa tawa yaga beka vei koya sa lako vakadodonu?

⁸ A sa nodrai tovo ga mailiu na noqu tamata me tu cake vakameca: ai tutuvi vata kei nai sulu vakaturaga dou sa kauta tani vei ira era lako vinaka voli mai, io, vei ira era lesu mai nai valu.

⁹ A watidra na noqu tamata dou a vakasevi ira tani mai na nodra veivale domoni; maivei ira na luvedra dou a kauta tani na noqu ka vakaiukuuku, me sega sara tale ni nodra.

¹⁰ Dou tu cake, ka lako tani; ni sa sega ni nomudoui vakavakacegu o qo: e na vuku ni sa vakadukadukalitaki, ena vakarusai kemudou, io, e na veivakarusai rarawa.

¹¹ Ke dua na tamata, e curumi ka lasu tiko, me na vosa lasu ka kaya, Au na parofisaitaka vei iko na waini kei na yaqona; ke sai koya ga me na nodra parofita na tamata o qo.

¹² Au na vakasoqoni kemudou kece sara dina ga, na Jekope; au na kumuni ira dina vata na vo ni Isireli; au na vakatikori ira vata me vaka na sipi ni Posira, me vaka na qele ni sipi e na loma ni kedra bai: era na ue vakalevu e na vuku ni sa lewe vuqa na tamata.

¹³ Sa liutaki ira cake ko koya sa daubasubasu: era na basu yani, ka lako yani ki na matamata-ni-koro, ka curu yani kina: ia ena liutaki ira ko koya na nodra tui, io, ko Jiova ena nodrai liuliu.