Maciu 9 - AI VOLA TABU

Sa Vakabula ko Jisu e dua sa tauvi-paralasi, 1-8. Sa kacivi Maciu, 9. Sa kana vata kei ira na tamatai valavala ca, 10-13. Sa vakatakila na ka era sa sega ni lolo kina na nona tisaipeli e na gauna ko ya, 14-17. Sa qai Vakabula na turidrabalavu, kei na gonealewa sa ciba, kei na mataboko e rua, kei na galu, 18-34. A sa vakavulici iratou na nona tisaipeli me ratou daumasu me lewe vuqa nai talatala, 35-38.

¹ A SA vodo ko koya ki na waqa, ka lako ki tai kadua, ka yaco ki na nona koro.

² Ka raica, sa kau mai vua e dua na tamata sa tauvi-paralasi, a sa davo e na dua nai mocemoce: ia ni sa raica ko Jisu na nodra vakabauta, sa kaya vua sa tauvi-paralasi, Na luvequ, mo vakacegu; sa bokoci na nomui valavala ca.

³ Ka raica, e so na vu-ni-vola sa kaya e lomadra, O koya o qo sa vosavakacacataka na Kalou.

⁴ A sa kila na nodra nanuma ko Jisu, ka kaya, A cava dou sa nanuma vakaca kina e na lomamudou?

⁵ ni sa cava vei rau e rawarawa cake, me kaya, Sa bokoci na nomui valavala ca; se me kaya, Mo tu cake, ka lako voli?

⁶ ia mo dou kila kina ni sa rawata na Luve ni tamata e vuravura me bokoca nai valavala ca, (sa qai kaya ko koya vua sa tauvi-paralasi,) Mo tu cake, ka kauta na nomui mocemoce, ka lako ki na nomu vale.

⁷ A sa tu cake ko koya, ka lako ki na nona vale.

⁸ Ta ni ra sa raica ko ira na le vuqa, era sa kidacala, ka vakarokorokotaka na Kalou, ni sa solia ko koya na kaukauwa vakaoqo vei ira na tamata.

⁹ A sa lako tani maikea ko Jisu, a sa raica e dua na tamata ko Maciu na yacana, sa tiko e na vale ni vakacavacava; a sa kaya vua, Muri au. A sa tu cake ko koya, ka muri koya.

¹⁰ Ia ni sa tiko e na vale ko koya me kana, raica, sa lewe vuqa na kumuna nai vakacavacava kei na tamatai valavala ca era sa lako mai, ka tiko me kana vata kei Jisu kei iratou na nona tisaipeli.

¹¹ Ia ni ra sa raica ko ira na Farisi, era sa kaya vei iratou na nona tisaipeli, A cava sa kana vata kina na nomudoui Vakavuvuli kei ira sa kumuna nai vakacavacava kei ira na tamatai valavala ca?

¹² Ia ni sa rogoca ko Jisu, sa kaya vei ira, Sa sega ni yaga na vu-ni-wai vei ira sa bula vinaka, vei ira ga sa tauvi-mate:

¹³ ia dou laʼki vulica nai balebale ni ka o qo, Au sa vinakata na yalololoma, ka sega nai madrali; ni kaʼu sa sega ni lako mai me kacivi ira na yalododonu, o ira ga nai valavala ca, me ra veivutuni.

¹⁴ Sa qai lako mai vua ko ira na tisaipeli i Joni, ka kaya, A cava keimami sa lolo vakavuqa kina kei ira na Farisi, ia na nomu tisaipeli era sa sega ni lolo?

¹⁵ A sa kaya vei ira ko Jisu, Era sa tagi rawa li na weka ni watina-tagane, ni sa tiko vata kei ira na watina-tagane? ena yaco mai na siga, ena kau tani kina vei ira na watina-tagane, ka ra na qai lolo.

¹⁶ Ia sa sega na tamata sa cula vata na tiki ni sulu tawa savai kei nai sulu madra, ni sa dresuka nai sulu na tikina sa botani kina, a sa kadresu vakalevu kina.

¹⁷ Sa sega talega e dua sa vakataloca na waini vou ki na tavaya kuli-ni-manumanu madra: de kacabote na tavaya, ka dave yani na waini, ka ca na tavaya: a ra sa vakataloca na waini vou ki na tavaya vou, a sa maroroi ruarua kina.

¹⁸ Ni sa tukuna tiko na veika o qo vei ira ko koya, raica, sa dua na turaga sa lako mai, ka cuva vua, ka kaya, Sa qai ciba na luvequ-yalewa: mo lako ga mai mo tabaki koya e na ligamu, ena bula kina.

¹⁹ Sa qai tu cake ko Jisu, ka muri koya, kei iratou talega na nona tisaipeli.

²⁰ Ka raica, sa dua na yalewa sa turidrabalavu ka yabaki tinikarua, sa lako mai ki dakuna, ka tara na tutu ni nonai sulu:

²¹ ni sa kaya e lomana, Kevaka kaʼu tara walega na nonai sulu, au na vakabulai.

²² A sa rai vuki ko Jisu, ka kunei koya, ka kaya, Na luvequ-yalewa, mo vakacegu; sa vakabulai iko na nomu vakabauta. A sa bula na yalewa mai na tiki-ni-siga ko ya.

²³ Ia ni sa tadu ko Jisu ki na vale ni turaga, a sa raici ira era sa dauuvu bitu, kei ira na lewe vuqa era sa tagiyaso,

²⁴ sa kaya vei ira ko koya, Dou lako tani; ni sa sega ni ciba na gonealewa, sa moce walega. A ra sa dredrevaki koya.

²⁵ Ia ni ra sa vakatalai na lewe vuqa, sa curu ko koya, a sa taura na ligana, a sa tu cake na gonealewa.

²⁶ A sa kuruvaki ki na vanua taucoko ko ya na kenai rogorogo.

²⁷ Ia ni sa lako tani maikea ko Jisu, e le rua na tamata mataboko erau sa muri koya, a rau sa kaci, ka kaya, Na luve i Tavita, loloma mai vei keirau.

²⁸ Ia ni sa curu ki vale ko koya, sa lako mai vua koi rau na tamata mataboko; a sa kaya vei rau ko Jisu, Drau sa vakadinata niʼu sa cakava rawa na ka o qo, se segai? Erau sa kaya vua, Io, Turaga.

²⁹ Sa qai tara na matadrau ko koya, ka kaya, Me yaco vei kemudrau me vaka na nomudrau vakabauta.

³⁰ A sa rai na matadrau; a sa vakarota vei rau ko Jisu, ka kaya, Raica, me kakua ni kila e dua.

³¹ Ia koi rau ni rau sa lako yani, erau sa vakabe-kabea na kenai rogorogo ki na vanua taucoko ko ya.

³² Ia ni ra sa lako ki tautuba, raica, sa kau mai vua e dua na tamata galu sa curuma e dua na tevoro.

³³ Ia ni sa vakasavi tani na tevoro, sa vosa na galu: a ra sa kidacala kina na lewe vuqa, ka kaya, Sa sega na ka vakaoqo sa rairai e na dua na gauna e Isireli.

³⁴ A ra sa kaya na Farisi, Sa vakasavi ira na tevoro ko koya e na kaukauwa ni nodra turaga na tevoro.

³⁵ A SA lako voli ko Jisu e na veikoro kecega kei na Veikoro lalai, ka vakavuvuli e na nodra veivale ni lotu, ka vunautaka nai tukutuku-vinaka ni matanitu, ka Vakabula kecega na mate kei na malumalumu kecega vei ira na tamata.

³⁶ Ia ni sa raici ira na lewe vuqa ko koya, sa lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.

³⁷ Sa qai kaya vei iratou na nona tisaipeli, E dina ni sa vakalewe na yabaki, a ra sa lewe lailai ga nai vakatau-ni-were;

³⁸ o koya mo dou masuti koya nai Taukei ni were, me tala yani e so nai vakatau-ni-were ki na nona were.