Maciu 8 - AI VOLA TABU

Sa vakabula na vukavuka ko Jisu, kei na nona tamata na turaga ni valu, kei na tina ni wati i Petero, 1-17. Sa qai vakatakila vei iratou na nona tisaipeli nai valavala ni tamata sa muri koya, 18-22. Sa qai vunauca na wai, 23-27; a sa vakasavi ira na tevoro mai na tamata e le rua, 28-34.

¹ IA ni sa lako sobu mai na ulu-ni-vanua ko koya, era sa lewe vuqa sara sa muri koya.

² Ka raica, sa dua na tamata vukavuka sa lako mai ka cuva vua, ka kaya, Turaga, kevaka ko sa vinakata, ko sa vakasavasavataki au rawa.

³ A sa dodoka na ligana ko Jisu, ka tarai koya, ka kaya, Au sa vinakata; mo savasava mai. A sa savasava vakasauri na nona vukavuka.

⁴ A sa kaya vua ko Jisu, Raica, mo kakua ni tukuna vua e dua; ia mo laʼki vakarairaitaki iko ga vua na bete, ka vakacabora nai madrali sa vakarota ko Mosese, mei vakatakilakila vei ira.

⁵ Ia ni sa curu ko koya ki Kaperinaumi, sa lako mai vua e dua na turaga ni valu, ka masuta,

⁶ ka kaya, Turaga, sa davo mai neitou na noqu tamata sa tauvi-paralasi, a sa yaluma vakalevu sara.

⁷ A sa kaya vua ko Jisu, Au na laʼki vakabulai koya.

⁸ Sa qai vosa na turaga ni valu, ka kaya, Turaga, au sa sega ni yaga mo curu ki na noqu vale: mo cavuta walega na vosa, ena bula kina na noqu tamata:

⁹ niʼu sa turaga lailai ga koi au, kaʼu sa lewa na tamatai valu e so: ia kaʼu sa kaya vua o qo, Mo lakani, a sa lakani; ka vei koya e dua tani, Mo lako mai, a sa lako mai; ka vei koya na noqu tamata, Mo kitaka o qori, a sa kitaka.

¹⁰ Ia ni sa rogoca ko Jisu, sa kidacala, a sa kaya vei ira sa muri, Au sa kaya vakaidina vei kemudou, Au sa tawa kunea vei ira na Isireli e dua na vakabauta me vakaoqo na kena levu:

¹¹ au sa kaya talega vei kemudou, ni ra na lewe vuqa ena lako mai cake, mai ra talega; ka tiko sobu kei Eparaama, kei Aisake, kei Jekope, e na matanitu vakalomalagi:

¹² ia ko ira na gone ni matanitu era na biu ki na butobuto etautuba; era na dautagi kina, ka katia na batidra.

¹³ Sa qai kaya vua na turaga ni valu ko Jisu, Mo lako ga; ia me vaka ko sa vakabauta, me yaco vei iko. A sa bula na nona tamata e na tiki-ni-siga ko ya.

¹⁴ A sa lako ko Jisu ki na vale i Petero, a sa raica na tina ni watina, sa davo koto, ka tauvi-katakata.

¹⁵ A sa tara na ligana ko koya, a sa takali vua na katakata: a sa tu cake ko koya, ka qaravi iratou.

¹⁶ Ia ni sa yakavi mai, sa kau mai vei koya e lewe vuqa sa curumi ira na tevoro e so: a sa vakasavi ira na tevoro ko koya e na vosa, a sa vakabulai ira kecega sa tauvi-mate:

¹⁷ o koya sa vakayacori kina na vosa sa tu kuna ko Isaia, na parofita, ka kaya, O koya ga sa laveta na noda malumalumu, ka colata na noda veimate.

¹⁸ Ia ni sa raica ko Jisu ni ra sa lewe vuqa sara sa vakavolivoliti koya, sa kaya me ia na lako ki tai kadua.

¹⁹ A sa dua na vu-ni-vola sa lako mai, ka kaya vua, Vakavuvuli, au na muri iko ki na veiyasana ko na lako kina.

²⁰ Sa qai kaya vua ko Jisu, Sa vaqara na fokise, a sa vakai-roro na manumanu ni lagi; ia na Luve ni tamata, sa sega vua na tikina me vakadavora kina na uluna.

²¹ A sa dua tale na nona tisaipeli sa kaya vua, Turaga, laivi au meʼu lako mada ka buluti tamaqu.

²² A sa kaya vua ko Jisu, Mo muri au; ka biuta na mate me ra buluta na nodra mate.

²³ Ia ni sa laʼki vodoka na waqa ko koya, eratou sa muri koya na nona tisaipeli.

²⁴ Ka raica, sa tubu na cava levu e na wai, a sa ubia na waqa na biau: a sa moce ko koya.

²⁵ Sa qai lako mai ko iratou na nona tisaipeli, ka vakayadrati koya, ka kaya, Turaga, vakabulai kedatou: edatou sa mate.

²⁶ A sa kaya ko koya vei iratou, Dou sa rere e na vuku ni cava, oi kemudou sa vakabauta vakalailai? Sa qai tu cake ko koya, ka vunauca na cagi kei na wai; a sa mara vu levu mai.

²⁷ A sa kidacala ko iratou na tamata, ka kaya, E vakaevei nai valavala ni tamata o qo, ni sa talairawarawa vua na cagi kei na wai!

²⁸ Ia ni sa udu ko koya ki tai kadua, ki na nodra vanua na kai Kerikesa, sa sota kaya e lewe rua sa curumi rau na tevoro e so, erau sa lako mai na veibulubulu, a rau sa yalocudrucudru sara, a sa sega kina na tamata sa lako rawa e na sala ko ya.

²⁹ Ka raica, era sa qoqolou, ka kaya, E vakaevei ko kedatou, i Jisu na luve ni Kalou? o sa lako beka mai kike me vakararawataki keimami ni sa sega ni yaco na kena gauna?

³⁰ A sa dua na qele ni vuaka le vuqa sa vakani, sa vakayawa vei ira.

³¹ A ra sa masuti koya ko ira na tevoro, ka kaya, Kevaka ko sa vakasavi keimami, laiva me keimami curuma na qele ni vuaka.

³² A sa kaya ko koya vei ira, Dou lako ga. A ra sa lako tani, ka ra sa curuma na qele ni vuaka; ka raica, sa cici sara na qele ni vuaka taucoko e na baba ki na wai, ka ra sa mate e na wai.

³³ Ia ko ira sa vakania, era sa dro, ka lako ki na koro, ka tukuna na ka kecega, kei na ka sa yaco vei rau ka curumi rau ko ira na tevoro.

³⁴ Ka raica, era sa lako yani kecega na lewe ni koro me ra veitata kei Jisu: ia ni ra sa raica, era sa masuta me lako tani yani e na nodra vanua.