Maciu 7 - AI VOLA TABU

Sa vakatakila ko Jisu ni sa ca me da daulewai ira na tamata tani, 1-5: e vinaka me da cakava vakavuku nai vakavuvuli, 6: e vinaka me da daumasu vua na Kalou; ka valavala dodonu vei ira na tamata, 7-12. Na matamata-ni-koro qiqo, kei na sala rabailailai 13, 14. Nai vakavuvuli lasu, 15-20. Me da kakua ni rogoca walega na vosa ni Turaga, me da cakava talega, de da vaka na tamata sa tara na vale e na nuku, 21-27. Sa kidacala na lewe vuqa e na nonai vakavuvuli, 28, 29.

¹ DOU kakua ni daulelewa, de dou lewai.

² Ia na lewa dou na kitaka, dou na lewai kina: kei nai vakarau dou sa vakarautaka, ena vakarautaki tale vei kemudou.

³ Ia ka vakaevei, ni ko sa raica na malamala e na mata ni wekamu, ka ko sa sega ni nanuma na kau e matamu?

⁴ Se ko na kaya vakaevei vua na wekamu, Meʼu vutia mada na malamala mai na matamu; ka raica, sa tu e matamu na kau?

⁵ Na dauveivakaisini, mo vutia mada eliu na kau mai na matamu; ia ko na qai raica vinaka me vutia na malamala mai na mata ni wekamu.

⁶ Dou kakua ni solia na ka tabu vei ira na koli, se biuta na nomudou mata-ni-civa e matadra na vuaka, de ra buturaka sobu e yavadra, se vuki mai ka basuraki kemudou.

⁷ Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou:

⁸ ni sa rawata ko koya yadua sa kerekere; ia sa kunea ko koya sa vakasaqara; ia ena dolavi vua sa tukituki.

⁹ Se ko cei mada vei kemudou na tamata, kevaka e kere madrai na luvena, ena solia vua e dua na vatu?

¹⁰ se kere ika, ena solia vua e dua na gata?

¹¹ Ia kevaka dou sa kila, koi kemudou na yaloca, me solia na veika vinaka vei ira na luvemudou; sa qai dina vakalevu cake, ni na solia ua veika vinaka na Tamamudou mai lomalagi vei ira sa kerekere vua.

¹² O koya, a ka vakaaduaga dou sa vinakata me ra kitaka vei kemudou na tamata, dou kitaka talega vakakina vei ira; ni sa vakaoqo na vunau kei ira na parofita.

¹³ Dou curu ki na matamata-ni-koro qiqo: ni sa lalaga na matamata-ni-koro, ka rabailevu na sala, sa basika ki na rusa, a ra sa lewe vuqa sa curu kina;

¹⁴ ni sa qiqo na matamata-ni-koro, ka rabailailai na sala, sa basika ki na bula, a ra sa lewe lailai sa kunea.

¹⁵ Ia dou raici ira vinaka nai vakavuvuli vakailasu, era sa lako mai vei kemudou ka vakaisulu vaka na sipi, a ra sa wolifa daukata e na lomadra.

¹⁶ Dou na kilai ira e na vuadra. Sa veti li na vua-ni-vaini mai na wa-vakavotona, se na lolo mai na soni?

¹⁷ sa vakakina ni sa vuataka na vua vinaka na kau vinaka kecega, a sa vuataka na vua ca na kau ca.

¹⁸ E sega na kau vinaka me vuataka rawa na vua ca, se na kau ca me vuataka rawa na vua vinaka.

¹⁹ Na kau vakaaduaga sa sega ni vuataka na vua vinaka sa ta laivi, ka biu ki na buka waqa.

²⁰ E dina ya, ni dou na kilai ira e na vuadra.

²¹ Ena sega ni curu ki na matanitu vakalomalagi ko ira kecega sa kaya vei au, Turaga, Turaga; ia ko koya ga sa cakava na veitalia i Tamaqu sa tiko mai lomalagi.

²² Era na lewe vuqa ena kaya vei au e na siga ko ya, Turaga, Turaga, keimami a sega ni vakavuvuli e na yacamu, ne? ka vakasava na tevoro e so e na yacamu? ka kitaka na caka-mana e vuqa e na yacamu?

²³ Ia kaʼu na qai tusanaka vei ira, Au sa sega sara ni kilai kemudou; dou lako tani vei au, oi kemudou sa daukitaka nai valavala ca.

²⁴ Ia o qo, ko koya yadua sa rogoca na noqu vosa o qo, ka cakava, kaʼu na vakatau-tauvatataka kei na tamata vuku, sa tara na nona vale e na dela ni vatu:

²⁵ a sa tau mai na uca, ka lako mai na dobui, ka liwa na cagi, ka tabaka na vale ko ya; a sa sega ni bale: ni sa tauyavutaki e na vatu.

²⁶ Ia ko koya yadua sa rogoca na noqu vosa o qo, ka sega ni cakava, ena vakatautauvatataki kei na tamata lialia, sa tara na nona vale e na dela ni nuku:

²⁷ a sa tau mai na uca, ka lako mai na dobui, ka liwa na cagi, ka tabaka na vale ko ya; a sa bale kina: ia na ka levu na kena bale.

²⁸ A sa yaco, ni sa tinia ko Jisu na vosa o qo, era sa kidacala sara na lewe vuqa e na nonai vakavuvuli.

²⁹ Ni sa vakatavulici ira me vaka e dua e kaukauwa vakai koya, ka sega ni vakataki ira na vu-ni-vola.