Maciu 6 - AI VOLA TABU

Sa vakavulici ira na nona tamata ko Jisu, e nai loloma, 1-4; e na masu, 5-15; e na lolo, 16-18. Sa vakarota me ra kakua ni daulomana na ka vakavuravura, 19-23: se lomaocaoca, 24-34.

¹ DOU raici kemudou vinaka mo dou kakua ni kitaka na nomudoui loloma e na matadra na tamata, me ra raici kemudou kina; kevaka e vakaoqo, ena sega na kemudoui sau mai vua na Tamamudou sa tiko mai lomalagi.

² O koya o qo, ni ko sa kitaka nai loloma, mo kakua ni uvuca na davui e matamu, me vaka era daukitaka na dauveivakaisini e na veivale ni lotu kei na veigau-ni-sala, me dokai ira ko ira na tamata. Au sa kaya vakaidina vei kemudou, Sa tu ga vei ira na kenai sau.

³ Ia ko iko, ni ko sa kitaka nai loloma, me kakua ni kila na ligamu i mawi na ka sa kitaka na ligamu i matau:

⁴ me vuni kina na nomui loloma: ia na Tamamu sa raica na ka e vuni, ena sauma votu vei iko.

⁵ Ia ni ko sa masu, mo kakua ni vakai ira na dauveivakaisini: ni ra sa vinakata me ra tu e na veivale ni lotu kei na veitutu-ni-sala ni ra masu, me raici ira kina ko ira na tamata. Au sa kaya vakaidina vei kemudou, Sa tu ga vei ira na kenai sau.

⁶ Ia ko iko, ni ko sa masu, curu ki na nomu yasana tabogo, ia ni ko sa sogota oti na nomu katuba, masu vua na Tamamu sa tabogo; ia na Tamamu sa raica na ka e vuni ena sauma votu vei iko.

⁷ Ia ni dou sa masu, kakua ni vosa balabalavu walega, me vakai ira na tawa lotu; ni ra sa nanuma era na rogoci e na vuku ni ra sa vosa balabalavu.

⁸ 0 koya mo dou qai kakua ni vakai ira: ni sa kila eliu na Tamamudou na ka sa yaga vei kemudou, a sa muri na nomudou kerekere vua.

⁹ O koya mo dou qai masu vakaoqo: Tama i keimami mai lomalagi, Me vakarokorokotaki na yacamu.

¹⁰ Me yaco na nomu lewa. Me caka na nomu veitalia e vuravura me vaka mai lomalagi.

¹¹ Solia mai vei keimami e na siga o qo na kakana e yaga vei keimami.

¹² Ia kakua ni cudruvi keimami e na vuku ni neimami valavala ca, me vaka keimami sa sega ni cudruvi ira era sa valavala ca vei keimami.

¹³ Ia kakua ni kauti keimami ki na vere, ka vakabulai keimami mai na ca: Ni sa nomu na lewa, kei na kaukauwa, kei na vakarokoroko, ka tawa mudu. Emeni.

¹⁴ Ia kevaka dou sega ni cudruvi ira na tamata sa caka cala, ena sega talega ni cudruvi kemudou na Tamamudou vakalomalagi:

¹⁵ ia kevaka dou cudruvi ira na tamata sa caka cala, ena cudruvi kemudou talega e na vuku ni nomudou caka cala na Tamamudou.

¹⁶ Ia ni dou sa lolo, kakua ni vakaveveku mata, me vakai ira na dauveivakaisini; ni ra sa cakava vakatani na matadra, me rairai vei ira na tamata na nodra lolo. Au sa kaya vakaidina vei kemudou, Sa tu ga vei ira na kenai sau.

¹⁷ Ia ko iko, ni ko sa lolo, lumuta na ulumu, ka tavoya na matamu;

¹⁸ me kakua ni rairai vei ira na tamata na nomu lolo, vua ga na Tamamu sa tabogo: ia na Tamamu sa raica na ka e vuni ena sauma votu vei iko.

¹⁹ Dou kakua ni kumuna vata vei kemudou nai yau e vuravura, e dauvakacacana kina na sarasara kei na veveka, a sa ravabasuka kina na daubutako ka butakoca:

²⁰ ia mo dou kumuna vata na nomudoui yau mai lomalagi, sa sega ni vakacacana kina na sarasara se na veveka, a sa sega ni ravabasuka kina na daubutako me butakoca:

²¹ ni na tiko talega na yalomudou e na yasana sa tiko kina na nomudoui yau.

²² A cina ni yago na mata; o koya ke sa vinaka na matamu, ena rarama kina na yagomu taucoko.

²³ Ia kevaka e ca na matamu, ena butobuto na yagomu taucoko. Ia kevaka sa butobuto na rarama sa tu e lomamu, ena vakaevei na levu ni butobuto ko ya!

²⁴ Sa sega e dua na tamata sa qarava rawa e rua na turaga; ni na cata e dua, ka lomani koya kadua; se na kabita e dua, ka beci koya kadua. Dou sa sega ni qarava rawa na Kalou kei nai yau.

²⁵ O koya kaʼu sa kaya kina vei kemudou, Mo dou kakua ni lomaocaoca e na vuku ni nomudou bula, e na ka mo dou kania, se na ka mo dou gunuva: se e na vuku ni yagomudou, e na ka mo dou vakaisulu kina. Sa ka levu na bula, ia na kakana na ka lailai, se segai? a yago talega na ka levu, a ka lailai nai sulu, se segai?

²⁶ Dou raica na manumanu ni lagi; ni ra sa sega ni dauveikabukaburaki, se dautamusuka, se daukumuna vata ki na lololo; a sa vakani ira na Tamamudou vakalomalagi. Dou sa sega beka ni yaga vakalevu cake vei ira?

²⁷ Ia ko cei vei kemudou, ni sa lomaocaoca, sa rawata me vakuria vakalailai ga na siga ni nona bula?

²⁸ Ia dou sa lomaocaoca vakacava e na vuku ni sulu? Dou vakananuma na viavia ni veikau, era sa tubu vakaevei: era sa sega ni daucakacaka, se dautali:

²⁹ ia kaʼu sa kaya vei kemudou, O Solomoni e na nonai ukuuku kecega sa sega ni vakaisulu me vaka e dua vei ira o qo.

³⁰ Ia kevaka sa vakasuluma vakaoqo ko na Kalou na co ni veiwere, a ya sa tu edaidai, a sa biu ki na lovo e na sabogibogi, ena sega li ni ia vakalevu cake vei kemudou, oi kemudou sa vakabauta vakalailai?

³¹ O koya mo dou qai kakua ni lomaocaoca, ka kaya, A cava eda na kania? se, A cava eda na gunuva? se, A cava eda na vakaisulu kina?

³² (ni sa dauvakasaqara na ka kecega o qo ko ira na lewe ni veivanua:) ni sa kila na Tamamudou vakalomalagi ni sa yaga vei kemudou na ka kecega o qo.

³³ Ia dou vakasaqara taumada na matanitu ni Kalou, kei na nona yalododonu: ia ena soli mei kuri vei kemudou na ka kecega o qo.

³⁴ O koya mo dou qai kakua ni lomaocaoca e na vuku ni sabogibogi: ni na lomaocaoca na sabogibogi e na vuku ni kena ka. Sa rauta na siga na kena ca.