Maciu 4 - AI VOLA TABU

Sa dauveretaki Jisu na tevoro, 1-11. Sa laʼki tiko ki Kaperinaumi ko Jisu, 12-16. Sa dauvunau ko Jisu; a sa kacivi Petero, kei Adriu, kei Jemesi, kei Joni, me ratou nonai talatala, 17-22. Sa veilakoyaki ko Jisu me vunau ka vakabulai ira na mate, 23-25.

¹ SA qai kauti Jisu cake ko na Yalo ki na veikau, me dauveretaki koya na tevoro.

² Ia ni sa lolo ko koya e na siga e vasagavulu kei na bogi e vasagavulu, sa qai viakana.

³ A sa lako mai vei koya na dauvere, ka kaya, Kevaka ko sa Luve ni Kalou, mo kaya mada me tubu mei buli madrai na veivatu o qo.

⁴ A sa vosa ko koya, ka kaya, Sa volai, Ena sega ni bula na tamata e na madrai duaduaga, a ya e na ka kecega sa lesia na vosa ni Kalou.

⁵ Sa qai kauti koya na tevoro ki na koro tabu, ka vakatikora e na taba ni vale ni soro,

⁶ a sa kaya vua, Kevaka ko sa Luve ni Kalou, mo rika sobu: ni sa volai, Ena vakarota ko koya vei ira na nona agilose e na vukumu: ia era na keveti iko e na ligadra, de dua na siga ko tavutu beka kina na yavamu e na vatu.

⁷ Sa kaya vua ko Jisu, Sa volai talega, Mo kakua ni vakatovolei Jiova na nomu Kalou.

⁸ Sa kauti koya tale na tevoro ki na dua na ulu-ni-vanua cecere sara, a sa vakaraitaka vei koya na matanitu kecega e vuravura, kei na kedrai ukuuku;

⁹ a sa kaya vua, A ka kecega o qori kaʼu na solia vei iko, kevaka ko na cuva sobu ka soro vei au.

¹⁰ Sa qai kaya vua ko Jisu, Mo lako tani, Satani, ni sa volai, Mo soro vei Jiova na nomu Kalou, ia mo qaravi koya duaduaga.

¹¹ Sa qai biuti koya ko na tevoro, ka raica, sa lako mai e so na agilose ka qaravi koya.

¹² IA ni sa rogoca ko Jisu ni sa biu ki na vale ni veivesu ko Joni, sa lako tale ki Kalili;

¹³ a sa biuti Nasareci, a sa laʼki tiko vakadua ki Kaperinaumi, o koya sa tu e na baravi, e na yalayala kei Sepuloni kei Nafitali:

¹⁴ me vakayacori kina na vosa sa tukuna ko Isaia na parofita, ka kaya,

¹⁵ A vanua ko Sepuloni, kei na vanua ko Nafitali, e na yasayasa ni wai, e na tai kadua ni Joritani, o Kalili ni veimatanitu kisau,

¹⁶ o ira na tamata ka tiko e na butobuto, era sa raica na rarama levu; ia vei ira ka tiko e na yasana ni mate kei na yaloyalona sa cabe cake na rarama.

¹⁷ Mai na gauna ko ya sa vakatekivu kina ko Jisu me dauvunau, ka kaya, Dou veivutuni! ni sa voleka na matanitu vakalomalagi.

¹⁸ A sa lako voli ko Jisu e na bati ni wai mai Kalili, a sa raica e le rua erau veitacini, o Saimoni sa vakatokai ko Petero, kei Adriu na tacina, erau sa viritaka na lawa ki na wai: ni rau sa gonedau.

¹⁹ A sa kaya vei rau ko koya, Drau muri au mai, kaʼu na qisi kemudrau mo drau gonedau ni tamata.

²⁰ A rau sa biuta sara yani na nodrau lawa, ka muri koya.

²¹ A sa lako tani maikea ko koya vaka kiliu, a sa raica e le rua tale erau veitacini, ko Jemesi na luve i Sepeteo, kei Joni na tacina, eratou sa toka kei Sepeteo na tamadrau e na waqa, a rau sa oneva na nodratou lawa; a sa kacivi rau ko koya.

²² A rau sa biuta sara yani na waqa kei na tamadrau, ka muri koya.

²³ A sa veilakoyaki ko Jisu mai Kalili taucoko, a sa vakavuvuli e na nodra veivale ni lotu, a sa vunautaka nai tukutuku-vinaka ni matanitu, a sa vakabulai ira na tamata mai na mate kecega, kei na malumalumu kecega.

²⁴ A sa lako yani na kenai rogo ki Siria taucoko: a sa kau vua ko ira kecega sa tauvi-mate, era sa tauvi e na mate tani e so kei na veiyaluma, kei ira sa curumi ira na tevoro e so, kei ira sa tauvi-lialia, kei ira sa tauvi-paralasi; a sa vakabulai ira ko koya.

²⁵ A ra sa lewe vuqa sara sa muri koya mai Kalili, kei Tikapoli, kei Jerusalemi, kei Jutia, kei na tai kadua ni Joritani.