Maciu 3 - AI VOLA TABU

Sa dauvunau mai Jutia ko Joni na dauveipapitaiso, a sa papitaisotaki ira na lewe vuqa, 1-12. Sa papitaisotaki Jisu ko koya, 13-17.

¹ IA e na gauna ko ya sa lako mai ko Joni na dauveipapitaiso, ka dauvunau e loma ni veico mai Jutia,

² ka kaya, Dou veivutuni! ni sa voleka na matanitu vakalomalagi.

³ O koya o qo sa vosa kina ko Isaia na parofita, ka kaya, A domona e dua sa kacikaci e loma ni veico, Dou caramaka na sala i Jiova, cakava me dodonu na nona salatu.

⁴ Ia ko Joni o qo sa vakaisulu e nai sulu vuti ni kameli, ka vau na tolona e na wa kuli-ni-manumanu; ka sa kena kakana na vodre kei na oni ni veikau.

⁵ A sa lako mai vua ko Jerusalemi, kei Jutia taucoko, kei na yasana taucoko sa voleka ki na Joritani,

⁶ a sa papitaisotaki ira ko koya e na Joritani, ni ra sa vakatusa tiko na nodrai valavala ca.

⁷ Ia ni sa raica ko koya ni ra sa lewe vuqa na Farisi kei nai tokani i Satoki, era sa lako mai ki ua nona papitaiso, sa kaya vei ira, Oi kemudou na kawa ni gata, o cei sa vakasalataki kemudou mo dou dro tani mai na cudru sa lako tiko mai?

⁸ o koya mo dou vuataka na vua e kilikili kei na veivutuni:

⁹ ia dou kakua ni nanuma me kaya e na lomamudou, A tama i keimami ko Eparaama: niʼu sa kaya vei kemudou, e rawarawa vua na Kalou me vakatubura na veivatu o qo me ra luve i Eparaama.

¹⁰ Ia na matau sano edaidai e na vu ni kau; ka sa ta laivi kina na kau kecega sa sega ni vuataka na vua vinaka, a sa biu ki na buka waqa.

¹¹ E dina kaʼu sa papitaisotaki kemudou e na wai ni dou sa qai veivutuni: ia ko koya ena muri au mai sa levu cake vei keirau, ia na nonai vava kaʼu sa sega ni yaga meʼu kauta: ena papitaisotaki kemudou ko koya e na Yalo Tabu kei na buka waqa:

¹² a sa taura na nonai sivi ni sila na ligana, ka na vakasavasavataka sara ko koya na sila ni nona rara, ka binia vata na nona sila ki na lololo; ka na vakama ko koya na qana e na buka waqa e tawa bokoci rawa.

¹³ Sa qai lako mai ko Jisu mai Kalili ki na Joritani vei Joni, me papitaisotaki vua.

¹⁴ A sa via tarova ko Joni, ka kaya, Sa yaga vei au mo papitaisotaki au, ia ko iko, o sa lako li mai vei au?

¹⁵ Asa vosa ko Jisu, ka kaya vua, Mo vosota edaidai; ni sa kilikili kei keda me da vakabauta vakaoqo nai valavala dodonu kecega. Sa qai vosota ko koya.

¹⁶ Ia ko Jisu, ni sa papitaisotaki oti, sa cabe sara mai na wai: ka raica, sa qai wase rua vua na lomalagi, a sa raica ko koya na Yalo ni Kalou ni sa lako sobu mai me vaka na ruve, a sa mai ro toka vua:

¹⁷ ka raica, sa dua na domo mai lomalagi, sa kaya, O koya o qo na noqu Gone ni toko, au sa dauvinakata vakalevu.