Maciu 28 - AI VOLA TABU

E dua na agilose sa tukuna vei rau na yalewa ni sa tu cake tale mai ko Jisu, 1-8. Sa qai rairai mai vei rau ko Jisu, 9, 10. Sa solia nai lavo ko ira na bete levu vei ira nai vakatawa, me ra kaya ni sa butakoci koya ko iratou na nona tisaipeli, 11-15. Sa rairai vei iratou na nona tisaipeli ko Jisu; a sa vakarota me vakalotutaki ko ira na lewe ni veivanua kecega, 16-20.

¹ IA ni sa oti na siga ni vakacecegu, a sa kida nai matai ni siga ni wiki, sa qai lako mai ko Meri na kai Makitala kei na Meri kadua, me rau raica nai bulubulu.

² Ka raica, sa tavuki oti vakalevu na vanua; ni sa dua na agilose ni Turaga sa lako sobu mai lomalagi, a sa lako mai ka vaqiqica tani na vatu mai na katuba, a sa tiko e delana.

³ A sa vaka na liva na matana, a sa vulavula na nonai sulu me vaka na uca-vulavula.

⁴ A ra sa sautaninini nai vakatawa ni ra sa rerevaka, a ra sa yaco me vakai ira sa mate.

⁵ A sa qai vosa na agilose, ka kaya vei rau na yalewa, Drau kakua ni rere; ni kaʼu sa kila drau sa vakasaqarai Jisu, o koya ka lau vako ki na kauveilatai.

⁶ Sa sega eke ko koya: ni sa tu cake tale, me vaka na nona vosa. Drau lako mai, me raica na yasana ka koto kina na Turaga.

⁷ Ia drau lako kusarawa, ka tukuna vei iratou na nona tisaipeli ni sa tu cake tale mai na mate ko koya; ka raica, sa liutaki kemudou ki Kalili; dou na raica kina: raica, au sa tukuna vei kemudrau.

⁸ A rau sa lako kusarawa mai nai bulubulu ni rau sa rere ka reki vakalevu; a rau sa cici me tukuna vei iratou na nona tisaipeli.

⁹ Ia ni rau sa lako ga me tukuna vei iratou na nona tisaipeli, raica, sa sota kei rau ko Jisu, ka kaya, Sa loloma. Erau sa qai lako ka taura na yavana, ka cuva vua.

¹⁰ Sa qai kaya vei rau ko Jisu, Drau kakua ni rere; drau laʼki tukuna ga vei iratou na wekaqu me ratou lako ki Kalili; ia eratou na raici au kina.

¹¹ Ia ni rau sa lako yani, raica, e so vei ira nai vakatawa era sa lako ki na koro, a ra sa vakatakila kivei ira na bete levu na ka kece sa qai yaco.

¹² Ia ni ra sa soqoni vata kei ira na qase, ka sa bosea, era sa qai solia nai lavo e levu vei ira na tamatai valu,

¹³ ka kaya, Dou vaka, Sa lako mai e na bogi ko iratou na nona tisaipeli, ka butakoci koya, ni keitou a moce tu.

¹⁴ Ia kevaka ena rogoca na turaga, keitou na vakaloma-vinakataka, ka vakarurugi kemudou.

¹⁵ A ra sa taura nai lavo, a ra sa kitaka me vaka era sa vakatavulici kina: a sa dautukuni tikoga na vosa o qo vei ira na kai Jutia ka yacova na siga edaidai.

¹⁶ A sa lako ki Kalili ko iratou na tisaipeli na lewe tinikadua, ki na ulu-ni-vanua ka tukuna vei iratou ko Jisu.

¹⁷ Ia ni ratou sa raici koya, eratou sa cuva vua: a ra sa sega ni vakadinata e so.

¹⁸ A sa lako mai ko Jisu ka vosa vei iratou, ka kaya, Sa soli mai vei au na lewa kecega mai lomalagi kei vuravura.

¹⁹ O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu;

²⁰ vakavulici ira me ra vakabauta na ka kece kaʼu a vosa kina vei kemudou: ka raica, au sa tiko vata kei kemudou e na veisiga kecega, ka yacova nai vakataotioti kei vuravura. Emeni.