Maciu 27 - AI VOLA TABU

Era sa kauti Jisu vei Pilato, 1, 2. Sa kukunataki koya ko Juta, 3-10. Sa lewai ko Jisu; a sa talaki vei Pilato ko na watina, 11-25. Sa soli Jisu vei ira na kai Jutia ko Pilato; a ra sa vakacacana, ka vakalialia, ka vakota ki na kauveilatai, 26-49. Sa qai ciba ko Jisu, a sa yaco emuri e so na ka-mana, 50-56. Sa buluta ko Josefa, 57-61. A ra sa qai vakaukauwataka nai bulubulu na kai Jutia, ka vakatawana, 62-66.

¹ IA ni sa mataka mai, era sa bosei Jisu ko ira kecega na bete levu kei ira na nodra qase na tamata, me ra vakamatea;

² ia ni ra sa vesuka, era sa kauta yani, ka solia vei Ponitio Pilato na turaga.

³ Ia ko Juta, o koya ka solia yani, ni sa raica sa lewai ko koya me mate, sa qai veivutuni, a sa vakasuka na tiki ni siliva e tolusagavulu vei ira na bete levu kei ira na qase,

⁴ ka kaya, Au sa valavala ca ni kaʼu a soli koya sa tawa cala me mate. A ra sa kaya, A cava o qori vei keitou? o iko ga, mo raica.

⁵ A sa biuta ko koya na veitiki ni siliva e na vale ni soro, a sa curu yani; a sa lako ka kukunataki koya.

⁶ A ra sa kauta na veitiki ni siliva ko ira na bete levu, ka kaya, Sa sega ni tara me virikotora e na kato kamunaga ni vale ni soro, ni sai sau ni mate.

⁷ A ra sa qai bosea, ka volia kina na tiki-ni-vanua ni dautuli kuro, me ra bulu kina na vulagi.

⁸ O koya o qo sa vakatokai kina na tiki-ni-vanua ko ya, Na tiki-ni-vanua ni dra, ka yacova na siga o qo.

⁹ Sa qai vakayacori na ka sa tukuna ko Yirimia na parofita, ka kaya, Au sa kauta na tiki ni siliva e tolusagavulu, ai voli kei koya sa volitaki, o koya era sa volia ko ira e so na luve i Isireli;

¹⁰ a ra sa solia mei voli ni tiki-ni-vanua ni dautuli kuro; me vaka sa vosa vei au na Turaga.

¹¹ A sa tu ko Jisu e na mata ni turaga, a sa tarogi koya na turaga, ka kaya, O sa nodra Tui na kai Jutia, se segai? A sa kaya vua ko Jisu, O sa kaya dina mai.

¹² Ia ni ra sa beitaka ko ira na bete levu kei ira na qase, sa sega na ka sa kaya ko koya.

¹³ Sa qai kaya vua ko Pilato, O sa sega beka ni rogoca na kena vuqa ni ka era sa beitaka vei iko?

¹⁴ A sa sega ni vosa tale vua ko koya e na dua na ka; a sa kidacala vakalevu kina na turaga.

¹⁵ A sa dau nonai valavala na turaga e na solevu me sereka vei ira na lewe vuqa e dua na tamata sa vesu, o koya era sa digitaka.

¹⁶ A sa tiko vei ira e dua sa vesu tu, e rogo sara, sa vakatokai ko Parapa.

¹⁷ O koya, ni ra sa soqoni vata mai, sa kaya kina vei ira ko Pilato, Dou sa vinakati cei meʼu sereka vei kemudou? o Parapa, se ko Jisu, ko koya sa vakatokai ko Karisito?

¹⁸ Ni sa kila ko koya ni ra a soli koya yani e na vuku ni ra sa vuvutaka.

¹⁹ Ia ni sa tiko sobu ko koya e nai tikotiko ni veilewai, sa talaki vua ko na watina, ka kaya, Me kakua ni dua na ka vei kemudrau kei na tamata dodonu ko ya: ni kaʼu sa rarawa vakalevu edaidai ni kaʼu sa tadrai koya.

²⁰ A sa vakadreta vei ira na lewe vuqa ko ira na bete levu kei ira na qase, me ra kerei Parapa, ka vakamatei Jisu.

²¹ Sa qai vosa na turaga, ka kaya vei ira, O cei vei rau na lewe rua dou sa vinakata meʼu sereka vei kemudou? Era sa kaya, O Parapa.

²² Sa kaya vei ira ko Pilato, A cava meʼu qai kitaka vei Jisu, ko koya sa vakatokai ko Karisito? Era sa kaya kecega vua, Me lau vako ga ki na kauveilatai

²³ Sa qai kaya na turaga, A cava na ka ca sa cakava ko koya? A ra sa qai qoqolou vakalevu cake, ka kaya, Me lauvako ga ki na kauveilatai.

²⁴ Ni sa raica ko Pilato ni sa sega ni yaco na nona vosa, ia ka sa ue mai ko ira na tamata, sa qai kauta e so na wai, a sa vuluvulu na ligana e na matadra na lewe vuqa, ka kaya, Oi au, kaʼu na sega ni tarogi e na vuku ni mate ni tamata dodonu o qo: mo dou raica ga.

²⁵ A ra sa qai vosa kece na tamata, ka kaya, Me tu ga vei keimami na nona mate, vei ira talega na luveimami.

²⁶ Sa qai sereki Parapa vei ira ko koya, ia ni sa vakanakuitataki Jisu mada eliu, sa qai solia yani me vakoti ki na kauveilatai.

²⁷ Ia ko ira na tamatai valu ni turaga, era sa kauti Jisu ki na vale ni turaga, ka vakasoqoni ira vata kina na matai valu taucoko.

²⁸ A ra sa luvata na nonai sulu, a ra sa vakasuluma e na dua nai sulu damudamu.

²⁹ Ni ra sa qai talia e dua nai sala e na veiwa-vakavotona, era sa salaga na uluna, ka tura e na ligana i matau e dua na gasau: a ra sa tekiduru e matana, a ra sa vakalialiai koya, ka kaya, Sa loloma, na nodra Tui na kai Jutia!

³⁰ A ra sa qai kasivita, ka kauta na gasau, ka yavita na uluna.

³¹ Ia ni ra sa vakalialia oti, era sa luvata vua nai sulu, ka vakasuluma e na nonai sulu dina, ka kauta yani me ra vakota ki na kauveilatai.

³² Ia ni ra sa lako tani, era sa kunea e dua na tamata na kai Kirini, o Saimoni na yacana: o koya era sa vakasaurarataka me colata na nona kauveilatai.

³³ Ia ni ra sa yaco ki na yasana sa vakatokai ko Kolikoca, (a kenai balebale, A yasana ni qavokavoka,)

³⁴ era sa solia vua na wai wiwi sa veiwaki vata kei na ka gaga me gunuva: ia ni sa vakatovolea ko koya, sa bese ni gunuva.

³⁵ Era sa qai vakota ki na kauveilatai, a ra sa vota na nona veisulu, e nai vola ni veidigidigi: me vakayacori kina na ka sa vosataka na parofita, Era sa vota vei ira na noqu veisulu, ia na noqui tutuvi era sa ia kina na madigi vola.

³⁶ A ra sa tiko sobu ka vakatawai koya maikea.

³⁷ A ra sa vakota me irova na uluna nai vola ni ka sa beitaki vua: O JISU O QO, NA NODRA TUI NA KAI JUTIA.

³⁸ Sa qai lauvako vata kaya ki na kauveilatai e lewe rua na daubutako, e dua e na ligana i matau, ka dua e nai mawi.

³⁹ Ia ko ira sa lako voli, era sa vosavakacacataki koya, ni ra sa kuretaka na uludra,

⁴⁰ ka kaya, O iko sa basuka na vale ni soro, ka tara e na bogi e tolu, vakabulai iko mada ga: kevaka ko sa Luve ni Kalou, mo kevu sobu mai na kauveilatai

⁴¹ A sa vaka talega kina ko ira na bete levu, era sa vakalialia, vata kei ira na vu-ni-vola kei ira na qase, ka kaya,

⁴² O koya sa dauvakabulai ira na tani; sa sega ni vakabulai koya rawa: kevaka sa nodra Tui na Isireli ko koya, me kevu sobu edaidai mai na kauveilatai, keimami na qai vakabauti koya:

⁴³ sa dauvakararavi ko koya vua na Kalou; me vakabulai koya edaidai ko koya, kevaka e vinakata: ni sa kaya, Oi au na Luve ni Kalou.

⁴⁴ Oi rau talega na daubutako, eratou a vakoti vata kaya ki na kauveilatai, erau sa vakalialiai koya vakakina.

⁴⁵ Ia ka sa butobuto na vanua taucoko, a sa vakatekivu mai nai kaono ni tiki-ni-siga ka yacova nai kaciwa ni tiki-ni-siga.

⁴⁶ Ia e nai kaciwa ni tiki-ni-siga sa kaci ko Jisu e na domo levu, ka kaya, Ili, Ili, lama sapakicani? (a kenai balebale, Noqu Kalou, noqu Kalou, o sa biuti au e na vuku ni cava?)

⁴⁷ Ia ka so vei ira sa tu voleka, ni ra sa rogoca, era sa kaya, O koya o qo sa kacivi Ilija.

⁴⁸ A sa cici sara e dua vei ira, a sa taura e dua na vutovuto, ka tonisua e na wai wiwi, ka vivia ki na dua na gasau, a sa vagunuvi koya.

⁴⁹ A sa kaya ko ira sa vo, Biuta mada; me da raica se na lako mai ko Ilija me vakabulai koya, se segai.

⁵⁰ Ia ko Jisu, ni sa kaci tale e na domo levu, sa qai lako tani na yalona.

⁵¹ Ka raica, sa sei rua nai lati ni vale ni soro mai na tikina ecake ka kauta kira; a sa tavuki na vanua, a sa kavida rua na veivatu levu;

⁵² a sa dolavi na veibulubulu; sa vuqa talega na yagodra na yalododonu ka moce, sa tu cake tale mai;

⁵³ ia ni sa tu cake oti tale mai ko koya, era sa lako mai na veibulubulu, ka lako ki na koro tabu, ka sa lewe vuqa era sa rairai kina.

⁵⁴ Ia na turaga ni valu, kei ira sa tiko vata kaya me vakatawai Jisu, ni ra sa raica na tavuki ni vanua, kei na veika sa yaco, era sa rere vakalevu, ka kaya, E dina ga ni sa Luve ni Kalou ko koya o qo.

⁵⁵ Era sa lewe vuqa talega na yalewa era sa vakaraica vakayawa, o ira era a muri Jisu mai Kalili, ni ra sa dauqarava:

⁵⁶ e dua vei ira ko Meri na kai Makitala, kei Meri na tinadrau ko Jemesi kei Josese, kei na tinadrau na luve i Sepeteo.

⁵⁷ Ia ni sa yakavi mai, sa lako mai e dua na tamata vutuniyau, na kai Arimacia, na yacana ko Josefa, o koya talega sa tisaipeli i Jisu:

⁵⁸ sa lako vei Pilato ko koya, a sa kerea na yago i Jisu. Sa qai vosa ko Pilato me soli na yagona:

⁵⁹ a sa kauta na yagona ko Josefa, ka solega e na dua na gatu matailalai sa savasava,

⁶⁰ a sa vakotora e na nonai bulubulu vou, a ya ka taya e na vatu: a sa vaqiqica e dua na vatu levu ki na katuba ni bulubulu, ka lako tale yani

⁶¹ A sa tiko maikina ko Meri na kai Makitala, kei na Meri kadua, erau sa tiko sobu ka donuya nai bulubulu.

⁶² Ia e na sabogibogi, e na siga sa tarava na siga vakarau, era sa soqoni vata vei Pilato ko ira na bete levu kei ira na Farisi,

⁶³ a ra sa kaya, Turaga, keitou sa nanuma ni sa kaya na dauveivakacalai ko ya, ni sa bula tiko, Me oti mada na bogi e tolu kaʼu na qai tu cake tale mai:

⁶⁴ o koya mo qai vosa me vakaukauwataki nai bulubulu me oti mada nai katolu ni bogi, de ra lako mai na nona tisaipeli e ua bogi, a ra mai butakoca, a ra kaya vei ira na tamata, Sa tu cake tale mai na mate ko koya: ena qai ca vakalevu kina na veivakacalai sa ia emuri, ka ca vakalailai na kena eliu.

⁶⁵ Sa qai kaya vei ira ko Pilato, Sa tu ga vei kemudou nai vakatawa e so: dou lako, dou vakaukauwataka me vaka na nomudou vuku.

⁶⁶ Era sa qai lako, a ra sa vakaukauwataka nai bulubulu, era sa dregata na vatu, ka ra vakatawa e so.