Maciu 26 - AI VOLA TABU

Era sa bosei Jisu ko ira na turaga me ra vakamatea, 1-5. Sa lumuti koya ko Meri, 6-13. Sa volitaka ko Juta, 14-16. Sa ia na solevu ni lako-sivia ko Jisu, 17-25; a sa vakatekivuna nai vakayakavini Turaga, 26-35. Sa qai laki masu e na were ko Kecisemani, 36-46. Sa solia yani ko Juta, 47-56. Era sa kauta vei Kaiafa, 57-68. Sa cakitaka ko Petero na nona kilai koya, 69-75.

¹ A SA yaco ni sa vakaotia ko Jisu na vosa kecega o qo, sa kaya vei iratou na nona tisaipeli,

² Dou sa kila ni sa vo ga na bogi e rua me qai ia na solevu ni lako-sivia: ena qai soli yani na Luve ni tamata me lauvako ki na kauveilatai.

³ Era sa qai soqoni vata ko ira na bete levu, kei ira na vu-ni-vola, kei ira na nodra qase na tamata, e na vale ni bete levu, o Kaiafa na yacana,

⁴ a ra sa bose me ra lawakitaki Jisu me ra taura, ka vakamatea.

⁵ A ra sa kaya, Me kakua ga ni sa ia na solevu, de ra ue kina na tamata.

⁶ Ia ni sa tiko ko Jisu mai Pecania e na vale i Saimoni na vukavuka,

⁷ sa lako mai vei koya e dua na yalewa sa tama e dua na tavaya alapasiteri ni waiwai talei sara, a sa livia ki na uluna, ni sa tiko ko koya me kana.

⁸ Ia ni sa raica ko iratou na nona tisaipeli, eratou sa cudru sara, ka kaya, Sa biu walega o qori e na vuku ni cava?

⁹ ni sa rawarawa me volitaki na waiwai o qo e nai lavo e levu, ka soli vei ira na dravudravua.

¹⁰ Ia ni sa kila ko Jisu, sa kaya vei iratou, Dou sa saga na yalewa e na vuku ni cava? ni sa cakava vei au e dua na cakacaka vinaka.

¹¹ Ni sa tiko vakadua kei kemudou ko ira na dravudravua; ia koi au, kaʼu na sega ni tiko vakadua kei kemudou.

¹² Ni sa sova ko koya na waiwai o qo ki na yagoqu, sa kitaka me noqui waiwai ni bulu.

¹³ Au sa kaya vakaidina vei kemudou, E na veiyasana kecega e vuravura taucoko ena vunautaki kina nai tukutuku-vinaka o qo, ena bau tukuni talega kina na ka sa kitaka na yalewa o qo, me kenai divi.

¹⁴ Sa qai dua vei iratou na tinikarua, sa vakatokai ko Juta Isikarioti, sa lako vei ira na bete levu,

¹⁵ ka kaya, A cava dou sa via solia vei au, kevaka kaʼu na soli koya yani vei kemudou? A ra sa vakarautaka vua na tiki ni siliva e tolusagavulu.

¹⁶ Ia mai na siga ko ya sa vakasaqara ko koya na gauna e rawarawa me soli koya kina.

¹⁷ Ia e nai matai ni siga ni ka tawa vakaleveni, sa lako mai vei Jisu ko iratou na tisaipeli, ka kaya vua, Evei na tikina ko sa vinakata me keitou vakarautaka kina mo kania na solevu ni lako-sivia?

¹⁸ A sa kaya ko koya, Lako vua e dua na tamata ki na koro, ka kaya vua, Sa kaya nai Vakavuvuli, Sa voleka na noqu siga; oi au kei iratou na noqu tisaipeli, keitou na ia na solevu ni lako-sivia e na nomu vale.

¹⁹ A ratou sa kitaka na tisaipeli me vaka sa vakarota vei iratou ko Jisu; a ratou sa vakarautaka na solevu ni lako-sivia.

²⁰ Ia ni sa yakavi mai, sa tiko sobu ko koya kei iratou na tinikarua.

²¹ Ia ni ratou sa kana tiko, sa kaya ko koya, Au sa kaya vakaidina vei kemudou, ni na soli au yani e dua vei kemudou.

²² Eratou sa qai rarawa vakalevu, a ratou sa vakatekivu yadua me kaya vua, Turaga, oi au beka?

²³ A sa vosa ko koya, ka kaya, O koya keirau sa tonidromuca vata kaya na ligana e na bilo, o koya o qo ena soli au yani:

²⁴ sa lako na Luve ni tamata me vaka sa volai e na vukuna: ia ka ca vua na tamata ko ya sa solia yani na Luve ni tamata! ke sa sega ni sucu mai na tamata ko ya, ke sa vinaka vua.

²⁵ Sa qai vosa ko Juta, o koya sa solia yani, ka kaya, Vakavuvuli, oi au beka? Sa kaya vua ko koya,

⁰ sa kaya dina mai.

²⁶ Ia ni ratou sa kana tiko, sa taura na madrai ko Jisu, ia ni sa vatonaka oti, sa dovia, ka solia vei iratou na tisaipeli, ka kaya, Taura, kania; o qo na yagoqu.

²⁷ Sa qai taura na bilo ko koya, ia ni sa vakavinavinaka oti, sa solia vei iratou, ka kaya, Dou gunu kece kina;

²⁸ ni sa noqu dra o qo ni veiyalayalati vou, a ya sa sova e na vukudra e lewe vuqa, me bokoci nai valavala ca:

²⁹ ia kaʼu sa kaya vei kemudou, Au na sega ni gunuva emuri na vua ni vaini o qo, ka malua me yaco mada na siga kaʼu na gunuva vou kina kei kemudou e na matanitu nei Tamaqu.

³⁰ Ia ni ratou sa sere oti, eratou sa lako yani ki na ulu-ni-vanua ni veiolive.

³¹ Sa qai kaya vei iratou ko Jisu, Dou na tarabe kecega e na vukuqu e na bogi edaidai: ni sa volai, Au na yavita nai vakatawa ni sipi, ka ra na dui vakasesei na qele ni sipi.

³² Ia ni kaʼu sa tu cake tale oti mai, au na qai liutaki kemudou ki Kalili.

³³ Sa qai vosa ko Petero, ka kaya vua, Kevaka ena tarabe ko ira kecega e na vukumu, oi au, kaʼu na sega ni tarabe.

³⁴ Sa kaya vua ko Jisu, Au sa kaya vei iko, E na bogi ga edaidai, ni sa sega ni tagi mada eliu na toa, o na cakitaki au vakatolu.

³⁵ Sa kaya vua ko Petero, Kevaka edaru na mate vata, au na sega sara ni cakitaki iko. Sa vosa vaka talega kina ko iratou kecega na tisaipeli.

³⁶ Sa qai lako mai ko Jisu kei iratou ki na dua na yasana sa vakatokai ko Kecisemani, a sa kaya vei iratou na tisaipeli, Dou tiko ga eke, meʼu lako mada kikea me masu.

³⁷ A sa kauti Petero ko koya kei rau na luve i Sepeteo, a sa vakatekivu me rarawa na lomana ka yaluma sara.

³⁸ Sa qai kaya vei iratou ko koya, Sa rarawa vakalevu na yaloqu, me vaka na mate: dou tiko ga eke, me datou vakatawa.

³⁹ A sa lako vakalailai vaka kiliu ko koya, a sa bale sobu vakatobocu, a sa masu, ka kaya, Tamaqu, kevaka e rawarawa, me lako tani mada vei au na bilo o qo; ia me kakua ga ni vaka na noqu veitalia, me vaka ga na nomu.

⁴⁰ A sa qai lako mai vei iratou na tisaipeli, a sa kunei iratou ni ratou sa moce tu, a sa kaya vei Petero, Oi! dou sa sega ni rawata me datou vakatawa vata ka dua bauga na tiki-ni-bogi, ne?

⁴¹ Dou vakatawa ka masu, me kakua ni rawai kemudou na vere: e dina ya ni sa gu na yalo, ia na yago sa malumalumu.

⁴² Sa lako vakarua ko koya ka masu, ka kaya, Tamaqu, kevaka e sega ni rawarawa me lako tani vei au na bilo o qo, keʼu sega ni gunuva, me yaco ga na nomu veitalia.

⁴³ Sa qai lako mai ko koya, a sa kunei iratou ni ratou sa moce tale: ni sa bibi na matadratou.

⁴⁴ A sa laivi iratou ko koya, a sa lako tale yani, ka masu vakatolu, a sa cavuta tale na vosa ko ya.

⁴⁵ Sa qai lako mai vei iratou na nona tisaipeli, ka kaya vei iratou, Dou qai moce ga, ka dou cegu; raica, sa voleka na gauna, a sa soli yani na Luve ni tamata ki na ligadra na tamata ca:

⁴⁶ tu cake, me datou lako: raica, sa voleka mai ko koya sa soli au yani.

⁴⁷ Ia ni sa vosa tiko ko koya, raica, sa lako mai ko Juta, e dua vei iratou na tinikarua, kei ira vata kaya e lewe vuqa sara era sa taura e so nai seleiwau kei nai wau, maivei ira na bete levu kei ira na nodra qase na tamata.

⁴⁸ Ia ko koya sa soli koya yani sa cavuta oti vei ira e dua nai vakatakilakila, ka kaya, O koya kaʼu na reguca, sai koya; taura matua.

⁴⁹ A sa qai lako sara mai vei Jisu, ka kaya, Sa loloma, vakavuvuli! a sa reguca.

⁵⁰ A sa kaya vua ko Jisu, Noqui tau, o sa lako mai e na vuku ni cava? Era sa qai lako mai, ka kauti Jisu, ka taura matua.

⁵¹ Ka raica, e dua vei iratou sa tiko vata kei Jisu sa dodoka na ligana, ka ucuna na nonai seleiwau, a sa yavita na nona tamata na bete levu, a sa seledrutia na daligana.

⁵² Sa qai kaya vua ko Jisu, Daramaka tale na nomui seleiwau ki na kena taga: ni ra na mate e nai seleiwau ko ira kece era taura nai seleiwau.

⁵³ O sa nanuma beka e sega ni rawarawa vei au meʼu qai masuti Tamaqu, ka na solia mai vei au ko koya na agilose e tinikarua nai vavakoso ka mani vakacaoa?

⁵⁴ Ena qai vakayacori vakaevei nai Vola, sa tukuna na kena dodonu ni yaco vakaoqo?

⁵⁵ E na tiki-ni-bogi ko ya sa kaya ko Jisu vei ira na lewe vuqa, Dou sa lakova beka mai e dua na daubutako, ni dou sa taura e so nai seleiwau kei nai wau, mo dou tauri au, ne? Au a dautiko sobu vata kei kemudou e na veisiga, ka vakatavuvuli e na vale ni soro, ia dou a sega ni tauri au.

⁵⁶ Ia sa caka kecega na ka o qo, me vakayacori kina na nodrai vola na parofita. Sa qai biuti koya ko iratou kecega na tisaipeli, ka dro.

⁵⁷ Ia ko ira sa tauri Jisu era sa kauta yani vei Kaiafa na bete levu, ki na yasana era sa soqoni vata kina na vu-ni-vola kei na qase.

⁵⁸ A sa muri koya vakayawa ko Petero ki na vale ni bete levu, a sa curu kina, a sa tiko sobu vata kei ira nai talatala kei ira na vada, me raica mada na kenai otioti.

⁵⁹ Ia ko ira na bete levu, kei ira na qase, kei ira kecega na mataveilewai, era vakasaqara e so me ra beitaki Jisu vakailasu, me mate kina ko koya:

⁶⁰ a ra sa tawa kunea: ia, sa vuqa na dauveibeitaki vakailasu sa lako mai; ia era sa sega ni kunea. Sa qai lako mai emuri e lewe rua na dauveibeitaki vakailasu,

⁶¹ a rau sa kaya, O koya o qo sa kaya, Au sa rawata meʼu basuka na vale ni soro ni Kalou, ka tara e na bogi e tolu.

⁶² Sa qai tu cake na bete levu, a sa kaya vua, Sa sega na ka ko kaya mai, ne? a cava o qo erau sa beitaki iko kina koi rau o qo?

⁶³ A sa galu tu ga ko Jisu. A sa qai vosa na bete levu, ka kaya vua, Au vakaroti iko matua e na vuku ni Kalou bula, mo tukuna mai vei keitou se na Karisito ko iko, na Luve ni Kalou, se segai.

⁶⁴ Sa kaya vua ko Jisu, O sa kaya dina mai: ia kaʼu sa kaya talega vei kemudou, E na gauna emuri dou na raica na Luve ni tamata ni sa tiko e na liga i matau i Koya sa kaukauwa, ni sa lako talega mai e na veio ni lomalagi.

⁶⁵ Sa qai dresulaka na nonai sulu na bete levu, ka kaya, Sa qai vosavakacacataka na Kalou ko koya: sa yaga tale vakacava me so na dauveibeitaki? raica, dou sa rogoca ga na nona vosavakacacataka na Kalou:

⁶⁶ a cava dou lewa? A ra sa vosa ka kaya, E dodonu ga me vakamatei.

⁶⁷ Era sa qai kasivita na matana, ka vaculaka; a sa sabica ko ira e so,

⁶⁸ ka kaya, Tukuna vei keitou, i Karisito, se ko cei sa yaviti iko.

⁶⁹ A sa tiko etautuba ko Petero e na rara ni vale, a sa dua na vada sa lako vua, ka kaya, O iko talega ka tiko vata kei Jisu na kai Kalili.

⁷⁰ A sa cakitaka ko koya e matadra kecega, ka kaya, Au sa sega ni kila na ka ko sa kaya.

⁷¹ Ni sa qai lako ko koya kivaka ki na katuba, sa dua tale sa raica, a sa kaya vei ira sa tiko kina, O koya o qo talega erau a tiko vata kei Jisu na kai Nasareci.

⁷² A sa cakitaka tale ko koya e na bubului, ka vaka, Au sa sega ni kila na tamata ko ya.

⁷³ A sa dede vakalailai ga ka sa lako mai ko ira era a tu kina, a ra sa kaya vei Petero, Sa i dina ga ni sa dua vei ira ko iko; ni sa vakatakilai iko na nomu vosa.

⁷⁴ Sa qai vakatekivu ko koya me ruru ka bubului, ka vaka, Au sa sega ni kila na tamata ko ya. Sa qai tagi sara na toa.

⁷⁵ Sa qai nanuma na vosa i Jisu ko Petero, ni sa kaya vua, Ni sa sega ni tagi mada eliu na toa, o na cakitaki au vakatolu. A sa curu ki tautuba, ka tagi vakalevu sara.