Maciu 25 - AI VOLA TABU

A vosa vakatautauvata ni gonealewa e tini, 1-13; kei na taledi, 14-30. Sa vakatakila ko Jisu nai valavala ni siga ni lewa, 31-46.

¹ ENA qai vakatauvatani na matanitu vakalomalagi kei na gonealewa e lewe tini, eratou sa kauta na nodratou veicina, ka laʼki veitata kei na watina-tagane.

² Ka lewe lima vei iratou sa vuku, a ratou sa lewe lima sa lialia.

³ O iratou na lialia eratou sa kauta na nodratou veicina, a ratou sa sega ni kauta vata kei na waiwai;

⁴ ia ko iratou na vuku eratou sa kauta na waiwai e na nodratou tavaya, vata kei na nodratou veicina.

⁵ Ia ni sa dede mai na watina-tagane, eratou sa sosovu kecega ka moce.

⁶ Ni sa qai lomaloma-ni-bogi na vanua, sa ia na kacikaci, Raica, sa lako mai na watina-tagane; dou laʼki veitata kaya.

⁷ Eratou sa qai tu cake kecega na gonealewa o qo, a ratou sa vakarautaka na nodratou veicina.

⁸ A sa kaya ko iratou na lialia vei iratou na vuku, Solia mai vei keitou e so na nomudou waiwai; ni sa boko na neitou veicina.

⁹ A sa vosa ko iratou na vuku, ka kaya, De sega ni takiveilevu vei keda: e vinaka mo dou lako ga vei ira na dauveivoli, ka volia me nomudou.

¹⁰ Ia ni ratou sa lako me ratou volivoli, sa tadu mai na watina-tagane; ia ko iratou sa vakarau oti tu, eratou sa curu vata kaya ki na vakawati: a sa qai sogo na katuba.

¹¹ Sa qai lako talega mai emuri ko iratou na gonealewa ko ya, ka kaya, Turaga, Turaga, dolavi keitou.

¹² A sa vosa ko koya, ka kaya, Au sa kaya vakaidina vei kemudou, au sa sega ni kilai kemudou.

¹³ O koya mo dou qai vakatawa, ni dou sa sega ni kila na Siga, se na tiki-ni-siga, sa lako mai kina na Luve ni tamata.

¹⁴ Ni sa tautauvata ko koya kei na dua na tamata sa lako ki na dua na vanua tani, o koya sa kacivi ira na nona tamata, ka solia vei ira na nonai yau:

¹⁵ a sa solia vua e dua na taledi e lima, vua tale e dua e rua, vua tale e dua e dua bauga; vei ira yadua me vaka na ka era sa dui cakava rawa: a sa qai lako sara yani.

¹⁶ Ia ko koya sa taura na taledi e lima sa laʼki veivoli kina, a sa rawata e lima tale na taledi.

¹⁷ Sa vaka talega kina ko koya sa taura e rua, sa rawata e rua tale.

¹⁸ Ia ko koya sa taura e dua bau, sa lako ka kelia na qele, ka vunia nai lavo ni nona turaga.

¹⁹ A sa dede sara mada sa qai lako mai na nodra turaga na tamata ko ya, a sa tarogi ira.

²⁰ Ia ko koya ka taura na taledi e lima, sa lako mai ka kauta mai e lima tale na taledi, ka kaya, Turaga, e lima na taledi ko a solia mai vei au: raica, au sa rawata e lima tale na taledi me kenai kuri.

²¹ A sa kaya na nona turaga vei koya, E vinaka, a tamata vinaka ka dina; o sa dina e na ka e vica ga, au na lesi iko mo lewa na ka e vuqa: curu ki na marau ni nomu turaga.

²² O koya talega ka taura na taledi e rua, sa lako mai ka kaya, Turaga, e rua na taledi ko a solia mai vei au: raica, au sa rawata e rua tale na taledi me kenai kuri.

²³ Sa kaya na nona turaga vei koya, E vinaka, a tamata vinaka ka dina: o sa dina e na ka e vica ga, au na lesi iko mo lewa na ka e vuqa: curu ki na marau ni nomu turaga.

²⁴ Ia ko koya ka taura na taledi e dua bauga, sa lako mai ka kaya, Turaga, au sa kilai iko, ni ko sa tamata lawaki dredre, o sa tamusuka e na vanua ko a sega ni kaburaka kina, ka kumuna mai na vanua ko a sega ni veibiuyaka kina:

²⁵ ia kaʼu a rere kina, ka laʼki vunia na nomu taledi e na qele: raica, o qori na nomu sa tu ga vei iko.

²⁶ Sa qai vosa na nona turaga vei koya, ka kaya, A tamata ca ka vucesa! o sa kila niʼu sa tamusuka e na vanua kaʼu a sega ni kaburaka kina, ka kumuna mai na vanua kaʼu a sega ni veibiuyaka kina:

²⁷ o koya ga o qo e kilikili kina kei iko me solia na noqui lavo vei ira na dauveisaui lavo, niʼu sa qai lako mai meʼu sa taura na noqu vata kei na kenai sau talega.

²⁸ O koya mo dou qai kauta tani vua na taledi, ka solia vua sa tu vei koya na taledi e tini.

²⁹ Ni sa dua na ka ke sa tu vua na tamata, ena qai soli vua ka na levu na nona: ia na tamata ke sa sega ni tu vua e dua na ka, ena qai kau tani mai vua na ka sa tu vua.

³⁰ Ia na tamata tawa yaga mo dou biuta ki na butobuto etautuba: ena dautagi kina, ka katia na batina.

³¹ Ia e na siga ena lako mai kina na Luve ni tamata e na nonai ukuuku, kei ira vata kaya na agilose yalosavasava kecega, ena qai tiko e na nonai tikotiko vakaturaga sa vakaiukuuku:

³² ena qai soqoni vata e matana na lewe ni veivanua kecega: ena qai tawasei ira rua ko koya, me vaka nai vakatawa ni sipi sa tawasei ira na sipi maivei ira na koti;

³³ ia ena vakatikori ira na sipi e na ligana i matau, kei ira na koti e nai mawi.

³⁴ Ena qai kaya na Tui vei ira e na ligana i matau, Dou lako mai, oi kemudou sa vakalougatataki vei Tamaqu, mo dou rawata na matanitu sa vakarautaki vei kemudou mai nai vakatekivu kei vuravura:

³⁵ ni kaʼu a viakana, ka dou a solia mai vei au na kakana: au a viagunu, ka dou a vagunuvi au: au a vulagi, ka dou a kauti au ki vale:

³⁶ luvawale, ka dou a vakasulumi au: au a tauvi-mate, ka dou a mai raici au: au a tiko e na vale ni veivesu, ka dou a lako mai vei au.

³⁷ Ena qai vosa vua ko ira na yalododonu, ka kaya, Turaga, keitou a raici iko mada ninaica ni ko a viakana, ka vakani iko? se viagunu, ka vagunuvi iko?

³⁸ se keitou a raici iko ninaica ni ko a vulagi, ka kauti iko ki vale? se luvawale, ka vakasulumi iko?

³⁹ se keitou a raici iko ninaica ni ko a tauvi-mate, se e na vale ni veivesu, ka lako vei iko?

⁴⁰ Ena qai vosa na Tui, ka kaya vei ira, Au sa kaya vakaidina vei kemudou, E na vuku ni dou a cakava vua e dua sa lailai vei ira na wekaqu o qo, dou a cakava vei au.

⁴¹ Ena qai vosa talega ko koya vei ira e na ligana i mawi, Lako tani vei au koi kemudou sa cudruvi, ki na buka waqa tawa boko, sa vakarautaki vei koya na tevoro kei ira na nona agilose:

⁴² ni kaʼu a viakana, ka dou a sega ni solia mai vei au na kakana: au a viagunu, ka dou a sega ni vagunuvi au:

⁴³ au a vulagi, ka dou a sega ni kauti au ki vale: luvawale, ka dou a sega ni vakasulumi au: tauvi-mate, ka e na vale ni veivesu, ka dou a sega ni mai raici au.

⁴⁴ Ena qai vosa vua ko ira talega, ka kaya, Turaga, keitou a raici iko ninaica ni ko a viakana, se viagunu, se vulagi, se luvawale, se tauvi-mate, se e na vale ni veivesu, ka sega ni qaravi iko?

⁴⁵ Ena qai vosa ko koya vei ira, ka kaya, Au sa kaya vakaidina vei kemudou, E na vuku ni dou a sega ni cakava vua e dua sa lailai vei ira o qo, dou a sega talega ni cakava vei au.

⁴⁶ Era na qai lako ko ira o qo ki na cudruvi tawa mudu; ia ko ira na yalododonu ki na bula tawa mudu.