Maciu 24 - AI VOLA TABU

Sa tukuna ko Jisu na ka ca ena yaco ki Jerusalemi, 1-28; kei nai vakatakilakila ni nona lako tale mai, 29-35. Sa vunauci iratou na tisaipeli me ratou vakararau tu, ni sa sega ni kilai na tiki-ni-siga ena lako mai kina na Turaga, 36-51.

¹ A SA curu yani ko Jisu ka lako tani e na vale ni soro: a ratou sa lako mai na nona tisaipeli me ratou vakatakila vua na veiyasana ni vale ni soro.

² A sa kaya vei iratou ko Jisu, Dou sa raica na ka kecega o qori, ne? au sa kaya vakaidina vei kemudou, Ena sega ni vo tu eke na veivatu sa veitaqataqai, me kakua ni talaraki sobu.

³ Ia ni sa tiko ko koya mai na ulu-ni-vanua ni veiolive, sa lako vakatikitiki vua ko iratou na tisaipeli, ka kaya, Tukuna mai vei keitou, se na yaco ninaica na veika o qo? ia ka cava nai vakatakilakila ni nomu lako mai, kei nai vakataotioti kei vuravura?

⁴ A sa vosa ko Jisu, ka kaya vei iratou, Raica vinaka de vakacalai kemudou e dua.

⁵ Ni ra na lewe vuqa era na lako mai e na yacaqu, ka kaya, Oi au na Karisito; ia ka lewe vuqa era na vakacala.

⁶ Ia dou na rogoca nai valu, kei nai rogorogo ni valu: dou raici kemudou vinaka mo dou kakua ni kidroa: ni sa kilikili me yaco na ka kecega o qo, ia ka sa bera ga nai vakataotioti.

⁷ Ni na veibolebolei na veivanua e so, kei na veimatanitu e so: ena yaco talega na dausiga, kei na mate ca, kei na tavuki ni vanua, e na yasana e vuqa

⁸ Ia na ka kecega o qo nai vakatekivu ni ka rarawa.

⁹ Dou na qai soli yani me vakararawataki, ka dou na vakamatei; ia dou na cati vei ira na lewe ni veivanua kecega e na vuku ni yacaqu.

¹⁰ Ia ena lewe vuqa era na qai tarabe, a ra na veisoliyaki, ka veicati.

¹¹ Ena lewe vuqa talega na parofita vakailasu ena tubu cake mai, ia ka lewe vuqa era na vakacala.

¹² Ia ni sa tubu vakalevu nai valavala ca, ena liliwa mai na nodra loloma na lewe vuqa.

¹³ Ia ko koya ena vosota me yacova nai vakataotioti, ena vakabulai ko koya.

¹⁴ Ia ena vunautaki e vuravura taucoko nai tukutuku-vinaka o qo ni matanitu, mei vakadinadina ki na veivanua kecega; sa na qai yaco mai emuri nai vakataotioti.

¹⁵ Ia ni dou sa raica ni sa tu e na tikina tabu na ka vakasisila sa dauveivakarusai, a ya sa vosa kina ko Tanieli na parofita, (me vakananuma ko koya sa wilika:)

¹⁶ me qai se ki na veiulu-ni-vanua ko ira era sa tiko e Jutia:

¹⁷ me kakua ni lako sobu mai ko koya sa tiko e na dela ni vale, me kauta tani na ka e na nona vale;

¹⁸ ia me kakua ni lesu tale ko koya sa tiko e na were, me kauta na nonai sulu.

¹⁹ Ka na ca vei ira sa bukete, kei ira era sa vakasucuma na gone, e na gauna ko ya!

²⁰ Ia dou masu me kakua ni yaco na nomudou se e na vula i liliwa, se e na siga ni vakacecegu:

²¹ ni na qai levu sara na rarawa, ka sega ni vakakina eliu mai nai vakatekivu kei vuravura ka yacova na gauna o qo, ka na sega sara talega emuri.

²² Ia kevaka ena sega ni vakalekalekataki na gauna ko ya, ena sega na tamata me bula rawa: ia e na vukudra na digitaki ena vakalekalekataki na gauna ko ya.

²³ Kevaka ena qai kaya vei kemudou e dua, Kaica, eke na Karisito; se, Maikea; kakua ni dinata.

²⁴ Ni na tubu mai na Karisito vakailasu e so, kei na parofita vakailasu e so, a ra na vakatakila na veivakatakilakila lelevu kei na veika e veivakidacalataki; ia ke rawa, ke ra na vakacalai ira talega na digitaki

²⁵ Raica, au sa tukuna oti mada vei kemudou eliu.

²⁶ Kevaka era na kaya vei kemudou, Raica, sa tiko ko koya mai veikau! kakua ni lako kina: Raica, mai na vale vuni! kakua ni vakadinata.

²⁷ Ni sa vaka na livaliva sa lako mai cake, ka liva yani ki ra; ena vaka talega kina na nona lako mai na Luve ni tamata.

²⁸ Ni ra na soqoni vata na ikeli ki na yasana kece sa tu kina na yago.

²⁹ Ia ni sa oti mada na gauna rarawa ko ya, ena qai vakabutobutotaki vakasauri na mata-ni-siga, ena sega talega ni cila na rarama ni vula, ka na lutu mai lomalagi na veikalokalo, ka na veitosoyaki na veika kaukauwa ni lomalagi:

³⁰ ena qai rairai mai nai vakatakilakila ni Luve ni tamata mai lomalagi; ena qai tagi na veimataqali vakaaduaga e vuravura, era na qai raica na Luve ni tamata ni sa lako mai e na veio ni lomalagi e na kaukauwa kei nai ukuuku levu.

³¹ Ia ena talai ira na nona agilose ko koya e na davui domoilevu, ka ra na vakasoqoni ira vata na nona digitaki mai na mata ni cagi e va, mai na vu ni lagi e dua ka yacova nai kadua.

³² Mo dou kila mada na vosa vakatautauvata e na lolo: Ni sa qai lavo vou na tabana, a sa tubu na drauna, dou sa kila kina ni sa voleka na vula i katakata:

³³ Sa vaka talega kina koi kemudou, ni dou sa raica kecega na ka o qo, dou kila ni sa voleka, io mai na katuba.

³⁴ Au sa kaya vakaidina vei kemudou, Ena sega ni takali mada nai tabatamata o qo, ena yaco eliu na ka kecega o qo.

³⁵ Ena takali ko lomalagi kei vuravura: ia na noqu vosa ena sega ni takali.

³⁶ Ia na siga ko ya kei na tiki-ni-siga ko ya sa sega e dua e kila, o ira na agilose mai lomalagi e segai, ia ko koya duaduaga na Tamaqu.

³⁷ Ia me vaka dina na siga i Noa, ena vaka talega kina na nona lako mai na Luve ni tamata:

³⁸ ni na vaka ni ra sa kana e so, ka gunu, sa vakawati ka veimusumusukitaki me ra vakawati, e na gauna sa liutaka na waluvu, ka yacova na siga sa curu kina ko Noa ki na waqa:

³⁹ a ra sa sega mada ni kila eliu, a sa qai yaco dina na waluvu, ka kauti ira kece yani; ena vaka talega kina na nona lako mai na Luve ni tamata.

⁴⁰ Ena qai lewe rua erau na tiko e na veiwere; ena kau tani e dua, ka biu e dua.

⁴¹ Ena lewe rua na yalewa erau na qaqi sila, ena kau tani e dua, ka biu e dua.

⁴² O koya mo dou qai vakatawa; ni dou sa sega ni kila na tiki-ni-siga sa lako mai kina na nomudou Turaga.

⁴³ Ia dou kila ga o qo, kevaka e kila nai taukei ni vale na tiki-ni-bogi e lako mai kina na daubutako, sa vakatawa ga, ka sega ni biuta na nona vale me ravabasuki.

⁴⁴ O koya mo dou qai vakararau tu, koi kemudou talega: ni sa lako mai na Luve ni tamata e na tiki-ni-siga dou sa sega ni nanuma kina.

⁴⁵ Ia ko cei na tamata yalododonu ka vuku, sa lesia ko na nona turaga me lewai ira na nona lewe-ni-vale, me solia vei ira na kedra e na gauna dodonu?

⁴⁶ Sa kalougata na tamata ko ya, o koya ena kunea ko na nona turaga ni sa kitaka vakakina, ni sa lako mai ko koya.

⁴⁷ Au sa kaya vakaidina vei kemudou, Ena lesi koya me lewa na nona ka kecega.

⁴⁸ Ia kevaka ena kaya e lomana na tamata ca ko ya, Sa vakaberaberataka na nona lako mai na noqu turaga:

⁴⁹ a sa vakatekivu kina me yaviti ira na nonai tokani, me daukana talega ka daugunu vata kei ira na daumateni;

⁵⁰ ena lako mai na turaga ni tamata ko ya e na siga e sega ni namaka kina, kei na tiki-ni-siga e sega ni kila kina;

⁵¹ ena qai varo-musuka rua, ka vota vua mei votavota vata kei ira na dauveivakaisini: ena dautagi kina, ka katia na batina.