Maciu 23 - AI VOLA TABU

Sa vakavulici ira na tamata ko Jisu me ra muria na nodrai vakavuvuli vinaka na Farisi kei na vu-ni-vola, ia me ra kakua ga ni muria na nodrai valavala ca, 1-12. Sa qai vunauci ira na Farisi, a sa vakatakila ni na ca ko Jerusalemi, 13-39.

¹ SA qai vosa ko Jisu vei ira na lewe vuqa, vei iratou talega na nona tisaipeli,

² ka kaya, Sa tiko e nai tikotiko i Mosese ko ira na vu-ni-vola kei ira na Farisi;

³ ia na ka kecega era sa kaya vei kemudou mo dou vakabauta, dou vakabauta ga ka cakava; ia dou kakua ga ni kitaka na nodrai valavala, ni ra sa vosa ga ka sega ni cakava.

⁴ Ni ra sa vauca nai colacola bibi e dredre sara ni colati, ka vakataqara e na usouso-ni-domodra na tamata; a ra sa sega ni via vakayavalata e na dua na nodrai qaqalo.

⁵ Ia na nodra cakacaka kecega era sa kitaka me raici ira kina na tamata: era sa vakarabailevutaka na nodra veivakananumi tabu, ka ra sa vakalevutaka na tutu ni nodrai sulu,

⁶ a ra sa vinakata nai tikotiko vakaturaga e na veisolevu, kei nai tikotiko ni qase e na veivale ni lotu,

⁷ kei na veikidavaki e na veirara ni veivoli, me vakatokai talega vei ira na tamata, Vakavuvuli, Vakavuvuli.

⁸ Ia koi kemudou, dou kakua ni vakatokai mei Vakavuvuli: ni sa dua bauga na nomudou Turaga, o koya na Karisito; ia dou sa veiwekani kecega.

⁹ Dou kakua talega ni vakatoka e dua me tamamudou e vuravura; ni sa dua bauga na Tamamudou, o koya mai lomalagi.

¹⁰ Dou kakua talega ni vakatokai me turaga: ni sa dua bauga na nomudou Turaga, o koya ua Karisito.

¹¹ Ia ko koya sa uasivi cake vei kemudou, me nomudoui talatala ko koya.

¹² Ia ko koya ena vakalevulevui koya, ena vakamalumalumutaki: ia ko koya ena vakamalumalumutaki koya, ena vakalevulevui.

¹³ Ia e ca vei kemudou, na vu-ni-vola kei na Farisi, na dauveivakaisini! ni dou sa sogota na matanitu vakalomalagi vei ira na tamata: ni dou sa sega ni curu rawa kina koi kemudou, se laivi ira era sa curu tiko me ra curu kina.

¹⁴ E ca vei kemudou, na vu-ni-vola kei na Farisi, na dauveivakaisini! ni dou sa kovea na nodrai yau na yada, ni dou sa masu balavu tiko me veivakaisini: o koya o qo dou na cudruvi vakalevu cake kina.

¹⁵ E ca vei kemudou, na vu-ni-vola kei na Farisi, na dauveivakaisini; ni dou sa lako voli e na Wasawasa kei na vanua me cakava e dua me tamata lotu vakai kemudou; ia ni sa caka oti, dou sa cakava me luve ni eli vakarua vei kemudou.

¹⁶ E ca vei kemudou, nai vakavuvuli mataboko! dou sa kaya, O koya ena bubului ka cavuta na vale ni soro, a ka wale ko ya; ia ko koya ena bubului ka cavuta na koula ni vale ni soro, sa vauci kina ko koya.

¹⁷ Na lialia ka mataboko! a cava vei rau e levu cake, a koula, se na vale ni soro sa vakatabui kina na koula?

¹⁸ Ia, O koya ena bubului ka cavuta nai cabocabo-ni-madrali, a ka wale ko ya; ia ko koya ena bubului ka cavuta nai madrali sa koto kina, sa vauci kina ko koya.

¹⁹ Na kalia ka mataboko! a cava vei rau e levu cake, ai madrali, se nai cabocabo-ni-madrali sa vakatabuya nai madrali?

²⁰ O koya sa bubului ka cavuta nai cabocabo-ni-madrali, sa bubului ka cavuta o qori, kei na ka kecega sa koto kina:

²¹ ia ko koya sa bubului ka cavuta na vale ni soro, sa bubului ka cavuta o qori, vei koya talega sa tiko kina:

²² ia ko koya sa bubului ka cavuta na lomalagi, sa bubului ka cavuta nai tikotiko vakaturaga ni Kalou, vei koya talega sa tiko kina.

²³ E ca vei kemudou, na vu-ni-vola kei na Farisi, na dauveivakaisini! ni dou sa solia nai katini ni botebotekoro, kei na veika vakaoqo, ia dou sa biuta laivi na veika bibi e na vunau, nai valavala dodonu, kei na loloma, kei na vakadinata: a ya e kilikili kei kemudou me kitaka, me kakua talega ni biu laivi ko ya.

²⁴ Ai vakavuvuli mataboko! dou sa tauvulona na nana, ia na kameli dou sa tiloma ga.

²⁵ E ca vei kemudou, na vu-ni-vola kei na Farisi, na dauveivakaisini! ni dou sa vakasavasavataka na bilo kei na dari etaudaku, ia na lomana sa sinai e na daubutako kei na garogaro.

²⁶ A Farisi mataboko! mo vakasavasavataka mada na loma ni bilo kei na dari, me mai savasava talega etaudaku.

²⁷ E ca vei kemudou na vu-ni-vola kei na Farisi, na dauveivakaisini! ni dou sa vaka na veivale ni bulubulu ei boro vulavula, era sa rai vinaka etaudaku, ia na lomadra sa sinai e na sui ni mate, kei na ka kecega sa velavela.

²⁸ Sa vaka talega kina koi kemudou, dou sa rairai etaudaku vei ira na tamata me tamata dodonu, ia eloma dou sa sinai e na dauveivakaisini kei na ka e tawa dodonu.

²⁹ E ca vei kemudou na vu-ni-vola kei na Farisi, na dauveivakaisini! ni dou sa tara na nodra veivale ni bulubulu na parofita, ka vakaiukuukutaka na nodra veivale ni bulubulu na tamata yalododonu,

³⁰ ka kaya, Kevaka edatou a bula e na gauna ni nodatou qase, edatou a bese ni lomavata kei ira e na vakamatei ira na parofita.

³¹ O koya o qo dou sa tukuni kemudou kina, ni dou sa luvedra era vakamatei ira na parofita.

³² Ia mo dou vakasinaita nai vakarau ni nomudou qase.

³³ Na gata, a luve ni gata loaloa! dou na dro rawa vakaevei mai na cudruvi mai eli?

³⁴ Ia ka raica, au na tala yani vei kemudou e so na parofita, kei na tamata vuku, kei na vu-ni-vola; ia e so vei ira dou na vakamatea ka vakota ki na kauveilatai; ka so dou na vakanakuitataka e na nomudou veivale ni lotu, ka vakasavi ira mai na koro e dua ki na koro e dua:

³⁵ me yaco kina vei kemudou nai sau ni kedra dra na tamata yalododonu kecega ka vakadavei e vuravura: mai na dra i Epeli na yalododonu ka yaco ki na dra i Sakaria na luve i Para-kia, o koya dou a vakamatea e na tadrua ni vale ni soro kei nai cabocabo-ni-madrali.

³⁶ Au sa kaya vakaidina vei kemudou, A ka kecega o qori ena yaco ki nai tabatamata o qo.

³⁷ I Jerusalemi, Jerusalemi! o iko sa vakamatei ira na parofita, ka viriki ira sa talai yani vei iko, au a nanuma vakavica vata meʼu vakasoqoni ira na nomu gone, me vaka na toa yalewa sa vakasoqoni ira na luvena e ruku ni tabana, ia dou a sega ni vinakata!

³⁸ Raica, sa qai biu vei kemudou na nomudou vale me laladidi:

³⁹ niʼu sa kaya vei kemudou, Dou na sega ni raici au tale, ka malua dou na kaya mada, Sa kalougata ko koya sa lako mai e na yaca ni Turaga.