Maciu 22 - AI VOLA TABU

A vosa vakatautauvata ni solevu ni vakawati, 1-14. Sa vakatakila ko Jisu ni sa dodonu me solia na drawe, 15-22; a sa dina ni na tu cake tale na mate, 23-33. A vu ni vunau na loloma, 34-40. A kawa i Tavita ko Karisito ni sa tamata, a Turaga i Tavita ni sa Kalou, 41-46.

¹ A SA vosa tale ko Jisu, ka tukuna vei ira na vosa vakatautauvata, ka kaya,

² Sa tautauvata na matanitu vakalomalagi kei na dua na tamata sa tui, o koya sa cakava na magiti ni vakawati nei na luvena-tagane;

³ a sa talai ira yani na nonai talatala me ra lakovi ira ka sureti ki na magiti ni vakawati: a ra sa sega ni via lako mai.

⁴ Sa qai tala tale ko koya nai talatala e so tani, ka kaya, Laʼki kaya vei ira era sureti, Raica, kaʼu sa vakarautaka oti na noqui vakayakavi: sa vakamatei e so na noqu karavau, kei na noqu manumanu uro, ka sa vakarautaki oti tu na ka kecega; dou lako mai ki na magiti ni vakawati.

⁵ A ra sa vaka-weleweletaka, a ra sa dui lako, e dua ki na nona were, ka dua ki na nona veivoli:

⁶ ia ko ira na kena vo, era sa tauri ira na nonai talatala, ka vakacacana, ka vakamatea.

⁷ Ni sa qai rogoca na tui ko ya, sa cudru ko koya; a sa vakatalai ira na nonai valu, ka vakawabokotaki ira na daulaba ko ya, ka visa na nodra koro.

⁸ Sa qai kaya ko koya vei ira na nonai talatala, Sa vakarautaki oti tu na magiti ni vakawati, a ra sa sega ni vinaka ko ira ka sureti:

⁹ o koya mo dou qai lako ki na veisalatu, ia ko ira kecega dou na kunea, dou sureti ira mai ki na magiti ni vakawati.

¹⁰ Era sa qai lako yani ko ira nai talatala o qori ki na veisalatu, ka vakasoqoni ira kecega era sa kunea, se ra ca se ra vinaka; a sa mai tiko e so me ra kania na magiti ni vakawati.

¹¹ A sa qai curu mai na tui me raici ira era sa mai tiko me ra kana, a sa raica kina e dua na tamata sa sega ni vakaisulu e nai sulu ni vakawati:

¹² a sa kaya vua, Noqui tau, e vakaevei ni ko sa curu mai kike ni sa sega vei iko nai sulu ni vakawati? A sa vagagalu ga ko koya.

¹³ Sa qai kaya na tui vei ira nai talatala, Dou vauca, a yavana kei na ligana, ka kauti koya tani, ka biuta ki na butobuto etautuba; ena dautagi kina, ka katia na batina.

¹⁴ Ni sa lewe vuqa era sa kacivi, ka lewe lailai era sa digitaki.

¹⁵ SA ra qai lako ko ira na Farisi, a ra bose se ra na coriti koya vakaevei e na vosa.

¹⁶ A ra sa talai ira na nodra tisaipeli vua, kei ira nai tokani i Eroti, me ra kaya, Vakavuvuli, keitou sa kila ni ko sa dina, ka vakatavuvulitaka vakaidina nai valavala sa vinaka vua na Kalou, ia ko sa sega ni rerevaka e dua: ni ko sa sega ni doka na matadra na tamata:

¹⁷ o koya mo qai tukuna vei keitou, A cava ko lewa? sa tara me da solia na drawe vei Sisari, se segai?

¹⁸ A sa kila nodra yaloca ko Jisu, ka kaya, Dou sa dauveretaki au e na vuku ni cava, oi kemudou na dauveivakaisini?

¹⁹ vakatakila mai vei au nai lavo ni drawe. A ra sa kauta mai vua e dua nai lavo [a pene-e-vitu].

²⁰ A sa kaya vei ira ko koya, A mata i cei o qo, kei na yaca sa volai tu?

²¹ Era sa kaya vua, A nei Sisari. Sa qai kaya ko koya vei ira, Mo dou qai solia vei Sisari na ka nei Sisari; vei koya talega na Kalou na ka sa nona na Kalou.

²² Ia ni ra sa rogoca, era sa kidacala; a ra sa laivi koya, ka lako yani.

²³ E na siga ko ya era sa lako mai vei koya e so nai tokani i Satoki, o ira era sa daukaya ni na sega ni tu cake tale na mate, a ra sa taroga,

²⁴ ka kaya, Vakavuvuli, sa kaya ko Mosese, Kevaka sa mate e dua na tamata, ka sega na luvena, erau na veiwatini kei na nona yada ko na tuakana se na tacina, me vakaivakawa kina, vua na tacina se tuakana.

²⁵ Ia ka tiko kei keitou na mataveitacini eratou lewe vitu: a sa vakawati ko koya sa qase, a sa mate, ka sega na luvena, a sa biuta vua na tacina na watina:

²⁶ a sa vaka talega kina nai karua, kei nai katolu, ka yaco ki nai kavitu:

²⁷ a sa qai mate emuri na yalewa:

²⁸ ia e na tu cake tale, ena wati i cei vei iratou na lewe vitu ko koya? ni ratou sa watina ko iratou kecega.

²⁹ A sa vosa ko Jisu, ka kaya vei ira, Dou sa sese, ni dou sa sega ni kila nai Vola, se na kaukauwa ni Kalou:

³⁰ ni ra na tu cake tale na mate, era na sega ni vakawati, se veimusumusukitaki me ra vakawati; era na vakataki ira ga na agilose ni Kalou mai lomalagi.

³¹ Ia e na vuku ni nodra tu cake tale na mate, dou sa sega li ni wilika na ka sa vosataka vei kemudou na Kalou, ni sa kaya,

³² Oi au na Kalou i Eparaama, kei na Kalou i Aisake, kei na Kalou i Jekope? a Kalou sa sega ni nodra Kalou era sa mate, sa nodra ga era sa bula tiko.

³³ Ia ni ra sa rogoca na lewe vuqa, era sa kidacala e na nonai vakavuvuli.

³⁴ Ia ni ra sa rogoca na Farisi ni sa vagalui ira nai tokani i Satoki ko koya, era sa qai soqoni vata.

³⁵ A sa dua vei ira, e dua na vu-ni-vunau, sa tarogi koya, ni sa vakatovolea, ka kaya,

³⁶ Vakavuvuli, a cava nai vakaro levu e na vunau?

³⁷ A sa kaya vua ko Jisu, Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega.

³⁸ Ai matai ni vunau o qo, ka levu:

³⁹ a sa tautauvata kina nai karua, Mo lomana na kai nomu me vakataki iko.

⁴⁰ Sa vu ni vunau taucoko kei ira na parofita na vunau e rua o qo.

⁴¹ Ia ni ra sa soqoni vata tiko na Farisi, sa tarogi ira ko Jisu,

⁴² ka kaya, A cava dou lewa e na vuku i Karisito? a luve i cei ko koya? Era sa kaya vua, A nei Tavita.

⁴³ Sa kaya vei ira ko koya, Sa vakaevei ni sa vakatokai koya me Turaga ko Tavita, ni sa vuna ko na Yalo, ka kaya,

⁴⁴ Sa kaya ko Jiova vua na noqu Turaga, Mo tiko e na ligaqu i matau, meʼu qisi ira mada na nomu meca mei tutu-ni-yavamu?

⁴⁵ Ia kevaka sa vakatokai koya ko Tavita me Turaga, sa luvena vakaevei?

⁴⁶ A sa sega e dua sa kaya rawa e dua na vosa vei koya; a sa sega tale e dua e doudou me vakatarogi koya e na veisiga emuri.