Maciu 20 - AI VOLA TABU

A vosa vakatautauvata ni tamata sa lavaka vei ira na tamata daucakacaka na nona were-ni-vaini, 1-16. Sa vakatakila ko Jisu na nona mate, 17-19. Sa vakavulici iratou na tisaipeli me ratou yalomalumalumu, 20-28. Sa vakabula na mataboko e rua, 29-34.

¹ NI sa tautauvata na matanitu vakalomalagi kei na tamata sa taukena e dua na vale, a sa lako ko koya e na mataka caca me lavaka vei ira e so na tamata daucakacaka na nona were-ni-vaini.

² Ia ni sa veivosaki kei ira na tamata daucakacaka me ra tauyadua na pene-e-vitu e na dua na siga me kedrai voli, sa qai talai ira ki na nona were-ni-vaini.

³ A sa lako ko koya e nai katolu ni tiki-ni-siga, a sa raici ira e so tale era sa tu walega e na rara ni veivoli,

⁴ a sa kaya vei ira, Dou lako talega ki na were-ni-vaini, ia na ka e dodonu, kaʼu na solia vei kemudou. A ra sa lako.

⁵ Sa lako tale ko koya e nai kaono kei nai kaciwa ni tiki-ni-siga, a sa kitaka vakakina.

⁶ Sa qai lako ko koya e nai katinikadua ni tiki-ni-siga, a sa raici ira e so tale era sa tu walega, a sa kaya vei ira, Dou sa tu walega vakacava eke e na siga ka bogicaka?

⁷ Era sa kaya vua, Ni sa sega e dua sa lavaka vei keitou. Sa kaya ko koya vei ira, Dou lako talega ki na were-ni-vaini; ia na ka e dodonu, dou na rawata.

⁸ Ia ni sa yakavi mai, sa kaya na turaga ni were-ni-vaini vua na nonai talatala, Kacivi ira na tamata daucakacaka, ka solia vei ira nai voli, mo vakatekivu vei ira sa muri, mo tinia vei ira sa liu.

⁹ Ia ni sa lako mai ko ira na tamata ni kenai katinikadua ni tiki-ni-siga, era sa tauyadua na pene-e-vitu.

¹⁰ Ia ni sa lako mai ko ira era sa liu, era sa nanuma era na rawata vakalevu cake; ia ka ra sa tauyadua ga na pene-e-vitu.

¹¹ Ia ni ra sa taura, era sa qai didi vua nai taukei ni vale,

¹² ka kaya, O ira o qo era sa muri, sa dua bau na tiki-ni-siga era sa cakacaka kina, ia ko sa vakatautauvatataki keimami kei ira, a keimami sa colata na kena bibi kei na todra ni siga.

¹³ A sa vosa ko koya vua e dua vei ira, ka kaya. Noqui tau, au sa sega ni vakacacani iko: edaru sa sega li ni veivosaki kei iko me vitu wale na nomu pene?

¹⁴ mo kauta o qori sa nomu, ka lako; au na solia ga vua o qo ka muri, me vaka vei iko;

¹⁵ sa sega beka ni tara meʼu veitaliataka na noqu ka? se sa ca beka na matamu niʼu sa yalovinaka?

¹⁶ Ena sa vakakina, ena liu ko ira ka muri, ka na muri ko ira ka liu; ni ra sa lewe vuqa era sa kacivi, a ra sa lewe lailai era sa digitaki.

¹⁷ A sa lako cake ki Jerusalemi ko Jisu, ka sa kauti iratou vakatikitiki tani na tisaipeli e tinikarua mai Da salatu, ka kaya vei iratou,

¹⁸ Raica, edatou sa lako cake ki Jerusalemi; ka na soli yani na Luve ni tamata vei ira na bete levu, kei ira na vu-ni-vola; ia era na lewai koya me mate,

¹⁹ era na qai solia vei ira na matanitu tani me ra vakalialia, ka vakanakuitataka, ka vakota ki na kauveilatai; ena qai tu cake tale mai ko koya e nai katolu ni siga.

²⁰ Sa qai lako mai vua na tinadrau na luve i Sepeteo, kei rau na luvena-tagane, ka cuva, ka kerea vua e dua na ka.

²¹ A sa kaya vua ko koya, A cava ko sa vinakata? Sa kaya vua ko koya, Mo lewa me rau tiko na luvequ o qo, e dua e na ligamu i matau, ka dua e na nomui mawi, e na nomu matanitu.

²² A sa vosa ko Jisu, ka kaya, Dou sa sega ni kila na ka dou kerea: drau sa rawata beka me gunuva na bilo kaʼu na gunuva, kei na papitaisotaki e na papitaiso kaʼu na papitaisotaki kina? Erau sa kaya vua, Keirau sa rawata.

²³ A sa kaya ko koya vei rau, Drau na gunuva dina na mequ bilo, ka papitaisotaki e na papitaiso kaʼu na papitaisotaki kina: ia me tiko e na ligaqu i matau, kei na noqui mawi, sa sega ni noqu meʼu solia vakailoa, vei ira ga sa vakarautaka ko Tamaqu me nodra.

²⁴ Ia ni sa rogoca ko iratou na lewe tini, eratou sa cudru sara vei rau na veitacini.

²⁵ A sa kacivi iratou mai ko Jisu, ka kaya, Dou sa kila, ni ra sa lewai ira na veimatanitu na nodra turaga, a sa veitalia vei ira ko ira sa qaqa.

²⁶ Ia ena sega ni vakakina vei kemudou; ia me nomudoui talatala ga ko koya yadua vei kemudou sa viavialevu:

²⁷ ka me nomudou tamata ko koya yadua vei kemudou sa viaviaturaga:

²⁸ me vaka ni sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa.

²⁹ A ratou sa lako tani mai Jeriko, a sa lewe vuqa sara sa muri koya.

³⁰ Ka raica, e lewe rua na tamata mataboko sa tiko e na tutu ni sala, ia ni rau sa rogoca sa lako voli yani ko Jisu, erau sa kacikaci, ka kaya, Lomani keirau mai, na Turaga, na Luve i Tavita.

³¹ A sa vunauci rau ko ira na lewe vuqa me rau tiko lo: a rau sa qai kaci vakalevu kina, ka kaya, Lomani keirau mai, na Turaga, na Luve i Tavita.

³² Sa qai tu vakadua ko Jisu, ka kacivi rau, ka kaya, A cava drau sa vinakata meʼu cakava vei kemudrau?

³³ Erau sa kaya vua, Turaga, me rai rawa na mata i keirau.

³⁴ Sa qai yalololoma ko Jisu, a sa tara na matadrau: a sa rai vinaka vakasauri na matadrau, a rau sa muri koya.