Maciu 2 - AI VOLA TABU

Ni sa sucu ko Jisu, sa lako mai cake e so na tamata vuku me ra soro vua; a sa kidroa ko Eroti, kei ira kecega na kai Jerusalemi; a sa vereti Jisu ko Eroti me vakamatea, 1-12. Sa drotaki rau na veitinani ki Ijipita ko Josefa, a sa mokuti ira na gonetagane lalai ko Eroti, 13-18. Sa qai mate ko Eroti, a sa lesu tale ki Jutia ko Josefa kei rau na veitinani, 19-23.

¹ IA ni sa sucu ko Jisu mai Pecileema e Jutia e na gauna sa tui kina ko Eroti, raica, e so na tamata vuku mai cake era sa lako mai ki Jerusalemi,

² a ra sa kaya, Evei ko koya sa sucu me nodra tui na kai Jutia? ni keitou a raica na nona kalokalo mai cake, a keitou sa lako mai me soro vua.

³ Ia ni sa rogoca ko Eroti na tui, sa kidroa, kei Jerusalemi taucoko vata kaya:

⁴ ia ni sa vakasoqoni ira vata kecega na bete levu kei ira na nodra vu-ni-vola na tamata, sa tarogi ira ko koya se na sucu evei ko Karisito.

⁵ A ra sa kaya vua, Mai Pecileema e Jutia: ni sa vola vakaoqo na parofita,

⁶ Ia ko iko Pecileema, e na vanua ko Juta, o sa sega ni lailai sara vei ira na veiyasana e Juta: ni na tubu maivei iko e dua na Turaga, o koya ena lewai ira na noqu tamata na Isireli.

⁷ Ia ko Eroti, ni sa kacivi ira lo na tamata vuku, sa qai taroga matua vei ira na gauna sa rairai kina na kalokalo.

⁸ A sa talai ira ki Pecileema, ka kaya, Dou laʼki vakasaqara matua sara na gone lailai; ia ni dou sa kunea, tukuna mai vei au, meʼu laʼki cuva talega vua koi au.

⁹ Ia ni ra sa rogoca na tui, era sa lako; ka raica, na kalokalo era a raica mai cake, sa liutaki ira, a sa laʼki tu vakadua, ni sa donuya na tikina sa koto kina na gone lailai.

¹⁰ Ia ni ra sa raica na kalokalo, era sa reki e na reki levu sara.

¹¹ Ia ni ra sa curu ki na vale, era sa raica na gone lailai kei Meri na tinana, a ra sa cuva sobu, ka soro vua: ia ni ra sa dolava na nodra kato kamunaga, era sa vakacabora vua e so nai solisoli; a koula, kei na drega me vakamai, kei na mura.

¹² Ia ni sa vakasala vei ira e na tadra ko na Kalou me ra kakua ni lako tale vei Eroti, era sa lesu tale ki na nodra vanua e na sala tani.

¹³ Ia ni ra sa lako tani, raica, sa rairai mai vei Josefa e na tadra e dua na agilose ni Turaga, ka kaya, Tu cake, mo kauta na gone lailai kei tinana, ka dro ki Ijipita, ka tiko kina ka malua meʼu tukuna mada vei iko; ni na vakasaqara na gone lailai ko Eroti me vakamatea.

¹⁴ Sa qai tu cake ko koya, ka kauta na gone lailai kei tinana e na bogi, ka lako ki Ijipita:

¹⁵ a sa tiko kina ka malua me mate mada ko Eroti: me vakayacori kina na vosa ni Turaga a ya sa tukuna na parofita, ka kaya, Au a kaciva na luyequ mai Ijipita.

¹⁶ Ia ko Eroti, ni sa kunea ni ra a vakaisini koya ko ira na tamata vuku, sa cudru vakalevu kina, a sa talaki yani, me vakamatei ira kecega na gonetagane lalai era sa tiko mai Pecileema, kei na kena yasana kecega, o ira era yabaki rua kei ira era lailai sobu, me vaka na gauna ka taroga matua ko koya vei ira na tamata vuku.

¹⁷ Sa qai vakayacori na ka sa vosataka ko Yirimia na parofita, ka kaya,

¹⁸ E dua na domo sa rorogo mai Rama, a qoqolou, kei na tagi, kei na somate levu, sa tagicaki ira na luvena ko Rejeli, a sa sega ni via vakacegui, ni ra sa yali.

¹⁹ Ia ni sa mate ko Eroti, raica, e dua na agilose ni Turaga sa rairai vei Josefa mai Ijipita e na tadra,

²⁰ ka kaya, Tu cake, mo kauta na gone lailai kei tinana, ka lako ki na vanua nei Isireli: ni ra sa mate ko ira sa vakasaqara na gone lailai me ra vakamatea.

²¹ A sa tu cake ko koya, ka kauta na gone lailai kei tinana, a sa lako mai ki na vanua nei Isireli.

²² Ia ni sa rogoca ni sa tui mai Jutia ko Arikeleo nai sosomi kei tamana ko Eroti, sa rere ni lako kina: ia ni sa vakasala vua ko na Kalou e na tadra, sa lesu kina ko koya ki na yasayasa vaka-Kalili:

²³ a sa laʼki tiko vakadua mai na koro na yacana ko Nasareci, a sa vakayacori kina na ka era sa vosataka ko ira na parofita, Ena vakatokai ko koya, E dua sa vaka na kai Nasareci.