Maciu 19 - AI VOLA TABU

Sa vakabulai ira sa tauvi-mate ko Jisu, a sa vakavulici ira na tamata me ra kakua ni biuta vakailoa na watidra, 1-12. Sa tabaki ira na gone lalai, 13-15. Sa tarogi Jisu e na ka me bula kina na cauravou vutuniyau; a sa vakavuvuli kina ko Jisu, 16-30.

¹ A SA yaco, ni sa vakaotia ko Jisu na vosa o qo, sa qai lako tani e Kalili, ka yaco ki na yasayasa vaka-Jutia e na tai kadua ni Joritani;

² a ra sa lewe vuqa sara era sa muri koya; a sa vakabulai ira maikea ko koya.

³ A sa lako mai vei koya ko ira na Farisi, ka vakatovolea, ka kaya vua, Sa tara vua na tamata me biuta na watina e na vuku ni ka kecega, se segai?

⁴ A sa vosa ko koya, ka kaya vei ira, Dou a sega beka ni wilika, ni ko koya sa buli rau e nai vakatekivu sa bulia ga ua tagane kei na yalewa,

⁵ a sa kaya, E na vuku ni ka o qo me biuti tamana kina kei na tinana na tamata, ka kabita na watina: a rau na lewe dua?

⁶ O koya o qo erau sa sega kina ni lewe rua tiko, erau sa lewe dua ga: ia na ka sa vauca vata ko na Kalou, me kakua ni tawasea rua na tamata.

⁷ Era sa kaya vua, A cava sa vakarota kina ko Mosese me solia vua nai vola ni veibiu, ka qai biuta tani?

⁸ Sa kaya vei ira ko koya, E na vuku ni nomudou lomakaukauwa sa vosoti kemudou kina ko Mosese mo dou biuta tani na watimudou: ia ka sega ni vakaoqo mai nai vakatekivu.

⁹ Ia kaʼu sa kaya vei kemudou, O koya ena biuta tani na watina, ke sa sega ni dautagane, ka laʼki vakawati kei na dua tani, sa dauyalewa; o koya talega erau laʼki veiwatini kaya sa biu, sa dauyalewa.

¹⁰ Sa kaya vua ko iratou na nona tisaipeli, Ke sa vakaoqo na lewa vua na tamata kei na watina, ke sa vinaka me kakua ni ia na vakawati

¹¹ A sa kaya ko koya vei iratou, Sa sega ni rawata na tamata kecega na ka o qo, o ira ga sa soli vei ira.

¹² Ni sa so sa kua ni vakawati, era sa sucu vakakina mai na kete i tinadra: ka so sa kua ni vakawati, ni sa selevi ira ko ira na tamata: ka so sa kua ni vakawati, ni ra sa qisi ira ga me vakakina e na vuku ni matanitu vakalomalagi. O koya e rawata me vakabauta, me vakabauta.

¹³ Sa qai kau mai vua e so na gone lalai, me tabaki ira ko koya e na ligana, ka masulaka: a sa vunauci ira ko iratou na tisaipeli.

¹⁴ A sa kaya ko Jisu, Laivi ira na gone lalai, ka kakua ni tarovi ira, ni ra sa lako mai vei au; ni sa vakataki ira na lewe ni matanitu vakalomalagi.

¹⁵ A sa tabaki ira e na ligana ko koya, a sa qai lako tani maikea.

¹⁶ Ka raica, sa lako mai e dua, ka kaya vua, Vakavuvuli vinaka, a cava na ka vinaka meʼu kitaka, meʼu rawata kina na bula tawa mudu?

¹⁷ A sa kaya vua ko koya, O sa vakatokai au meʼu vinaka e na vuku ni cava? sa sega e dua tani e vinaka, na Kalou duaduaga; ia kevaka ko sa via curu ki na bula, mo qarava na vunau.

¹⁸ Sa kaya vua ko koya, A vunau cava? A sa kaya ko Jisu, Mo kakua ni laba, Mo kakua ni ia na veibutakoci, Mo kakua ni butako, Mo kakua ni veibeitaki vakailasu,

¹⁹ Vakarokoroko vei rau na tamamu kei na tinamu: ka, Mo lomana na kai nomu me vakataki iko.

²⁰ Sa kaya na cauravou vei koya, A ka kecega o qori kaʼu a vakabauta ga ni kaʼu a sa gone ka yacova na siga o qo; a cava tale sa vo vei au?

²¹ Sa kaya vua ko Jisu, Kevaka ko sa vinakata mo sa vinaka sara, mo lako, mo volitaka na nomui yau, ka solia vei ira sa dravudravua, o na qai vakaiyau mai lomalagi: ia mo lako mai, mo muri au.

²² Ia ni sa rogoca na vosa o qo na cauravou, sa lako tani a sa rara wa na lomana: ni sa levu na nonai yau.

²³ Sa qai kaya ko Jisu vei iratou na nona tisaipeli, Au sa kaya vakaidina vei kemudou, Ena dredre vua na tamata vutuniyau me curu ki na matanitu vakalomalagi:

²⁴ ia kaʼu sa kaya tale vei kemudou, sa rawarawa me curuma na mata ni cula na kameli, ia ka dredre vua na tamata vutuniyau me curu ki na matanitu ni Kalou.

²⁵ Ia ni ratou sa rogoca na nona tisaipeli, eratou sa kidacala sara, ka kaya, O cei ena qai vakabulai rawa?

²⁶ A sa vakaraica ko Jisu, ka kaya vei iratou, O qori e dredre sara vei ira na tamata; a sa rawarawa vua na Kalou na ka kecega.

²⁷ Sa qai vosa ko Petero, ka kaya vua, Raica, keitou sa biuta na ka kece, ka muri iko: a cava ena qai neitou?

²⁸ A sa kaya vei iratou ko Jisu, Au sa kaya vakaidina vei kemudou, Oi kemudou sa muri au, ni na yaco na veivakadodonutaki, ni na tiko na Luve ni tamata e nai tikotiko vakaturaga ni nonai ukuuku, dou na qai tiko talega e nai tikotiko vakaturaga e tinikarua, me lewai ira ua mataqali nei Isireli e tinikarua.

²⁹ Ia ko koya yadua sa biuta na vale, se na veitacini, se na ganena, se na tamana, se na tinana, se na watina, se na luvena, se na vanua, e na vuku ni yacaqu, ena yadrau ena rawata; ena taukena talega na bula tawa mudu.

³⁰ Ia ka ra lewe vuqa sa liu era na muri; kei ira talega sa muri era na liu.