Maciu 18 - AI VOLA TABU

Sa vakavulici iratou na nona tisaipeli ko Jisu me ratou kakua ni viavialevu, 1-6. Me ratou biuta na ka kecega e dauvakacalai iratou, me ratou lomani ira era gone lalai ga e na lotu, 7-14. Sa qai vakatakila ko koya nai valavala e dodonu ni da sa vakacacani, 15-20. Me da kakua ni sauma vei ira era sa vakacacani keda vakavuqa, 21-35.

¹ E NA gauna ko ya sa lako mai vei Jisu ko iratou na tisaipeli, ka taroga, O cei sa levu cake e na matanitu vakalomalagi?

² A sa kaciva mai e dua na gone lailai ko Jisu, a sa vakatura e na kedratou maliwa,

³ a sa kaya, Au sa kaya vakaidina vei kemudou, Kevaka dou sa sega ni saumaki mai, ka yaco me vaka na gone lalai, dou na sega sara ni curu ki na matanitu vakalomalagi:

⁴ ia ko koya sa vakamalumalumutaki koya me vaka na gone lailai o qo, o koya ga sa levu cake e na matanitu vakalomalagi.

⁵ Ia ko koya yadua sa vinakata e dua na gone lailai vakaoqo e na vuku ni yacaqu, sa vinakati au:

⁶ ia ko koya sa vakacala e dua vei ira na lalai o qo era sa vakabauti au, sa vinaka vua kevaka ka vakarubeci e domona e dua na vatu i qaqi levu, ka vakavatudromudromutaki e na wasaliwa titobu.

⁷ Sa ca ko vuravura e na vuku ni veivakacalai! ni sa dredre me sega ni yaco mai na veivakacalai; a sa ca vua na tamata sa vakayacora na vakacalai!

⁸ Ia kevaka sa vakacalai iko na ligamu se na yavamu, muduka tani, ka biuta tani vei iko: sa vinaka vei iko mo curu ki na bula ka yava e dua se liga e dua, a sa ca me rua na ligamu se rua na yavamu ka mo biu ki na buka waqa tawa mudu.

⁹ Ia kevaka sa vakacalai iko na matamu, vecuka tani, ka biuta tani vei iko: sa vinaka vei iko mo curu ki na bula ka dua ga na matamu, a sa ca me rua na matamu ka mo biu ki na eli sa waqa kina na buka.

¹⁰ Raici kemudou vinaka mo dou kakua ni cata e dua vei ira na lalai o qo; niʼu sa kaya vei kemudou, A nodra agilose mai lomalagi era sa raica tikoga na mata i Tamaqu sa tiko mai lomalagi.

¹¹ Ni sa lako mai na Luve ni tamata me vakabulai koya sa yali.

¹² Dou lewa vakaevei? kevaka e dua na tamata sa dua na drau na nona sipi, a sa yali e dua vei ira, ena sega beka ni biuta laivi na ciwasagavulu ka ciwa, ka lako ki na veiulu-ni-vanua me vakasaqarai koya sa yali?

¹³ Ia kevaka sa kunea, au sa kaya vakaidina vei kemudou, ena reki vakalevu e na vuku ni sipi o qo, ka vakalailai ga e na vukudra na ciwasagavulu ka ciwa sa sega ni yali.

¹⁴ Sa vaka talega o qo na Tamamudou sa tiko mai lomalagi, ni sa sega ni vinakata me yali e dua vei ira na lalai o qo.

¹⁵ Ia kevaka sa valavala ca vei iko na wekamu, lako ka vunauca ni drau sa tiko vakai kemudrau ga: kevaka ena rogoci iko, o sa qai rawata na wekamu.

¹⁶ Ia kevaka ena sega ni rogoca, me lewe dua se lewe rua tale mo kauta vata kei iko, me vakadinadinataki na vosa kecega e na gusu ni dautukutuku e le rua se le tolu.

¹⁷ Ia kevaka e bese ni rogoci iratou, tukuna vei ira nai vavakoso-lewe-ni-soro: ia kevaka e bese ko koya ni rogoci ira nai vavakoso-lewe-ni-soro, me qai vaka na tawa lotu kei koya sa kumuna nai vakacavacava vei iko ko koya.

¹⁸ Au sa kaya vakaidina vei kemudou, A ka kecega dou na vauca e vuravura, ena vauci mai lomalagi: ia na ka kecega dou na sereka e vuravura, ena sereki mai lomalagi.

¹⁹ Au sa kaya tale vei kemudou, Kevaka e lewe rua vei kemudou erau lomavata e vuravura, e na ka e dua me rau kerea, ena vakayacora vei rau na Tamaqu sa tiko mai lomalagi.

²⁰ Ia e na tikina sa soqoni vata kina e lewe rua, se lewe tolu, e na yacaqu, au sa tiko kina e na kedratou maliwa.

²¹ Sa qai lako mai vua ko Petero, ka kaya, Turaga, me valavala ca vakavica mada vei au na wekaqu, kaʼu kakua ga ni cudruva? me vakavitu?

²² Sa kaya vua ko Jisu, Au sa sega ni kaya vei iko, Me vakavitu walega: a ya me vakavitusagavulu na vitu.

²³ O koya ga o qo sa vakatauvatani kina na matanitu vakalomalagi kei na dua na tui, sa via tarogi ira na nona tamata.

²⁴ Ia ni sa vakatekivu ko koya me vakataroga, sa qai kau mai vua e dua, sa tini na udolu na nona taledi sa sega ni vakaivolitaki.

²⁵ Ia ni sa sega vua na ka me kenai voli, sa vosa na nona turaga me volitaki ko koya, kei na watina, kei iratou na luvena, kei na ka kecega sa tu vua, me vakaivolitaki kina.

²⁶ Sa qai bale sobu na tamata, ka masuti koya, ka kaya, Turaga, vosoti au mada ga, kaʼu na vakaivolitaka kecega vei iko.

²⁷ Sa qai yalovinaka mai na turaga ni tamata ko ya, a sa sereka, ka biuta ga me kakua ni vakaivoli.

²⁸ A sa lako ki tautuba na tamata ko ya, a sa kunea e dua na nonai tokani, sa tawa vakaivolitaka vua e vitu beka na drau na pene: a sa taura ka kidomoka, ka kaya, Vakaivolitaka mada vei au na ka ko sa sega ni vakaivolitaka oti.

²⁹ Sa qai bale sobu na nonai tokani ki na yavana, a sa vakamasuta, ka kaya, Mo vosoti au mada ga, kaʼu na vakaivolitaka kecega vei iko.

³⁰ A sa bese ko koya: a sa lako ka biuta ki na vale ni veivesu, me vakaivolitaka mada na ka sa sega ni vakaivolitaki oti.

³¹ Ia ko ira na nonai tokani ni ra sa raica na ka sa caka, era sa rarawa vakalevu, a ra sa laʼki tukuna vua na nodra turaga na ka kecega sa caka.

³² Ia na nona turaga, ni sa kacivi koya mai, sa kaya vua, Au a sereki iko, na tamata ca, mai na ka kecega o qori sa sega ni vakaivolitaki, ni ko sa masuti au:

³³ e sega beka ni kilikili kei iko mo yalovinaka vua na nomui tokani, me vaka kaʼu a yalovinaka vei iko?

³⁴ A sa cudru na nona turaga, a sa solia kivei ira nai vakatawa ni vale ni veivesu, me vakaivolitaka mada na ka kecega sa sega ni vakaivolitaki.

³⁵ Ena kitaka vaka talega kina vei kemudou ko Tamaqu vakalomalagi, kevaka dou sega yadua ni sereki ira na wekamudou, mai na vu ni yalomudou, mai nai sau ni nodra caka ca.