Maciu 16 - AI VOLA TABU

Sa via raica e dua nai vakatakilakila ko ira na Farisi, 1-4. Sa vakavulici iratou na nona tisaipeli ko Jisu, me ratou kakua ni vakabauta na nodrai vakavuvuli ca na Farisi, 5-12. Sa nanuma ko ira e so ni sa parofita walega ko Jisu, a sa kila ko iratou na nona tisaipeli ni sa Karisito dina ko koya, 13-20. Sa vakatakila ko Jisu na ka ena vosota, a sa kaya talega me da vosota na ka ca e na vukuna, 21-28.

¹ SA qai lako mai ko ira na Farisi kei ira nai tokani i Satoki, me ra vakatovolei koya, a ra sa masuta me vakatakila vei ira e dua nai vakatakilakila mai lomalagi.

² A sa vosa ko koya, ka kaya vei ira, Ni sa yakavi, dou sa kaya, Ena siga vinaka; ni sa damudamu na lagi:

³ ia e na mataka, Ena siga ca edaidai; ni sa damudamu ka loaloa na lagi. Oi kemudou na dauveivakaisini, dou sa kila rawa na mata ni lagi; ia dou sega beka ni kila rawa na veivakatakilakila ni gauna o qo?

⁴ ai tabatamata ca ka dauyalewa sa dauvakasaqara e dua nai vakatakilakila; ka na sega ni soli kina e dua nai vakatakilakila, ai vakatakilakila ga i Jona na parofita. A sa qai laivi ira yani ko koya, ka lako.

⁵ Ia ni sa tadu ko iratou na nona tisaipeli ki tai kadua, eratou sa guilecava me kauta na madrai.

⁶ Sa qai kaya vei iratou ko Jisu, Dou raica ka qarauni kemudou mai na nodra leveni na Farisi kei nai tokani i Satoki.

⁷ A ratou sa veivosakitaka vakai iratou, ka kaya, Sa ka beka ni datou sa sega ni kauta mai na madrai.

⁸ Ia ni sa kila ko Jisu, sa kaya vei iratou, Oi kemudou sa vakabauta vakalailai, e na vuku ni cava dou sa veinanuyaka kina e na lomamudou, ni dou sa sega ni kauta mai na madrai?

⁹ Dou sa sega beka ni kila rawa mai, se nanuma nai buli madrai e lima vei ira e lewe lima na udolu, ia ka vica nai su dou a vakasinaita?

¹⁰ se nai buli madrai e vitu vei ira ua lewe va na udolu, ia ka vica na sova dou a vakasinaita?

¹¹ E vakaevei ni dou sa sega ni kila rawa kina ni sa sega ni madrai na nodra leveni na Farisi kei nai tokani i Satoki kaʼu sa vosataka vei kemudou mo dou qarauni kemudou maikina?

¹² Eratou sa qai kila ni sa sega ni vosa ko koya me ratou qarauni iratou mai na leveni ni madrai, a ya ga mai na nodrai vakavuvuli ga na Farisi kei nai tokani i Satoki.

¹³ A sa tadu ko Jisu ki na yasayasa vaka-Sisaria-Filipai, a sa tarogi iratou na nona tisaipeli, ka kaya, Era sa kaya na tamata se ko cei koi au na Luve ni tamata?

¹⁴ A ratou sa kaya, E so, Ko Joni na dauveipapitaiso: ia ka so, Ko Ilija; ia ka so tale, Ko Yirimia, se dua tani na parofita.

¹⁵ Sa qai kaya vei iratou ko koya, Ia dou sa kaya se ko cei koi au?

¹⁶ Sa qai vosa ko Saimoni Petero, ka kaya, O iko na Karisito, na Luve ni Kalou bula.

¹⁷ A sa vosa ko Jisu, ka kaya vua, O sa kalougata, Saimoni Pari-Jona: ni sa sega ni vakarairaitaka vei iko na lewe kei na dra, a ya ga na Tamaqu sa tiko mai lomalagi.

¹⁸ Au sa kaya talega vei iko, O iko ko Petero, ia e dela ni vatu o qo kaʼu na tara kina na noqui vavakoso-lewe-ni-soro; ia ena sega ni rawata ko na matamata-ni-koro ni etesi.

¹⁹ Au na solia talega vei iko nai dola ni matanitu vakalomalagi: ia na ka kecega ko na vauca e vuravura, ena vauci mai lomalagi: ia na ka kecega ko na sereka e vuravura, ena sereki mai lomalagi.

²⁰ Sa qai vakarota vei iratou na nona tisaipeli, me ratou kakua ni tukuna vua e dua ni sai Jisu na Karisito ko koya.

²¹ E na gauna ko ya sa vakatekivu kina ko Jisu, me vakatakila kivei iratou na nona tisaipeli, ni sa kilikili kaya me lako ki Jerusalemi, ka vosota na ka e vuqa maivei ira na qase, kei ira na bete levu, kei ira na vu-ni-vola, ka me vakamatei, ka me vakaturi cake tale mai e nai katolu ni siga.

²² Sa qai kauti koya ko Petero, ka vakatekivu me vunauca, ka kaya, Me vakayawa vei iko, na Turaga: na ka o qo ena sega sara ni yaco vei iko.

²³ A sa vuki ko koya, ka kaya vei Petero, Lako tani ki dakuqu, Satani: o sa via vakatarabetaki au; ni ko sa sega ni vakananuma na ka ni Kalou, ia na ka ga ni tamata.

²⁴ Sa qai kaya ko Jisu vei iratou na nona tisaipeli, Kevaka e dua sa via muri au, me kakua ni muria na lomana, ia me colata na nona kauveilatai, ka muri au.

²⁵ Ia ko koya yadua sa via maroroya na nona bula, ena vakayalia: ia ko koya yadua ena vakayalia na nona bula e na vukuqu, ena maroroya.

²⁶ Ia ka cava na kena yaga vua na tamata, kevaka e rawati vuravura kecega, ka vakayalia na yalona? se cava ena solia na tamata mei sau ni yalona?

²⁷ Ni na lako mai na Luve ni tamata e nai ukuuku i Tamana, kei ira vata kaya na nona agilose; ena qai sauma ko koya vei ira yadua na tamata me vaka na nodrai valavala.

²⁸ Au sa kaya vakaidina vei kemudou, Sa tu eke e so, era na sega ni tovolea na mate, era na raica mada na Luve ni tamata ni sa lako mai e na nona matanitu.