Maciu 15 - AI VOLA TABU

Sa vunauci ira na Farisi kei ira na vu-ni-vola ko Jisu, ni ra sa vakabauta na vosa ni tamata ka biuta na vosa ni Kalou, 1-9. Sa vakatakila ni sa vu ni ka ca kecega na yalo ni tamata, 10-20. A sa Vakabula na nona gonealewa e dua na kai Kenani, 21-28; kei ira na lewe vuqa, 29-31. Sa vakani ira na lewe vuqa, 32-39.

¹ SA qai lako mai vei Jisu ko ira na vu-ni-vola kei ira na Farisi mai Jerusalemi, ka kaya,

² Sa talaidredre ko ira na nomu tisaipeli ki na nodrai vakavuvuli na qase e na vuku ni cava? ni ra sa sega ni vuluvulu na ligadra ni ra sa kana.

³ A sa vosa ko koya, ka kaya vei ira, Dou sa talaidredre talega ki na vunau ni Kalou e na nomudoui vakavuvuli e na vuku ni cava?

⁴ Ni sa vakarota na Kalou, ka kaya, Vakarokoroko vei rau na tamamu kei na tinamu: ia, Ko koya sa vosavakacacataka na tamana se na tinana, me sa vakamatei.

⁵ Ia dou sa kaya, O koya yadua ena kaya vei tamana se tinana, Sa tabu na noqu ka sa yaga vei iko:

⁶ sa sega ni tara vei koya me vakarokoroko vei tamana se tinana. Ia dou sa vakawaletaka na vunau ni Kalou e na nomudoui vakavuvuli.

⁷ A dauveivakaisini koi kemudou! sa tukuni kemudou vinaka eliu ko Isaia, ni sa kaya,

⁸ O ira na tamata o qo era sa toro voleka vei au e na gusudra, a ra sa vakarokorokotaki au e na bele-ni-gusudra: ia na yalodra sa yawa tani vei au:

⁹ a sa sega ni yaga na nodra masuti au, ni ra sa vakatavuvulitaka na vunau ni tamata mei vakavuvuli.

¹⁰ A sa kacivi ira mai na lewe vuqa, ka kaya vei ira, Dou rogoca, ka vakasama:

¹¹ a ka sa curu ki na gusu sa sega ni vakadukadukalitaka na tamata; ia na ka ga sa lako mai na gusuna, o koya ga o qori sa vakadukadukalitaka na tamata.

¹² Sa qai lako mai ko iratou na nona tisaipeli, ka kaya vua, O sa kila beka era sa lomaca na Farisi, ni ra sa rogoca na vosa ko ya?

¹³ A sa vosa ko koya, ka kaya, A kau vakaaduaga, e sega ni tea ko Tamaqu vakalomalagi, ena cavu laivi.

¹⁴ Dou laivi ira tu yani: era sa mataboko, a ra sa tuberi ira na mataboko. Ia kevaka e tubera na mataboko na mataboko, erau ua sikalutu ruarua ki na keli.

¹⁵ Sa qai vosa ko Petero, ka kaya vua, Tukuna mai vei keitou na vosa vakatautauvata o qori.

¹⁶ A sa kaya ko Jisu, Oi kemudou talega, dou sa tawa kila rawa tu, ne?

¹⁷ Dou sa sega beka ni kila, na ka kecega sa curu ki na gusu sa lutu ki kete, a sa biu yani ki nai benubenu?

¹⁸ Ia na veika sa curu yani mai na gusu, sa lako dina mai na yalo; a veika ga o qo sa vakadukadukalitaka na tamata.

¹⁹ Ni sa curu yani mai na yalo na nanuma ca, na daulaba, na dauyalewa, na daudara, na daubutako, na veibeitaki vakailasu, na vosa vakacaoa:

²⁰ a veika ga o qori sa vakadukadukalitaka na tamata: ia ka sega ni vakadukadukalitaka na tamata, ni sa kana ka sega ni vuluvulu mada na ligana.

²¹ Sa qai lako tani maikeri ko Jisu, ka lako ki na veiyasana i Teiri kei Saitoni.

²² Ka raica, sa dua na yalewa ni Kenani sa lako mai na yasana ko ya, a sa tagi vua, ka kaya, Lomani au mai, Turaga, na Luve i Tavita; na luvequ-yalewa sa rarawa vakalevu ni sa curumi koya e dua na tevoro.

²³ A sa tawa kaya vua e dua na vosa ko koya. A ratou sa lako mai na nona tisaipeli ka masuti koya, ka kaya, Vakatalai koya tani; ni sa mai tagi muri kedatou tikoga.

²⁴ A sa vosa ko koya, ka kaya, Au sa sega ni talai mai, a ya ga kivei ira na sipi ni mataqali i Isireli era yali tu.

²⁵ Sa qai lako mai na yalewa, ka cuva vua, ka kaya, Turaga, vukei au mai.

²⁶ A sa vosa ko koya, ka kaya, Sa sega ni vinaka me kauta na kedra na gone, ka biuta vei ira na koli.

²⁷ A sa kaya na yalewa, E dina ya, Turaga: ia ko ira na koli era kania na meme ni kakana sa qeqera mai nai kanakana ni nodra turaga.

²⁸ Sa qai vosa ko Jisu, ka kaya vua, Yalewa, sa levu na nomu vakabauta: me yaco vei iko me vaka na ka ko vinakata. A sa bula na luvena-yalewa e na tiki-ni-siga ko ya.

²⁹ A sa lako tani maikea ko Jisu, ka lako voleka ki na wai mai Kalili; a sa cabe ki na ulu-ni-vanua, ka tiko sobu kina.

³⁰ A ra sa lewe vuqa sara sa lako mai vua, era sa kauta mai e so na lokiloki, na mataboko, na galu, na gera, kei ira tale e so era lewe vuqa; a ra sa tauci ira sobu ki na yava i Jisu; a sa vakabulai ira ko koya:

³¹ a ra sa kidacala kina ko ira na lewe vuqa, ni ra sa raica ni sa vosa rawa na galu, sa bula na gera, sa lako rawa na lokiloki, a sa rai rawa na mataboko: a ra sa vakarokorokotaka na Kalou nei Isireli.

³² Sa qai kacivi iratou mai na nona tisaipeli ko Jisu, ka kaya, Au sa lomani ira na lewe vuqa, ni sa qai bogi tolu era sa tiko ga vei au, a sa sega na ka me ra kania: ia kaʼu sa sega ni via vakatalai ira yani ni ra sa sega ni kana, de ra malumalumu e na gau-ni-sala.

³³ A sa kaya vua ko iratou na nona tisaipeli, Edatou na rawata maivei na madrai e lekutu, me ra mamau kina ko irana lewe vuqa o qo?

³⁴ A sa kaya vei iratou ko Jisu, E vica nai buli madrai sa tu vei kemudou? A ratou sa kaya, E vitu, kei na ika lalai e so.

³⁵ A sa vosa ko koya vei ira na lewe vuqa me ra tiko sobu e na qele.

³⁶ A sa taura ko koya nai buli madrai e vitu kei na ika, a sa vakavinavinaka, a sa dovia, a sa solia vei iratou na nona tisaipeli, ia ko iratou na tisaipeli vei ira na lewe vuqa.

³⁷ A ra sa kana kecega, a ra sa mamau: a ra sa tomika vata na vo ni ka sa dovi, a sa vitu na sova sa sinai kina.

³⁸ Ia ko ira sa kana era sa lewe va na udolu na tagane, ia ko ira na yalewa kei na gone era sa tawa wili.

³⁹ A sa talai ira yani na lewe vuqa ko koya, a sa qai vodoka na waqa, a sa tadu ki na yasayasa vaka-Makitala.