Maciu 14 - AI VOLA TABU

Ni sa rogoca ko Eroti nai rogorogo kei Jisu, sa kaya ni sai Joni na dauveipapitaiso, 1, 2. A ka ka vakamatei Joni kina ko Eroti, 3-12. Sa lako ko Jisu ki na dua na vanua lala, a sa vakani ira na lewe vuqa, 12-21. Sa lako ko Jisu e na dela ni wai vei iratou na nona tisaipeli, 22-33. Ni sa udu ki Kenisareti, sa vakabulai ira era tauvi-mate, 34-36.

¹ E NA gauna ko ya sa rogoca ko Eroti na turaga nai rogorogo kei Jisu;

² a sa kaya vei ira na nona tamata, O koya o qo ko Joni na dauveipapitaiso; sa tu cake tale ko koya mai na mate; o koya sa cakacaka kina vei koya na kaukauwa mana.

³ Ni sa tauri Joni eliu ko Eroti, a sa vesuka, ka biuta ki na vale ni veivesu e na vuku i Erotia, na wati i Filipo na tacina:

⁴ ni sa kaya vua ko Joni, E sega ni tara mo drau veiwatini kaya.

⁵ Ia ni sa via vakamatea ko koya, sa rerevaki ira na lewe vuqa, ni ra sa vakasama ni sa parofita ko koya.

⁶ Ia ni sa ia na solevu ni siga ni sucu i Eroti, sa meke votu na luvena-yalewa ko Erotia, a sa rekitaka ko Eroti.

⁷ O koya o qo sa yalata kina vua ko koya e na bubului me solia vua na ka kecega ena kerea.

⁸ Ia ni sa vakavulici koya mada eliu ko tinana, sa kaya ko koya, Solia mai vei au eke e na dua na dari na ulu i Joni na dauveipapitaiso.

⁹ Sa qai rarawa na lomana na tui: a sa kaya ga me soli, e na vuku ni nona bubului, kei na vukudra talega era sa tiko vata kaya me kana.

¹⁰ A sa talaki ko koya ka tamusuka na ulu i Joni e na vale ni veivesu.

¹¹ A sa kau mai na uluna e na dua na dari, a sa soli vua na gonealewa: a sa kauta ko koya vei tinana.

¹² Sa qai lako mai ko iratou na nona tisaipeli, a ratou sa kauta na yagona, ka buluta; a ratou sa qai laʼki tukuna vei Jisu.

¹³ Ia ni sa rogoca ko Jisu, sa soko vakatikitiki tani maikea e na waqa ki na dua na vanua lala: ia ni sa rogoca ko ira na lewe vuqa, era sa muria, a ra sa taubale e vanua mai na veikoro.

¹⁴ A sa lako mai ko Jisu, ka raici ira era sa lewe vuqa sara, a sa lomani ira, a sa vakabulai ira na nodra tauvi-mate.

¹⁵ Ia ni sa yakavi mai, sa lako maivei koya ko iratou na nona tisaipeli, ka kaya, O qo na vanua lala, a sa vakalakala na siga; mo vakatalai ira yani na le vuqa, me ra lako ki na Veikoro lalai, me ra volia kina na kedra.

¹⁶ A sa kaya vei iratou ko Jisu, E sega ni yaga me ra lako; dou solia vei ira me ra kana.

¹⁷ Eratou sa qai kaya vua, E sega ga vei keitou eke, e lima walega nai buli madrai, kei na ika e rua.

¹⁸ A sa kaya ko koya, Dou kauta mai kike vei au.

¹⁹ Sa qai vosa ko koya vei ira na lewe vuqa me ra tiko sobu e na co, a sa taura nai buli madrai e lima, kei na ika e rua, a sa ta cake ki lomalagi, ka vatonaka, a sa dovia na veibuli madrai, ka solia vei iratou na tisaipeli, ia ko iratou na tisaipeli vei ira na lewe vuqa.

²⁰ A ra sa kana kecega, a ra sa mamau: a ra sa tomika vata na vo ni ka sa dovi, a sa tinikarua nai su sa sinai kina.

²¹ Ia ko ira sa kana era sa lewe lima beka na udolu na tagane, ia ko ira na yalewa kei na gone era sa tawa wili.

²² A sa qai vakarota sara ko Jisu vei iratou na nona tisaipeli me ratou vodoka na waqa, me ratou liutaki koya ki tai kadua, me sa vakatalai ira mada yani na lewe vuqa ko koya.

²³ Ia ni sa vakatalai ira oti yani na lewe vuqa, sa cabe ko koya vakatikitiki tani ki na ulu-ni-vanua, me masu ia ni sa yakavi mai, sa tiko duaduaga kina ko koya.

²⁴ A sa qai tiko e loma ni wai na waqa, a sa suaigelegele e na ua: ni sa cagi leca.

²⁵ Ia e nai kava ni wase ni bogi sa lako vei iratou ko Jisu, a sa lako voli e na dela ni wai.

²⁶ Ia ni sa raica ko iratou na tisaipeli, ni sa lako voli ko koya e na dela ni wai, eratou sa kidroa, ka kaya, O qori sa dua na yalo; a ratou sa qoqolou, ni ratou sa rere.

²⁷ A sa vosa sara vei iratou ko Jisu, ka kaya, Dou vakacegu; koi au ga; dou kakua ni rere.

²⁸ A sa vosa vei koya ko Petero, ka kaya, Turaga, kevaka sai iko, kacivi au meʼu bau yani vei iko e na dela ni wai.

²⁹ A sa kaya ko koya, Lako ga mai. Ia ni sa kevu sobu mai na waqa ko Petero, sa lako e na dela ni wai, me lako vei Jisu.

³⁰ Ia ni sa raica sa kaukauwa na cagi, sa qai rere; ia ni sa vakatekivu me lutu dromu, sa kaci sara, ka kaya, Turaga, vakabulai au.

³¹ Sa qai dodoka sara na ligana ko Jisu, a sa taura, ka kaya vua, O iko sa vakabauta vakalailai, o sa vakatitiqa e na vuku ni cava?

³² Ia ni rau sa vodoka na waqa, sa ruru na cagi.

³³ Ia ko iratou sa tiko mai na waqa, eratou sa lako mai ka cuva vua, ka kaya, Sa dina ni ko sa Luve ni Kalou.

³⁴ A ratou sa lako ki tai kadua, a ratou sa yaco ki na vanua ko Kenisareti.

³⁵ Ia ni ra sa kilai koya ko ira na tamata mai na yasana ko ya, era sa talaki ki na yasana kecega sa vakavolivolita, a ra sa kauti ira kecega mai vua era sa tauvi-mate;

³⁶ a ra sa masuti koya me ra tara walega na tutu ni nonai sulu; a ra sa bula sara ko ira kecega sa tara.