Maciu 13 - AI VOLA TABU

A vosa vakatautauvata ni tamata kaburaki sila, kei na kenai balebale, 1-23. A sila vinaka kei na sila ca, 24-30; kei na sore ni musita, 31, 32; kei na leveni, 33. Ai balebale ni sila vinaka kei na sila ca, 34-43. E vaka nai yau sa vuni tu na matanitu vakalomalagi, 44; e vaka na mata-ni-civa talei sara, 45, 46; e vaka na lawa ni yavi, 47-50. Sa tarabe e na vuku i Jisu ko ira na kai nona, 53-58.

¹ E NA siga ko ya sa lako tani e na vale ko Jisu, ka tiko sobu e matasawa.

² A sa lewe vuqa sara era sa soqoni vata vei koya, a sa vodoka kina na waqa ko koya, ka tiko sobu; a sa tu kecega e na matasawa na lewe vuqa.

³ A sa vuqa na ka sa vosataka vei ira ko koya e na vosa vakatautauvata, ka kaya: Raica, sa dua na daukaburaki sa laʼki kabukaburaki;

⁴ ia ni sa kabukaburaki lako, sa lutu e so e na tutu ni sala, a sa lako mai na manumanu ni lagi ka kania.

⁵ A sa lutu e so ki na vanua veivatu, sa sega ni levu kina na qele: a sa tubu cake vakasauri sara, ni sa sega ni vavaku na kena qele:

⁶ ia ni sa cabe na siga, sa malai; ia ni sa sega na wakana, sa raqosa sara.

⁷ A sa lutu e so ki na veiwa-vakavotona; a sa tubu cake na veiwa-vakavotona, ka vakaruguta.

⁸ A sa lutu e so ki na vanua vinaka, a sa vuavuai vinaka, sa vuai drau e so, a sa onosagavulu e so, a sa tolusagavulu e so.

⁹ 0 koya sa vakadaligana me rogoca, me mani rogoca sara.

¹⁰ Sa qai lako mai ko iratou na tisaipeli, ka tarogi koya, O sa vosa tikoga vei ira e na vosa vakatautauvata e na vuku ni cava?

¹¹ Sa qai vosa ko koya, ka kaya vei iratou, Ni sa soli vei kemudou me kila na veika vuni ni matanitu vakalomalagi, ia ka sega ga ni soli vei ira.

¹² Ni sa dua na kei ke sa tu vua na tamata, ena qai soli vua ka na levu na nona; ia na tamata ke sa sega ni tu vua e dua na ka, ena qai kau tani mai vua na ka sa tu vua.

¹³ O koya o qo kaʼu sa vosa kina vei ira e na vosa vakatautauvata: ni ra sa raica ka sega ni raica; a ra sa rogoca ka sega ni rogoca, ka lecava.

¹⁴ Ia sa vakayacori kina vei ira na parofisai i Isaia, ka vaka, Dou na daurogoca tikogi, ka lecava tu; ia dou na dauraica tikogi, ka sega ni kunea;

¹⁵ ni sa uro mai na lomadra na tamata o qo, a sa didivara na daligadra, a sa bobo na matadra; de dua na siga ena rai na matadra, ka rogo na daligadra, ka kila na lomadra, a ra saumaki mai, ia kaʼu na vakabulai ira.

¹⁶ A sa kalougata na matamudou, ni dou sa raica, kei na daligamudou, ni dou sa rogoca.

¹⁷ Niʼu sa kaya vakaidina vei kemudou, Era lewe vuqa na parofita kei na tamata yalododonu era a via raica na ka dou sa qai raica, a ra a sega ni raica; ka rogoca na ka dou sa qai rogoca, a ra a sega ni rogoca.

¹⁸ O koya mo dou qai rogoca na vosa vakatautauvata ni daukabukaburaki:

¹⁹ Ni sa dua e rogoca na vosa ni matanitu, ka lecava tiko, sa qai lako mai na vu-ni-ca, a sa kovea na ka sa kaburaki ki lomana. Sai koya o qo sa kaburaki e na tutu ni sala.

²⁰ Ia ko koya sa kaburaki e na vanua veivatu, sai koya o qo sa rogoca na vosa, a sa vakabauta vakasauri e na reki:

²¹ ia ni sa sega na wakana e lomana, sa tu dede vakalailai ga: ia ni sa tubu na rarawa, se na veivakacacani e na vuku ni vosa, sa tarabe sara.

²² Ia ko koya sa kaburaki e na veiwa-vakavotona, sai koya o qo sa rogoca na vosa: ia na lomaocaoca e na vuku ni vuravura o qo, kei nai yau e dauveivakaisini, sa vakaruguta na vosa, a sa sega kina ni vua.

²³ Ia ko koya sa kaburaki e na vanua vinaka, sai koya o qo sa rogoca na vosa, a sa kila na kenai balebale; a sa vua, ka vuai drau e so, sa onosagavulu e so, sa tolusagavulu e so.

²⁴ Sa dua tale na vosa vakatautauvata sa tukuna vei ira ko koya, ka kaya, Sa vakatauvatani na matanitu vakalomalagi kei na dua na tamata sa kaburaka na sila vinaka e na nona were;

²⁵ ia ni sa moce ko ira na tamata, sa lako mai na nona meca ka kaburaka vata na sila ca e na loma ni witi, a sa qai lako yani.

²⁶ Ia ni sa tubu mai na sila ka vua, sa qai rairai talega na sila ca.

²⁷ Sa qai lako mai vua na kenai taukei ko ira na nona tamata, ka kaya vua, O a sega, saka, li ni kaburaka na sila vinaka e na nomu were? sa qai kau maivei na sila ca?

²⁸ Sa qai kaya ko koya vei ira, A ka o qo sa kitaka e dua na meca. A ra sa kaya vua ko ira na tamata, O sa vinakata beka me keitou laʼki kumuna vata o qori?

²⁹ A sa kaya ko koya, Tei kakua mada, de dou cavuraka talega na witi ni dou kumuna vata na sila ca:

³⁰ laiva ga me rau tubu vata ruarua me tei cava mada, na yabaki: ia ni sa cava na yabaki kaʼu na kaya vei ira nai vakatau-ni-yabaki, Dou kumuna vata mada na sila ca, ka vauca e na veivau me visa: ia dou kumuna vata na witi ki na noqu lololo.

³¹ Sa dua tale na vosa vakatautauvata sa tukuna vei ira ko koya, ka kaya, Sa tautauvata na matanitu vakalomalagi kei na dua na sore ni musita, a ya sa kauta e dua na tamata, ka tea e na nona were:

³² ia ko ya sa lailai sobu e na sore ni kau kecega; ia ni sa tubu cake, sa levu cake e na kau lalai, a sa yaco me kau dina, a sa laʼki ro e na tabana na manumanu ni lagi.

³³ Sa dua tale na vosa vakatautauvata sa tukuna vei ira ko koya: Sa tautauvata na matanitu vakalomalagi kei na leveni, sa kauta e dua na yalewa, ka vunia e loma ni madrai droka e tolu nai vakarau, ka malua me vakalevenitaki kece mada ga.

³⁴ Na ka kecega o qo sa tukuna ko Jisu kivei ira na lewe vuqa e na vosa vakatautauvata; a sa sega ni vosa walega vei ira, sa vosavakatautauvata tikoga:

³⁵ o koya o qo sa vakayacori kina na vosa sa tukuna na parofita, ni sa kaya, Au na dalaga na gusuqu e na vosa vakatautauvata; au na tukuna e so na ka sa vuni tu mai na gauna sa caka kina ko vuravura.

³⁶ Sa qai talai ira yani na le vuqa ko Jisu, ka curu ki vale: a sa lako mai vua ko iratou na nona tisaipeli, ka kaya, Tukuna mai vei keitou na vosa vakatautauvata ni sila ca mai na were.

³⁷ A sa vosa ko koya, ka kaya vei iratou, O koya sa kaburaka na sila vinaka, ko ya na Luve ni tamata:

³⁸ ia na were ko vuravura; ia na sila vinaka ko irana gone ni matanitu; ia na sila ca ko ira na luvena na vu-ni-ca:

³⁹ ia na meca sa kaburaki ira ko na tevoro: ia na yabaki nai vakataotioti kei vuravura; ia nai vakatau-ni-yabaki ko ira na agilose.

⁴⁰ Ia me vaka ni sa kumuni vata na sila ca ka visa e na buka; ena vakakina e nai vakataotioti kei vuravura o qo:

⁴¹ ena talai ira yani na nona agilose na Luve ni tamata, me ra soqona vata mai na nona matanitu na ka kecega sa dauveivakacalai, kei ira sa kitaka tiko na ka ca;

⁴² ia era na biuti ira ki na lovo ni buka waqa; era na dautagi kina, ka katia na batidra.

⁴³ Era na qai serau na tamata yalododonu, me vaka na siga, e na matanitu i Tamadra. O koya sa vakadaligana me rogoca, me mani rogoca sara.

⁴⁴ Sa dua tale, sa tautauvata na matanitu vakalomalagi kei nai yau sa vuni tu e na dua na were: a sa dua na tamata sa kunea, ka sega ni tukuna, ia ni sa rekitaka, sa laʼki volitaka na ka kecega sa tu vua, a sa volia na were ko ya.

⁴⁵ Sa dua tale, sa tautauvata na matanitu vakalomalagi kei na tamata dauveivoli, sa vakasaqara e so na mata-ni-civa vinaka:

⁴⁶ ia ni sa kunea e dua na mata-ni-civa talei sara, sa lako ka volitaka na ka kecega sa tu vua, ka volia na ka ko ya.

⁴⁷ Sa dua tale, sa tautauvata na matanitu vakalomalagi kei na lawa-ni-yavi, sa viritaki ki wai, a sa vakasoqona vata e so mai na mataqali kecega;

⁴⁸ ia ni sa sinai, era sa yavia ki matasawa, a ra sa tiko sobu, ka tugana na kena vinaka ki nai su e so, ka biuta tani na kena ca.

⁴⁹ Ena vakakina e nai vakataotioti kei vuravura: era na lako mai na agilose, ka tawasei ira tani na yaloca maivei ira na yalododonu,

⁵⁰ ka biuti ira laivi tu ki na lovo ni buka waqa: era na dautagi kina, ka katia na batidra.

⁵¹ Sa kaya ko Jisu vei iratou, Dou sa kila nai balebale ni ka kecega o qo? Eratou sa kaya vua, Io, Turaga.

⁵² Sa qai kaya ko koya vei iratou, Ia na vu-ni-vola kecega sa vakatavulici e na ka ni matanitu vakalomalagi, sa tautauvata kei na tamata sa taukena e dua na vale, o koya sa kauta mai mai na nona lololo na veika vou kei na veika makawa talega.

⁵³ A sa yaco, ni sa vakaotia ko Jisu na vosa vakatautauvata kece o qo, sa lako tani maikea.

⁵⁴ Ia ni sa tadu ki na nona vanua, sa vakavulici ira ko koya e na nodra vale ni lotu, a ra sa kidacala kina, ka kaya, E rawata maivei ko koya o qo na vuku o qo, kei na caka-mana?

⁵⁵ sa sega li ni luve ni matai ko koya o qo? sa sega li ni yaca i tinana ko Meri? kei na tacina ko Jemesi, kei Josese, kei Saimoni, kei Juta?

⁵⁶ kei na ganena, eratou sa sega li ni tiko vata kece kei keda? sa qai rawata maivei ko koya o qo na ka kecega o qo?

⁵⁷ A ra sa tarabe e na vukuna. A sa kaya vei ira ko Jisu, Sa vakarokorokotaki na parofita e na veivanua tani, a sa sega ga e na nona vanua, se nona vale.

⁵⁸ Ia ka sega ni caka vakavuqa maikeri na caka-mana, e na vuku ni ra sa sega ni vakabauta.