Maciu 11 - AI VOLA TABU

Sa mai tarogi Jisu e lewe rua na tisaipeli i Joni na dauveipapitaiso se na Karisito ko koya se segai, a sa tukuna ko Jisu ni sai koya, 1-6. Sa qai tukuni Joni ko Jisu, 7-15. Sa vunauci ira na kai Jutia ni ra sa beitaki Joni kei koya talega, 16-19. Sa vunauci ira vakalevu na kai Koresini kei Peciseita, kei Kaperinaumi, 20-24. Sa qai vakavinavinaka vei Tamana ni sa vakavulici ira sa vinakata ko koya, 25-27. Sa kaya me vakararavi vei koya ko ira sa via vakacegui, 28-30.

¹ IA ni sa vakaotia ko Jisu na nona vakaroti iratou na nona tisaipeli e tinikarua, sa lako tani maikea, ka laʼki vakatavuvuli ka vunau e na veikoro o qori.

² IA ni sa rogoca ko Joni mai na vale ni veivesu na cakacaka i Karisito, sa qai tala e lewe rua na nona tisaipeli,

³ me kaya vua, O iko beka ko Koya e lako mai, se da namaka e dua tani?

⁴ A sa vosa ko Jisu, ka kaya vei rau, Drau lako, ka tukuna vei Joni na veika drau sa rogoca ka raica:

⁵ Era sa rai na mataboko, ka lako na lokiloki; sa vakasavasavataki na vukavuka, ka rogo rawa na didivara; sa vakaturi cake tale na mate sara, a sa vunautaki nai tukutuku-vinaka vei ira sa dravudravua.

⁶ A sa kalougata ko koya ena sega ni tarabe e na vukuqu.

⁷ Ia ni rau sa lako tani, sa vakatekivu ko Jisu me kaya vei ira na lewe vuqa e navuku i Joni, A cava dou a lakova ki na veikau mo dou raica? a gasau li sa yavalati e na cagi?

⁸ ia ka cava dou a lakova mo dou raica? a tamata li sa vakaisulu e nai sulu malumalumu? raica, o ira sa vakaisulu e nai sulu malumalumu, era, sa tiko e na nodra veivale na tui.

⁹ Ia ka cava dou a lakova mo dou raica? a parofita li? io, au sa kaya vei kemudou, e dua sa uasivia na parofita.

¹⁰ Ni sai koya o qo ka volai vakaoqo, Raica, au sa tala na noqui talatala me liu e matamu, ena caramaka ko koya na nomu sala e matamu.

¹¹ Au sa kaya vakaidina vei kemudou, Sa sega ni tubu e dua vei ira sa sucu mai na yalewa me uasivi vei Joni na dauveipapitaiso; ia ko koya sa lailai sara e na matanitu vakalomalagi sa uasivi vei koya.

¹² Ia mai na gauna i Joni na dauveipapitaiso ka yacova na siga o qo, sa rawa na matanitu vakalomalagi e na kaukauwa, ia ko ira sa valavala vakaukauwa, era sa taukena.

¹³ Ni ra sa dauvakatavuvuli kecega na parofita kei na vunau ka yacova na siga i Joni.

¹⁴ Ia kevaka dou sa via vakabauta, o koya o qo ko Ilija, o koya sa dodonu me lako mai.

¹⁵ O koya sa vakadaligana me rogoca, me mani rogoca sara.

¹⁶ Ia ka cava meʼu na vakatautauvatataka kina nai tabatamata o qo? Sa tautauvata kei ira na gone sa tiko e na rara ni veivoli, ka kaci yani vei ira era sa tiko vata kei ira,

¹⁷ ka kaya, Keitou a uvu bitu vei kemudou, ka dou a sega ni meke; keitou a tagi vei kemudou, ka dou a sega ni tagiyaso.

¹⁸ Ni sa lako mai ko Joni ka sega ni daukana se daugunu, a ra sa kaya, Sa tu vua e dua na tevoro.

¹⁹ Sa lako mai na Luve ni tamata, a sa kana ka gunu, a ra sa kaya, Raica, a tamata daukana ka daugunu waini, a nodrai tau era kumuna nai vakacavacava, kei ira na tamatai valavala ca. A sa vakadonuya na vuku ko ira na luvena.

²⁰ Sa qai vakatekivu ko koya me vunauci ira na veikoro ka kitaki kina e vuqa na nona caka-mana, ni ra sa sega ni veivutuni:

²¹ E ca vei iko, Koresini! e ca vei iko, Peciseita! ia ke sa caka mai Teiri kei Saitoni na veika-mana ka caka vei kemudrau, ke rau sa veivutuni makawa e nai sulu taqarotu kei na dravusa:

²² au sa kaya talega vei kemudrau, Ena ca vakalailai ko Teiri kei Saitoni e na siga ni lewa, oi kemudrau, drau na ca vakalevu.

²³ O iko talega, Kaperinaumi, o sa laveti cake ki lomalagi, o na biu sobu tale ki etesi: ia ke sa caka mai Sotoma na veika-mana ka caka vei iko, ke sa tu ga ka yacova na siga o qo.

²⁴ Au sa kaya talega vei iko, Ena ca vakalailai ko Sotoma e na siga ni lewa, o iko, ko na ca vakalevu.

²⁵ E na gauna ko ya sa vosa kina ko Jisu, ka kaya, Au sa vakavinavinaka vei iko, Tamaqu, na Turaga ni lomalagi kei vuravura, ni ko sa vunia na veika o qo vei ira na vuku kei na yalomatua, a sa vakatakila ga vei ira na gone lalai:

²⁶ sai koya ga, Tamaqu, ni sa vinaka e matamu me vakaoqo.

²⁷ Sa solia mai vei au ko Tamaqu na ka kecega: ia ka sega e dua tale e kila na Luvena, a Tamana duaduaga; se dua tale e kila na Tamana, a Luvena duaduaga, kei koya sa vinakata ko na Luvena me vakatakilai koya vua.

²⁸ Dou lako mai vei au, oi kemudou vakaaduaga sa oca ka colata nai colacola bibi, ia kaʼu na vakacegui kemudou.

²⁹ Vaka-taqara vei kemudou na noqui vua, ka vuli vei au; niʼu sa yalomatua ka yalomalumalumu: dou na kunea kina na vakacegu ni yalomudou.

³⁰ Ni sa rawarawa na noqui vua, ka mamada na noqui colacola.