Maciu 10 - AI VOLA TABU

Sa talai iratou yani na nonai apositolo ko Jisu eratou sa lewe tinikarua, me ratou vakavulici ira na kai Jutia, ka vakabulai ira na mate, 1-10. Sa vakaroti iratou e na nodratoui valavala, 11-15. A sa vakacegui iratou e na vuku ni ka ca eratou na vosota, 16-39. Sa qai yalata na ka vinaka vei ira era sa lomani iratou e na vukuna, 40-42.

¹ A SA kacivi iratou mai na nona tisaipeli eratou lewe tinikarua ko koya, a sa solia vei iratou na kaukauwa me rawai ira na yalo tawa-savasava me ratou vakasavi ira, ka vakabula kecega na mate, kei na malumalumu kecega.

² Ia o qo na yacadratou nai apositolo e lewe tinikarua: A kenai matai, o Saimoni, a yacana talega ko Petero, kei Adriu na tacina; o Jemesi na luve i Sepeteo, kei Joni na tacina;

³ o Filipo, kei Paricolomiu; o Tomasi, kei Maciu na kumuna nai vakacavacava; o Jemesi na luve i Alifio, kei Lepeo, a yacana talega ko Cateo;

⁴ o Saimoni e dua vei ira sa vakatokai Na gumatua, kei Juta Isikarioti, o koya sa soli koya yani.

⁵ Sa talai iratou na lewe tinikarua o qo ko Jisu, a sa vakarota vei iratou, ka kaya, Dou kakua ni lako e na nodra sala na veimatanitu kisau, kakua talega ni curu ki na dua na nodra koro na kai Samaria:

⁶ ia dou lako ga vei ira na sipi ni mataqali nei Isireli era sa yali tu.

⁷ Ia ni dou sa lako, vunau, ka kaya, Sa voleka mai na matanitu vakalomalagi.

⁸ Dou vakabulai ira sa tauvi-mate, vakasavasavataki ira na vukavuka, vakaturi ira cake tale na mate sara, vakasavi ira na tevoro: dou a rawata walega, mo dou solia walega.

⁹ Kakua ni cokonaka na koula, se na siliva, se na parasa, e na nomudou taga;

¹⁰ se na taga i vaqa e na gau-ni-sala, se nai curucuru e rua, se nai vava, se nai titoko: ni sa dodonu me soli vua na tamata daucakacaka na kena kakana.

¹¹ Ia na koro kei na koro lailai vakaaduaga dou na curu kina, taroga se ko cei sa yaga maikina; ka laʼki tiko kina ka yacova na nomudou lako tani.

¹² Ia ni dou sa curu ki na vale, dou kida vaka:

¹³ ia kevaka sa yaga na vale ko ya, me yaco kina na nomudou veivakacegui: ia kevaka sa sega ni yaga, me suka tale mai vei kemudou na nomudou veivakacegui.

¹⁴ Ia ko koya sa sega ni vakacegui kemudou, se rogoca na nomudou vosa, ni dou sa lako tani e na vale se na koro ko ya, kuretaka laivi na kuvu-ni-soso mai na yavamudou.

¹⁵ Au sa kaya vakaidina vei kemudou, Ena ca vakalailai na vanua ko Sotoma kei Komora e na siga ni lewa, ena ca vakalevu na koro ko ya.

¹⁶ Raica, au sa talai kemudou yani me vaka na sipi e na kedra maliwa na wolifa: o koya mo dou qai vuku me vaka na gata, ka yalovinaka me vaka na ruve.

¹⁷ Ia dou raici ira vinaka na tamata: ni ra na soli kemudou yani ki na mataveilewai, a ra na vakanakuitataki kemudou e na nodra veivale ni lotu;

¹⁸ ia dou na kau ki na matadra na turaga kei na tui e na vukuqu, mei vakadinadina vei ira, vei ira talega na veimatanitu kisau.

¹⁹ Ia ni ra sa soli kemudou yani, kakua ni lomaocaoca se vakaevei se cava dou na vosataka: ni na soli vei kemudou e na tiki-ni-siga ko ya na ka mo dou vosataka:

²⁰ ni dou sa sega ni vosa koi kemudou, ia sa vosa ga na Yalo ni Tamamudou e na lomamudou.

²¹ Ia era na dui soli ira yani na veitacini me vakamatei, kei na tamana na luvena: ia era na tu cake na gone vei ira na nodra qase, ka vakavuna na nodra mate:

²² ia dou na cati vei ira na tamata kecega e na vuku ni yacaqu: ia ko koya ena vosota me yacova nai vakataotioti, ena vakabulai.

²³ Ia ni ra vakacacani kemudou e na koro e dua, dou dro ki na dua tani: niʼu sa kaya vakaidina vei kemudou, Dou na sega ni vakaotia mada na Veikoro e Isireli, ena lako mada mai na Luve ni tamata.

²⁴ Sa sega na tisaipeli me uasivi vua na nonai vakavuvuli, se na tamata vua na nona turaga:

²⁵ sa levu vua na tisaipeli, kevaka erau sa tautauvata kei na nonai vakavuvuli, vua talega na tamata kevaka erau sa tautauvata kei na nona turaga. Kevaka era vakatoka nai taukei ni vale ko Pielisipupi, ena vakalevu cake ko ira na nona lewe-ni-vale!

²⁶ O koya mo dou qai kakua ni rerevaki ira: ni sa sega na ka vuni me kakua ni vakarairaitaki; se tabogo me kakua ni kilai.

²⁷ A ka kaʼu tukuna vei kemudou e na butobuto, dou tukuna e na rarama: kei na ka dou rogoca lo e na daligamudou, vunautaka e na dela ni vale.

²⁸ Ia kakua ni rerevaki ira sa vakamatea na yago, a ra sega ni rawata me ra vakamatea na yalo: ia dou rerevaki koya ga sa rawata me vakarusa na yalo kei na yago talega mai eli.

²⁹ Sa sega li ni volitaki na manumanu lalai e rua e nai lavo lailai sara e dua? ia ka sega e dua vei rau ena lutu walega ki na qele, e tabogo vua na Tamamudou.

³⁰ A sa wiliki vakaaduaga na drau ni ulumudou.

³¹ O koya mo dou qai kakua ni rere: dou sa uasivi cake vei ira na manumanu lalai e vuqa.

³² O koya yadua ena vakatusai au e na matadra na tamata, au na vakatusai koya talega e na mata i Tamaqu sa tiko mai lomalagi.

³³ Ia ko koya yadua ena cakitaki au e na matadra na tamata, au na cakitaki koya talega e na mata i Tamaqu sa tiko mai lomalagi.

³⁴ Dou kakua ni vakasama niʼu sa lako mai me kauta mai ki vuravura na veivinakati: au sa sega ni lako mai me kauta mai na veivinakati, ai seleiwau ga.

³⁵ Ni kaʼu sa lako mai me tawasei rau na veitamani-tagane, kei na veitinani-yalewa, kei na veivugoni-yalewa talega.

³⁶ Ia ena nona meca na tamata ko ira na nona lewe-ni-vale.

³⁷ O koya sa loloma vakalevu vei tamana se tinana ka vakalailai vei au, sa sega ni yaga vei au: ia ko koya sa loloma vakalevu vua na luvena-tagane se na luvena-yalewa ka vakalailai vei au, sa sega ni yaga vei au.

³⁸ Ia ko koya sa tawa colata na nona kauveilatai, ka muri au, sa sega ni yaga vei au.

³⁹ O koya sa maroroya na nona bula, ena vakayalia: ia ko koya sa vakayalia na nona bula e na vukuqu, ena maroroya.

⁴⁰ O koya sa vakacegui kemudou sa vakacegui au; ia ko koya sa vakacegui au sa vakacegui koya sa talai au mai.

⁴¹ O koya sa vakaceguya e dua na parofita ni sa vakatokai me parofita, ena rawata na kenai sau; o koya sa vakaceguya na tamata yalododonu ni sa vakatokai me tamata yalododonu, ena rawata na kenai sau:

⁴² ia ko koya ena solia vua e dua vei ira o qo era sa lailai ga e i dua walega na bilo wai liliwa me gunuva, ni sa vakatokai me tisaipeli, au sa kaya vakaidina vei kemudou, Ena sega sara ni yali vua na kenai sau.