Maciu 1 - AI VOLA TABU

A WASE I. —Ai tubutubu i Jisu, 1-17. A nona sucu mai vua na gonealewa, 18-25.

¹ AI vola ni tubutubu i Jisu Karisito, na luve i Tavita, na luve i Eparaama.

² A tama i Aisake ko Eparaama; ka tama i Jekope ko Aisake; ka tama i Juta kei iratou na tuakana kei iratou na tacina ko Jekope;

³ ka tama i Feresi kei Sera ko Juta, a tina-drau ko Camari; ka tama i Esiromi ko Feresi; ka tama i Erami ko Esiromi;

⁴ ka tama i Aminatapi ko Erami; ka tama i Naasoni ko Aminatapi; ka tama i Salimoni ko Naasoni;

⁵ ka tama i Poasi ko Salimoni, a tinana ko Reapi; ka tama i Opeti ko Poasi, a tinana ko Ruci; ka tama i Isei ko Opeti;

⁶ ka tama i Tavita na tui ko Isei. Ka tama i Solomoni ko Tavita na tui, a tinanako koya ka nei Uria;

⁷ ka tama i Ropoami ko Solomoni; ka tama i Epia ko Ropoami; ka tama i Asa ko Epia;

⁸ ka tama i Iosafati ko Asa; ka tama i Yorami ko Iosafati; ka tama i Osia ko Yorami;

⁹ ka tama i Yocami ko Osia; ka tama i Aasi ko Yocami; ka tama i Esekia ko Aasi;

¹⁰ ka tama i Manase ko Esekia; ka tama i Amoni ko Manase; ka tama i Josia ko Amoni;

¹¹ ka tama i Yikonia kei iratou na wekana ko Josia, ni sa yaco na tiko vakavulagi mai Papiloni.

¹² Ia ni ra sa kau dina ki Papiloni, sa qai sucu ko Salacieli, a tamana ko Yikonia; ka tama i Soropapeli ko Salacieli;

¹³ ka tama i Epiuta ko Soropapeli; ka tama i Eliakimi ko Epiuta; ka tama i Asori ko Eliakimi;

¹⁴ ka tama i Satoki ko Asori; ka tama i Akeimi ko Satoki; ka tama i Iliuta ko Akeimi;

¹⁵ ka tama i Eliasari ko Iliuta; ka tama i Macani ko Eliasari; ka tama i Jekope ko Macani;

¹⁶ ia ko Jekope na tama i Josefa na wati i Meri, o koya sa sucu mai vua ko Jisu, o koya sa vakatokai ko Karisito.

¹⁷ Sai tabatamata kina e tinikava nai tabatamata kecega sa vakatekivu vata kei Eparaama ka yacovi Tavita; ia sai tabatamata e tinikava ko ira sa vakatekivu vata kei Tavita ka yacova na tiko vakavulagi mai Papiloni; ia sai tabatamata e tinikava ko ira sa vakatekivu vata kei na tiko vakavulagi mai Papiloni ka yacovi Karisito.

¹⁸ Ia sa vakaoqo na sucu i Jisu Karisito: Ni sa musu eliu ko Meri na tinana vei Josefa, ia ni rau sa sega mada ni veikilai, sa votu na nona bukete mai vua na Yalo Tabu.

¹⁹ Ia ni sa yalododonu ko Josefa na watina, a sa sega ni via vakasesevotuna, sa gu me biuta vuni yani.

²⁰ Ia ni sa vakananuma tiko ko koya na ka o qori, raica, sa dua na agilose ni Turaga sa rairai mai vua e na tadra, ka kaya, Josefa, na luve i Tavita, kakua ni rere ni kauta vei iko na watimu ko Meri: ni sa mai vua na Yalo Tabu na ka sa kunekune vua:

²¹ ia ena vakasucuma ko koya e dua na gonetagane; ia mo vakatoka na yacana ko JISU; ni sai koya ga o qo ena vakabulai ira na nona tamata mai na nodrai valavala ca. (

²² Ia sa yaco kecega o qo, me vakayacori kina na vosa ni Turaga a ya sa tukuna na parofita, ka kaya,

²³ Raica, ena bukete na gonealewa, ka na vakasucuma e dua na gonetagane, ka na vakatokai na yacana ko Imanueli: —a kenai balebale, A Kalou e na keda maliwa.)

²⁴ Ia ni sa yadra mai na moce ko Josefa sa laʼki kitaka me vaka ka kaya vua na agilose ni Turaga, a sa kauta vua na watina:

²⁵ a rau sa sega ni veikilai, ka malua me vakasucuma mada ko koya na nona ulumatua na gonetagane; a sa vakatoka na yacana ko koya ko JISU.