Luke 9 - AI VOLA TABU

Sa talai iratou na nona tisaipeli ko Jisu me ratou cakava na ka-mana e so, ka vunautaka nai tukutuku-vinaka, 1-6. Sa via raici Jisu ko Eroti, 7-9. Sa vakani ira na lewe vuqa ko Jisu, 10-17. Sa vakavulici iratou na nona tisaipeli, 18-27. Sa matalia na yagona, 28-36. Sa vakabula e dua sa curumi, 37-43. Sa vosa vei iratou na nona tisaipeli, 44-50. Sa tukuna na ka me ra cakava era sa muri koya, 51-62.

¹ SA qai kacivi iratou mai na nona tisaipeli e tinikarua me ratou soqoni vata, a sa solia vei iratou na lewa kei na kaukauwa vei ira kecega na tevoro, me ratou vakabula talega na veimate;

² a sa talai iratou ko koya me ratou vunautaka na matanitu ni Kalou, ka vakabulai ira sa tauvi-mate.

³ A sa kaya ko koya vei iratou, Kakua ni kauta e dua na ka e na gau-ni-sala, kakua nai titoko, se na taga i vaqa, se na madrai, se nai lavo; se yarua na nomudoui curucuru.

⁴ Ia na vale kecega dou na curu kina, dou tiko ga kina, ka cavu yani maikina.

⁵ Ia ko ira vakaaduaga ena sega ni vakacegui kemudou, ni dou sa lako tani e na koro ko ya, kuretaka sara na kuvu-ni-soso mai na yavamudou, mei vakatakilakila vei ira.

⁶ A ratou sa lako yani, ka lako ki na veikoro lalai, ka vunautaka nai tukutuku-vinaka, ka ia na veivakabulai e na veiyasana kecega.

⁷ A sa rogoca ko Eroti na turaga na ka kecega sa cakava ko koya: a sa kidroa kina, ni sa kaya e so, Sa tu cake tale mai na mate ko Joni;

⁸ ka so, Sa rairai mai ko Ilija; ka so tale, Sa tu cake tale e dua na parofita eliu.

⁹ A sa kaya ko Eroti, Au a tamusuka na ulu i Joni: ia ko cei beka o qo, au sa rogoca kina na veika vakaoqo? A sa via raici koya.

¹⁰ Ia ko iratou nai apositolo, ni ratou sa lesu tale mai, eratou sa tukuna vua na ka kecega eratou sa kitaka. A sa kauti iratou ko koya, ka lako vakatikitiki ki na dua na vanua lala sa voleka ki na koro na yacana ko Peciseita.

¹¹ Ia ko ira na lewe vuqa, ni ra sa kila, era sa muri koya; a sa vakacegui ira ko koya, a sa vosa vei ira e na ka ni matanitu ni Kalou, a sa vakabulai ira era sa tawa bula vinaka.

¹² Ia ni sa kala na siga, sa lako mai ko iratou na tinikarua, ka kaya vua, Vakatalai ira tani na lewe vuqa, me ra lako ki na veikoro lalai sa vakavolivoliti, kei na veiyasana kisau, me ra moce, ka cakava na kedra: ni da sa tiko eke e na vanua lala.

¹³ A sa kaya ko koya vei iratou, Dou solia vei ira me ra kana. A ratou sa kaya, Sa sega na ka vei keitou, e lima walega nai buli madrai kei na ika e rua; ke keitou sega ni laʼki voli kakana me kedra kecega na lewe vuqa o qo.

¹⁴ Ni ra sa lewe lima beka na udolu na tagane. A sa kaya ko koya vei iratou na nona tisaipeli, Kaya me ra tiko sobu me yalimasagavulu me tiko vata.

¹⁵ A ratou sa kitaka vakakina, ka sa kaya me ra tiko sobu kecega.

¹⁶ Sa qai taura ko koya nai buli madrai e lima kei na ika e rua, a sa ta cake ki lomalagi, ka vatonaka, ka dovia, ka solia vei iratou na tisaipeli me ratou tauca e matadra na lewe vuqa.

¹⁷ A ra sa kana, a ra sa mamau kecega: a sa tomiki vata na vo ni kedra ka sa dovi, a sa tinikarua nai su.

¹⁸ A SA yaco, ni sa tiko duaduaga ko koya ka masu, sa tiko talega kaya ko iratou na tisaipeli: a sa tarogi iratou ko koya, ka kaya, Era sa kaya ko ira na tamata se ko cei koi au?

¹⁹ A ratou sa vosa, ka kaya, O Joni na dauveipapitaiso; ia ka so, O Ilija; ia ka so tale, Sa tu cake tale mai e dua na parofita eliu.

²⁰ Sa qai kaya vei iratou ko koya, Ia dou sa kaya koi kemudou se ko cei koi au? Sa vosa ko Petero, ka kaya, A Karisito ni Kalou.

²¹ A sa vosa matua vei iratou ko koya, ka vakarota vei iratou me ratou kakua ni tukuna na ka ko ya vua e dua;

²² a sa kaya, ni sa kilikili kaya na Luve ni tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vu-ni-vola, ka me vakamatei ko koya, ka vakaturi cake tale mai e nai katolu ni siga.

²³ A sa kaya vei ira kecega, Kevaka e dua sa via muri au, me kakua ni muria na lomana, ia me colata ga na nona kauveilatai e na veisiga, ka muri au.

²⁴ Ia ko koya yadua sa via maroroya na nona bula, ena vakayalia; ia ko koya ena vakayalia na nona bula e na vukuqu, ena maroroya.

²⁵ Ia ka cava na kena yaga vua na tamata, kevaka e rawati vuravura kece, ka vakayali, se biu tani?

²⁶ Ia ko koya yadua ena maduataki au kei na noqu vosa, ena maduataki koya na Luve ni tamata, ni na lako mai e na nonai ukuuku, kei na nei Tamana, kei na nodra na agilose yalosavasava.

²⁷ Ia kaʼu sa kaya vakaidina vei kemudou, Sa tu ca eke e so, era na sega ni tovolea na mate, era na raica mada na matanitu ni Kalou.

²⁸ Ia sa bogi walu beka ni sa oti na vosa o qo, sa qai kauti Petero kei Joni kei Jemesi ko koya, ka lako cake ki na ulu-ni-vanua me masu.

²⁹ Ia ni sa masu tiko ko koya, sa matalia na matana, a sa vulavula ka lumilumisa na nonai sulu.

³⁰ Ka raica, e le rua na tamata sa veivosaki kaya, oi rau ko Mosese kei Ilija;

³¹ erau sa rairai mai e nai ukuuku, ka rau vosataka na nona ciba ena vakayacora ko koya mai Jerusalemi.

³² A sa bibi e na moce ko Petero kei rau eratou sa tiko kaya: ia ni ratou sa yadra mai, eratou sa raica na nonai ukuuku, kei rau na tamata eratou sa tu vata kaya.

³³ A sa yaco, ni rau sa lako tani tiko vua, sa kaya ko Petero vei Jisu, Turaga, sa vinaka na nodatou tiko eke: ia me keitou tara na vale vakacevaceva e tolu: e dua me nomu, ka dua me nei Mosese, ka dua me nei Ilija: ia ka sa sega ni kila na ka sa kaya.

³⁴ Ia ni sa vosa tiko vakaoqo, sa dua na o sa lako mai, ka vakarurugi rau: a ratou sa rere ni rau sa curu ki na o.

³⁵ A sa dua na vosa sa lako mai na o, ka kaya, O qo na noqu Gone ni toko: dou rogoci koya.

³⁶ Ia ni sa oti na vosa ko ya, sa kune duaduaga ko Jisu. A ratou sa vunia ga, a ratou sa sega ni tukuna vua e dua e na gauna ko ya e dua na ka eratou a raica.

³⁷ A sa yaco e na sabogibogi, ni ratou sa lako sobu mai na ulu-ni-vanua, era lewe vuqa sara sa veitata kaya.

³⁸ Ka raica, sa dua vei ira na lewe vuqa sa qoqolou cake, ka kaya, Vakavuvuli, au masuti iko, mo mai raica na luvequ-tagane; ni sa luvequ dua bauga:

³⁹ ka raica, sa dua na yalo sa tauri koya, a sa qoqolou vakasauri kina; a sa drebasuka, ka sa qai tuburaki vuso, a sa vakanara ka dredre ni lako tani vua:

⁴⁰ ia kaʼu a masuti iratou na nomu tisaipeli me ratou vakasavi koya tani; a ratou sa sega ni rawata.

⁴¹ A sa vosa ko Jisu, ka kaya, Ai tabatamata tawa vakabauta ka yalo vakatani! me bogi vica meʼu tiko kei kemudou, ka vosoti kemudou? kauta mai na luvemu kike.

⁴² Ia ni sa lako tiko mai ko koya, sa vakabalea ko na tevoro, ka drebasuka. A sa vunauca na yalo tawa-savasava ko Jisu, a sa Vakabula na gone, a sa solia tale vei tamana.

⁴³ A ra sa kidacala kecega e na kaukauwa levu ni Kalou. Ia ni ra sa kidacala kecega e na vuku ni ka kecega sa cakava ko Jisu, sa kaya ko koya vei iratou na nona tisaipeli,

⁴⁴ Me lutu sobu ki na daligamudou na vosa o qo: ni na soli yani na Luve ni tamata ki na ligadra na tamata.

⁴⁵ A ratou sa sega ni kila na vosa ko ya, a sa vuni vei iratou, a ratou sa lecava: a ratou sa rere ni tarogi koya e na vosa ko ya.

⁴⁶ Sa qai tubu na veileti vei iratou, se ko cei vei iratou ena uasivi cake.

⁴⁷ Ia ni sa raica ko Jisu na nanuma ni yalodratou, sa kauta e dua na gone lailai, ka vakatura voleka vua,

⁴⁸ a sa kaya vei iratou, O koya yadua sa vinakata na gone lailai o qo e na vuku ni yacaqu, sa vinakati au: ia ko koya yadua sa vinakati au, sa vinakati koya sa talai au mai: ni na uasivi cake ko koya sa lailai sara vei kemudou kecega.

⁴⁹ Sa qai vosa ko Joni, ka kaya, Turaga, keitou sa raica e dua sa vakasava tani na tevoro e so e na yacamu: a keitou sa tarova, ni sa sega ni muri kedatou.

⁵⁰ A sa kaya ko Jisu vua, Kakua ni tarova, ni sa nodai to ko koya sa sega ni noda meca.

⁵¹ IA ni sa yaco dina na gauna me kau cake ko koya, sa vaqara matua na matana me lako kivaka ki Jerusalemi.

⁵² A sa tala e so na tamata talai me ra liu e matana: a ra sa lako ka curu ki na dua na nodra koro lailai na kai Samaria, me ra vakarautaka na kena.

⁵³ A ra sa tawa vakacegui koya, e na vuku ni sa vaqara na matana kivaka ki Jerusalemi.

⁵⁴ Ia ni sa raica koi rau na nona tisaipeli ko Jemesi kei Joni, erau sa kaya, Turaga, o sa vinakata beka me keirau kaya me lutu sobu mai lomalagi na buka waqa, me vakamai ira, me vaka na ka sa kitaka ko Ilija?

⁵⁵ A sa vuki ko koya, ka vunauci rau, ka kaya, Drau sa sega ni kila nai valavala ni yalomudrau:

⁵⁶ ni sa sega ni lako mai na Luve ni tamata me vakamatei ira na tamata, me vakabula ga. A ratou sa lako ki na dua tani na koro lailai.

⁵⁷ A sa yaco, ni ratou sa lako tu e na sala, sa dua e kaya vei koya, Turaga, au na muri iko ki na veiyasana ko na lako kina.

⁵⁸ Sa qai kaya vua ko Jisu, Sa vaqara na fokise, a sa vakairoro na manumanu ni lagi; ia na Luve ni tamata, sa sega vua na tikina me vakadavora kina na uluna.

⁵⁹ A sa kaya ko koya vua e dua tale, Muri au. A sa kaya ko koya, Turaga, biuti au meʼu lako mada ka buluti tamaqu.

⁶⁰ A sa kaya vua ko Jisu, Biuta na mate me ra buluta na nodra mate; ia ko iko, mo laʼki vunautaka na matanitu ni Kalou.

⁶¹ A sa dua talega sa kaya, Turaga, au na muri iko; ia mo biuti au ga meʼu lako mada me veitatau kei ira mai neitou.

⁶² A sa kaya vua ko Jisu, E sega e dua na tamata, sa laʼki taura nai siviyara ka qai rai vuki ki dakuna, me yaga e na matanitu ni Kalou.