Luke 7 - AI VOLA TABU

Sa kitaka e so na caka-mana ko Jisu, 1-17. Sa tukuni koya vei rau na tisaipeli i Joni, 19-23. Sa qai tukuni Joni vei ira na tamata ko Jisu, 24-30. Sa vunauci ira era sa sega ni vakabauti koya, 31-35. Sa dua na yalewa sa vakaraitaka vua ko Jisu na nona loloma, ka sa vinakati koya, 36-50.

¹ IA ni sa vakaotia na nona vosa kecega ni ra sa rogoca tiko na lewe vuqa, sa qai curu ko koya ki Kaperinaumi.

² Ia sa dua na turaga ni valu, sa tauvi-mate e dua na nona tamata, sa daulomana ko koya, a sa vo e lailai me ciba.

³ Ia ni sa rogoca nai tukutuku kei Jisu, sa tala vua e so na nodra qase na kai Jutia, me masuti koya me lako mai ka Vakabula na nona tamata.

⁴ Ia ni ra sa tadu vei Jisu, era masuti koya vakalevu, ka kaya, Sa yaga ko koya mo kitaka kina na ka o qo;

⁵ ni sa lomana na noda matanitu, a sa tara ko koya na neimami vale ni lotu.

⁶ Sa qai lako vata kei ira ko Jisu. Ia ni sa sega ni yawa ko koya ki vale, sa tala e so na wekana ko na turaga ni valu, me ra kaya vua, Turaga, kakua ni vakaceguoca-taki iko: niʼu sa sega ni yaga mo curu ki na noqu vale:

⁷ o koya talega o qo kaʼu sa tawa nanumi au kina meʼu yaga me lako vei iko: mo cavuta walega na vosa, ena bula kina na noqu tamata:

⁸ ni sa turaga lailai koi au, kaʼu sa lewa na tamatai valu e so; ia kaʼu sa kaya vua o qo, Mo lakani, a sa lakani: ka vei koya e dua tani, Mo lako mai, a sa lako mai: ka vei koya na noqu tamata, Mo kitaka o qo, a sa kitaka.

⁹ Ia ni sa rogoca na veika o qo ko Jisu, sa kidacalataki koya, a sa vuki vei ira na lewe vuqa sa muri koya, ka kaya, Au sa kaya vei kemudou, Au sa tawa kunea vei ira na Isireli e dua na vakabauta me vakaoqo na kena levu.

¹⁰ Ia ni sa lesu tale ki vale ko ira era sa talai, era sa kunea na tamata ka tauvi-mate ni sa bula vinaka.

¹¹ A sa yaco e na sabogibogi, sa lako ko koya ki na dua na koro na yacana ko Neini; a ra sa lewe vuqa na nona tisaipeli era sa lako vata kaya, kei ira talega na lewe vuqa sara.

¹² Ia ni sa toro voleka ki na matamata-ni-koro, raica, sa le dua sa mate oti sa colati ki nai bili, a gone i tinana e dua bauga, a sa yada ko koya: a ra sa lewe vuqa sara na lewe ni koro era tiko vata kava.

¹³ Ia ni sa raici koya ko na Turaga, sa lomana, ka kaya vua, Kakua ni tagi.

¹⁴ A sa lako ko koya, ka tara na tavata: a ra sa tu vakadua ko ira sa colata. A sa kaya ko koya, Na cauravou, au sa kaya vei iko, Tu cake.

¹⁵ A sa duri cake na mate, ka vakatekivu me vosa. A sa solia ko koya vei tinana.

¹⁶ A sa tauvi ira kecega na rere: a ra sa vakarokorokotaka na Kalou, ka kaya, Sa qai tubu cake vei keda e dua na parofita levu; a sa lako mai ko na Kalou vei ira na nona tamata.

¹⁷ A sa kuruseseti Jutia taucoko na kenai rogo o qo, kei na yasana kecega sa vakavolivolita.

¹⁸ A sa vakatakila vei Joni na ka kecega o qo ko ira na nona tisaipeli.

¹⁹ A sa kacivi rau e lewe rua na nona tisaipeli ko Joni, ka talai rau vei Jisu, me kaya, O iko beka ko Koya e lako mai, se da namaka e dua tani?

²⁰ Ia ni rau sa yaco vua, erau sa kaya, Sa talai keirau mai vei iko ko Joni na dauveipapitaiso, me kaya, O iko beka ko Koya e lako mai, se da namaka e dua tani?

²¹ Ia e na tiki-ni-siga ko ya era sa lewe vuqa sa vakabula ko koya mai na veimate kei na veirarawa, ka maivei ira na yalo ca; a ra sa lewe vuqa era sa mataboko sa solia vei ira ko koya me ra rai rawa.

²² Sa qai vosa ko Jisu, ka kaya vei rau, Drau lako, ka tukuna vei Joni na veika drau sa raica ka rogoca; ni ra sa rai na mataboko, sa lako na lokiloki, sa vakasavasavataki na vukavuka, sa rcgo na didivara, sa vakaturi cake tale na mate, sa vunautaki nai tukutuku-vinaka vei ira na dravudravua:

²³ a sa kalougata ko koya ena sega ni tarabe e na vukuqu.

²⁴ Ia ni sa takali koi rau ka tala ko Joni, sa vakatekivu ko koya me kaya vei ira na lewe vuqa e na vuku i Joni, A cava dou a lakova ki na veikau mo dou raica? a gasau sa yavalati e na cagi, ne?

²⁵ ia na cava dou a lakova mo dou raica? a tamata sa vakaisulu e nai sulu malumalumu, ne? raica, o ira sa vakaisulu vakaiukuuku, ka daukana tiko, era sa tiko e na veivale vakaturaga.

²⁶ Ia na cava dou a lakova mo dou raica? a parofita, ne? io, au sa kaya vei kemudou, e dua sa uasivia na parofita.

²⁷ Sai koya o qo, ka volai vakaoqo, Raica, au sa tala yani na noqui talatala e matamu, ena caramaka ko koya na nomu sala e matamu.

²⁸ Niʼu sa kaya vei kemudou, Vei ira sa sucu mai na yalewa sa sega na parofita sa levu cake vei Joni na dauveipapitaiso; ia ko koya sa lailai sara e na matanitu ni Kalou sa uasivi vei koya.

²⁹ Ia ko ira kecega na tamata era rogoca, kei ira sa daukumuna nai vakacavacava, era vakadinadina vua na Kalou, ni ra sa papitaisotaki e na papitaiso i Joni.

³⁰ Ia ko ira na Farisi kei ira talega na vu-ni-vunau, era sa cata na ka sa nakita na Kalou e na vukudra, a ra sa sega ni papitaisotaki vua.

³¹ A sa kaya na Turaga, A cava meʼu vakatautauvatataki ira kina na tamata e nai tabatamata o qo? se ra tautauvata beka kei na cava?

³² Era sa tautauvata kei ira na gone sa tiko e na rara ni veivoli, ka veikauyaki, ka kaya, Keitou a uvu bitu vei kemudou, ka dou a sega ni meke: keitou a tagi vei kemudou, ka dou a sega ni tagiyaso.

³³ Ni sa lako mai ko Joni na dauveipapitaiso ka sega ni daukana madrai se daugunu waini; ia dou sa kaya, Sa rawai koya e dua na tevoro.

³⁴ Sa lako mai na Luve ni tamata, a sa kana ka gunu, ia dou sa kaya, Raica, a tamata daukana ka daugunu waini, a nodrai tau era kumuna nai vakacavacava kei na tamatai valavala ca!

³⁵ A sa vakadonuya na vuku ko ira kecega na luvena.

³⁶ A sa masuti koya e dua na Farisi me kana vata kaya. A sa curu ki na vale ni Farisi ko koya, ka tiko sobu me kana.

³⁷ Ka raica, sa dua na yalewa e na koro, o koya sai valavala ca eliu, ni sa kila ni sa tiko ko koya c na vale ni Farisi mo kana, sa kauta mai e dua na tavaya alapasiteri sa tawa e nai lumu:

³⁸ a sa tu mai dakuna e na yavana, ka tagi, a sa vakatekivu me vuya na yavana e na wai ni matana, a sa quaraka e na drau ni uluna, a sa reguca na yavana, ka lumuta c nai lumu.

³⁹ Ia ni sa raica ko na Farisi ka sureti koya, sa vosa lo e lomana, ka kaya, Kevaka sa parofita ko koya o qo, sa kila na yalewa o qo sa tarai koya, kei na nonai valavala talega; ni sa yalewa i valavala ca.

⁴⁰ A sa vosa ko Jisu, ka kaya vua, Saimoni, sa dua na ka kaʼu sa via taroga vei iko: (A sa kaya ko koja, Vakavuvuli, mo kaya ga mai:)

⁴¹ Sa dua na turaga, sa lewe rua kina na tamata erau sa tawa sauma na nona ka: e dua, sa lima na drau nai lavo sa tawa sauma; e dua tale, sa limasagavulu.

⁴² Ia ni sa sega na nodrau ka me rau vakaivolitaka kina, sa qai sereka walega vei rau ruarua. Tukuna mada se ko cei vei rau ena lomani koya vakalevu.

⁴³ A sa vosa ko Saimoni, ka kava, Au sa vakasama, ko koya sa levu cake na ka sa sereki vua. A sa kaya vua ko koya, O sa lewa vakadodonu.

⁴⁴ A sa vuki vaka vua na yalewa ko koya, ka kaya vei Saimoni, O sa raica na yalewa o qo, ne? Au sa curu ki na nomu vale, sa sega na wai ko sa solia ki na yavaqu: ia ka sa vuya na yavaqu ko koya e na wai ni matana, a sa quaraka e na drau ni uluna:

⁴⁵ o sa tawa reguci au: ia ko koya o qo sa sega ni cegu ni daureguca na yavaqu niʼu sa tiko eke:

⁴⁶ o sa sega ni lumuta na uluqu e na waiwai: ia ko koya o qo sa lumuta na yavaqu e nai lumu.

⁴⁷ O koya o qo kaʼu sa kaya kina vei iko, A nonai valavala ca e vuqa, sa bokoci; a sa loloma vakalevu kina ko koya: ia ko koya sa lailai ga na nona ka sa bokoci, sa loloma vakalailai.

⁴⁸ Sa qai kaya vua na yalewa ko koya, Sa bokoci na nomui valavala ca.

⁴⁹ Ia ko ira era sa tiko vata kaya me kana, era sa vakatekivu me ra kaya vakai ira, O cei o qo sa bokoca talega nai valavala ca?

⁵⁰ A sa kaya ko koya vua na yalewa, Sa vakabulai iko na nomu vakabauta; mo lako e na vakacegu.